Batu babañata kacenu mwa lifasi baipapata kuba Bakreste; niteñi, baezanga lika ka nzila yeutwisa babañwi butuku. Babañwi banani moya wa buitati, habasepahali, kamba mane hababonisi sishemo. Babañwi bona habasepahalangi ku bakubona. Mikwa yabona itahisanga kuli batu babañwi baipuze kuli: ‘Kuba Mukreste kutalusañi luli?’

Sekutalusa kuba Mukreste wa niti

 Mutu ukona kubulela ka bunolo kuli ki Mukreste. Kono kuba Mukreste kuama lika zeñata. Ka kuya ka Bibele, Mukreste ki mutu yali mulutiwa wa Jesu Kreste. (Likezo 11:26) Jesu kasibili naabulezi kuli: “Haiba muzwelapili mwa linzwi laka, mu balutiwa baka luli.” (Joani 8:31) Niti kikuli, hakuna mutu yakona kulatelela manzwi a Jesu ka kutala. Kono Mukreste uswanela kuikataza kusebelisa lituto za Jesu ni kueza likatulo zelumelelana ni lituto zeo zazi ni zazi. Munyakisise mitala yelatelela.

Bakreste babonisanga lilato lelisina buitati

 Zanaabulezi Jesu: “Nimifa mulao omunca, wa kuli mulatane; sina moni milatezi, mulatane cwalo ni mina. Batu kaufela bakaziba kuli mu balutiwa baka ka taba ye—haiba mulatana mwahalaa mina.”—Joani 13:34, 35.

 Zanaaezize Jesu: Jesu naabonisize batu kaufela lilato lelisina buitati, kusina taba ni mayemo abona mwa silalanda kamba simuluho yabona. Naafolisize bakuli, kufepa babashwile tala, mi mane naafile bupilo bwahae bakeñisa batu.—Mateu 14:14-21; 20:28.

 Mobaezezanga Bakreste: Bakreste babonisanga lilato lelisina buitati ka kuba ni bufani, kusaketulula batu ni kuswalela babañwi. Batusanga batu babakopana ni miinelo yetaata, mi baitombolanga lika zeñwi kuli batuse babañwi.—1 Joani 3:16.

Bakreste basepahala

 Zanaabulezi Jesu: “Ki na . . . niti.”—Joani 14:6.

 Zanaaezize Jesu: Jesu naabulezi ni kueza lika kaufela ka busepahali. Naasika lika kupuma babañwi kamba kubakukueza kulumela taba ya buhata. Batu neba muziba kuba mutu yasepahala, mi naasepahalile kusina taba kuli kueza cwalo nekuka mutahiseza butata.—Mateu 22:16; 26:63-67.

 Mobaezezanga Bakreste: Bakreste habapumangi. Balifanga mitelo, habauzwangi, mi basebezanga ka taata kwa misebezi yabona kulikana ni nako yebatomezwi ya kuba fa musebezi. (Maroma 13:5-7; Maefese 4:28) Habaputelelangi babañwi, kukopisa habañola litatubo, kamba kuñola litaba za buhata fa mapampili apaka lika zebapetile.—Maheberu 13:18.

Bakreste babonisanga sishemo

 Zanaabulezi Jesu: “Hamutahe ku na, mina kaufela babambindana ni babaimezwi, mi nika mikatulusa. Muitwese coko yaka mi muitute ku na, kakuli ninani musa mi niwile pilu, mi mukakatuluha. Kakuli coko yaka ibunolo, mi mulwalo waka ububebe.”—Mateu 11:28-30.

 Zanaaezize Jesu: Jesu naaatumeleha mi naanani sishemo. Naaamuhelanga banana, kuomba-omba babaziyelehile, mi naakutekanga babañwi.—Mareka 10:13-15; Luka 9:11.

 Mobaezezanga Bakreste: Bakreste baambolanga ni babañwi ka sishemo; habahalifelangi babañwi kamba kuitusisa lipulelo zemaswe. (Maefese 4:29, 31, 32) Baisanga pilu babañwi mi babatanga linzila zebakona kutusa ka zona babañwi.—Magalata 6:10.

Bakreste bazwelangapili kusepahala kwa batu bobanyalani ni bona

 Zanaabulezi Jesu: “Sakopanyize Mulimu, kusike kwaba ni mutu yasikauhanya.”—Mareka 10:9.

 Zanaaezize Jesu: Nihaike kuli Jesu naasika nyala, naasusuelize batu babanyalani kuzwelapili kusepahala ku bakubona. (Mateu 19:9) Naalemusize batu ka za likezo zekona kutahisa kuli linyalo lisinyehe.—Mateu 5:28.

 Mobaezezanga Bakreste: Bakreste baambukanga muzamao osa kutekehisi linyalo. (Maheberu 13:4) Batu babanyalani babonisananga lilato ni likute.—Maefese 5:28, 33.