MU SUTELELE KU MULIMU

‘Jehova U mi Swalezi ka Pilu Kaufela’

“Mutu ya sa koni ku swalela ba bañwi u sinya mutano fa ka tokwa ku silela.” Manzwi ao, a naa bulezwi ki caziba wa litaba ze ezahezi wa kwa Britain ya naa bizwa Edward Herbert, ili ya naa pilile mwa lilimo za ma-1600, a bonisa le liñwi la mabaka ha lu swanela ku swalelanga ba bañwi. Mi libaka leo ki la kuli kwapili ni luna lu ka tokwa ku kupa ba bañwi kuli ba lu swalele. (Mateu 7:12) Kono ku na ni libaka la butokwa hahulu ni ku fita ha lu swanela ku swalelanga ba bañwi. Ha mu bone manzwi a naa ñozi muapositola Paulusi kwa Makolose 3:13.—Mu bale.

Bakeñisa kuli kaufelaa luna ha lu si ka petahala, ka linako ze ñwi lu kana lwa nyemisa ba bañwi kamba ku ba foseza, mi ni bona ba kana ba eza nto ye swana ku luna. (Maroma 3:23) Lu kona cwañi ku zwelapili ku pilisana ka kozo ni batu ba ba si ka petahala sina luna? Ka ku susumezwa ki Mulimu, Paulusi u lu eleza kuli lu no tuhelelananga ni ku swalelana. Kelezo yeo ki ya butokwa kacenu sina feela mo ne i inezi ka nako ye ne i ñozwi, ili lilimo ze bato ba 2,000 kwamulaho ko. Ha lu nyakisiseñi manzwi a naa ñozi Paulusi ao.

“Mu zwelepili ku tuhelelana.” Manzwi ao a li, “mu zwelepili ku tuhelelana,” a toloka linzwi la Sigerike le li fa muhupulo wa ku sa nyema ka nako yeo mutu a na ni libaka la ku eza cwalo. Buka ye ñwi i bulela kuli Bakreste ba bonisanga kalemeno kao ka “ku itatela ku sa nyemela batu ba ba ezanga mafosisa kamba ba ba na ni mikwa ye nyemisa.” Manzwi a li, “ku tuhelelana” a lu bonisa kuli kezo yeo i swanela ku ezwa mwahalaa batu ba babeli. Fo ku talusa kuli, haiba lu hupula kuli ni luna lu na ni mikwa ye kona ku nyemisa ba bañwi, ha lu na ku tuhelela lika ze lu sa tabeli ku ba bañwi kuli li filikanye kozo ye mwahalaa luna ni bona. Kono ku cwañi haiba batu ba bañwi ba lu foseza?

“Mu zwelepili . . . ku swalelana ka pilu kaufela.” Ka ku ya ka caziba yo muñwi, linzwi la Sigerike le li tolokilwe kuli “mu swalelane ka pilu kaufela” “haki lona linzwi le li itusiswanga kwa ku toloka ku swalela . . . kono lona li na ni taluso ye ekezehile ye koñomeka mufuta wa swalelo ye ezwa ka sishemo.” Buka ye ñwi i bulela kuli linzwi leo li kona ku talusa “ku fa mutu nto ye mu tabisa, ku mu shemuba, ku mu tusa.” Lu bonisanga kuli lu na ni sishemo ka ku itatela ku swalela nihaikaba kuli lu na ni “libaka la ku tongoka yo muñwi.” Kono ki kabakalañi ha lu swanela ku itatela ku bonisa sishemo se si cwalo? Le liñwi la mabaka kikuli, ni luna hasamulaho lwa kona ku fosa mi lu kana lwa tokwa kuli mutu ya naa lu foselize ni yena a lu bonise sishemo ka ku lu swalela.

“Sina Jehova ha mi swalezi ka pilu kaufela, ni mina mu lukela ku eza cwalo.” Le ki lona libaka le lituna ka ku fitisisa ha lu swanela ku swalela ba bañwi ka pilu kaufela: kakuli Jehova Mulimu u lu swalelanga ka pilu kaufela. (Mika 7:18) Ha mu nahane feela sishemo se situna sa bonisanga Jehova kwa baezalibi ba ba bakile. Ka ku fapahana ni luna, Jehova ha ezangi sibi. Kono u itatelanga ku swalela baezalibi ba ba bakile ka ku tala niha ziba kuli yena haa na ku tokwa kuli baezalibi bao ba mu bonise sishemo ka ku mu swalela. Kaniti, Jehova u toma mutala o munde ka ku fitisisa wa ku swalela ka pilu kaufela baezalibi ba ba baka!

Sishemo sa Jehova si tahisa kuli lu sutelele ku yena mi si lu susueza ku tabela ku mu likanyisa. (Maefese 4:32–5:1) Lu ka eza hande ku ipuza kuli, ‘Ka ku ba kuli Jehova u ni bonisize sishemo se situna cwana ka ku ni swalela, ni ka hanelañi ku swalela mutu ya si ka petahala sina na, ya ni foselize, ili ya bakile ha buniti?’—Luka 17:3, 4.

Litaba za mwa Bibele ze akalelizwe ku baliwa mwa October

Magalata 1-6; Maefese 1-6; Mafilipi 1-4; Makolose 1-4; 1 Matesalonika 1-5; 2 Matesalonika 1-3; 1 Timotea 1-6–2 Timotea 1-4

[Manzwi a fa likepe 11]

Jehova u toma mutala o munde ka ku fitisisa wa ku swalela ka pilu kaufela baezalibi ba ba baka!