Mulimu U Lukisa ku Liulula Batu

Mulimu naa sepisize muuna ya sepahala Abrahama kuli “peu” ye ne polofitilwe ne i ka pepelwa mwa lusika lwa hae. Batu ba “macaba kamukana” ne ba ka fuyaulwa ka peu yeo. (Gen. 22:18) Hamulaho Jakobo muikulyaa Abrahama, a ya kwa Egepita ili ko lubasi lwa hae ne lu izo hula ku ba sicaba sa Isilaele wa kwaikale.

Hasamulaho, ha ne ba li mwa Egepita, Faro yo muñwi ya naa busa ka buhateleli, a fetula Maisilaele ku ba batanga ku fitela Mulimu a tahisa mupolofita Mushe, ili ya naa etelezi sicaba sa Isilaele ku si zwisa mwa naha yeo ka ku si silisa Liwate le li Fubelu ka makazo ya ku aba mezi a liwate leo. Hamulaho wa fo, Mulimu a fa Isilaele milao, ye ne kopanyeleza ni Milao ye Lishumi, kuli a ba etelele ni ku ba sileleza. Milao yeo ne i talusa za matabelo a naa tokwa ku fa mutu kuli a swalelwe libi. Ka ku susumezwa ki Mulimu, Mushe naa bulelezi Maisilaele kuli Mulimu naa ka ba lumela mupolofita yo muñwi. Mupolofita yo naa ka ba yena “peu” ye ne sepisizwe.

Hasamulaho wa lilimo ze bato ba ze 500 ku zwa fo, Mulimu naa sepisize Mulena Davida kuli mutu ya naa ka taha yo, ili ya naa ka ba “peu” ye ne polofitilwe mwa Edeni, naa ka ba mulena wa mubuso o no ka ba teñi ku ya ku ile. Mutu yo naa ka ba Mesia, yena Muliululi ya naa ketilwe ki Mulimu kuli a pilise batu ni ku tahisa kuli lifasi li be Paradaisi hape.

Ka ku itusisa Davida ni bapolofita ba bañwi, Mulimu naa zwezipili ku patulula litaba ze ñata ka za Mesia. Ne ba polofitile kuli Mesia naa ka ba ni buikokobezo ni sishemo ni kuli mwa puso ya hae ne ku si ke kwa ba ni tala, saluluti, ni lindwa. Batu kaufela ne ba ka pilisana ka kozo mi ne ku ka ba ni kozo mwahalaa bona ni lifolofolo. Makulanu, manyando, ni lifu—ili miinelo ye ne si yo mwa mulelo wa Mulimu wa pili—ne i ka fela, mi batu ba ba shwile ne ba ka kutisezwa kwa bupilo fa lifasi.

Mulimu naa itusisize mupolofita Mika ku polofita kuli Mesia naa ka pepelwa mwa Betelehema, mi naa itusisize mupolofita Daniele ku polofita kuli Mesia naa ka bulaiwa hasamulaho. Kono Mulimu naa ka zusa Mesia kwa bafu ni ku mu keta ku ba Mulena mwa lihalimu. Hape Daniele naa bonelezi cimo kuli kwa mafelelezo Mubuso wa Mesia ne u ka yola milonga ye miñwi kaufela. Kana Mesia naa tile luli, ku likana ni mo ne ku polofitezwi?

—Taba ye i tomile fa Genese, likauhanyo 22-50, ni Exoda, Deuteronoma, 2 Samuele, Lisamu, Isaya, Daniele, Mika, ni Zakaria 9:9.

[Caption on page 5]

LIBIZO LE LI KENILE LA MULIMU

Kwa Genese 2:4 ki kona ko ku fumaneha libizo la Jehova lwa pili mwa Bibele. Libizo le li ipitezi leo li fumaneha ibato ba ha 7,000 mwa miputo ya Mañolo A Kenile ye ne ñozwi mwa puo ya kwa makalelo. Taluso ya libizo leo, yona ya kuli “U tahisa ku ba Teñi,” i lu kolwisa kuli Mulimu wa kona ku peta ka ku tala lika kaufela za lelile ni za sepisize.