Mu ye kwa litaba za mwahali

Mu ye kwa litaba za mwahali

Kana Mwa Kona ku Sepa Bulapeli Mwa Litaba za Masheleñi?

Kana Mwa Kona ku Sepa Bulapeli Mwa Litaba za Masheleñi?

 Kana Mwa Kona ku Sepa Bulapeli Mwa Litaba za Masheleñi?

Bo Estelle * ne ba yanga kamita ni bana ba ba bona kwa keleke. Ba li: “Ne ni taluselize yo muñwi wa ba baluti ba keleke ya luna kuli ne ni bata ku ituta Bibele.” Kono naa si ka itatela ku ba luta. Kabakaleo, ba itulela ku yanga kwa keleke. Bo Estelle ba zwelapili ku bulela kuli: “Ba bahulu ba keleke, ne ba ni ñolezi liñolo le ne li bulela kuli haiba ne ni sa koni ku ya kwa keleke, ne ni sa kona ku lumelanga feela masheleñi. Na nahana kuli, ‘Batu ba, ha ba na taba ni kuli ni teñi kwa keleke kamba ha ni yo, kono ba bata feela masheleñi a ka.’”

Basali ba ba bizwa bo Angelina, ba se ba bile balapeli ka nako ye telele, ne ba bulezi kuli: “Mwa keleke ya luna, ne ba fitisanga liselo halaalu fo ne lu belanga ni sebelezo kaufela, mi ne ba batanga kuli lu beye mwateñi se si siñwi nako kaufela ye ne ba fitisanga liselo leo. Kamita ne ba batanga kuli lu zwise masheleñi. Naa ikutwa kuli, ‘Ha ba na moya wa Mulimu.’”

Kana bulapeli bo bu fumaneha mwa silalanda se mu pila ku sona, bu itusisanga linzila ze shutana-shutana za ku hapeleza batu ku zwisa masheleñi? Kana muezezo o cwalo wa lumelelana ni se i luta Bibele?

BIBELE I LUTAÑI?

Jesu yena ya naa kalisize Bukreste, naa bulezi kuli: “Mu filwe feela, ni mina mu fane feela.” (Mateu 10:8) Litaba za butokwa ze fumaneha mwa Bibele ha li konwi ku lekiwa ka masheleñi mi li swanela ku fiwa ku mañi ni mañi ya bata ku ituta zona.

Bakreste ba kwa makalelo, ne ba fumananga kai masheleñi a ku leka lika ze nee tokwahala mwa puteho?

Mañi ni mañi naa zwisanga nubu ka ku ya ka “mwa atulezi mwa pilu ya hae, isi ka lukokoto kamba ka ku hapelezwa, kakuli Mulimu u lata ya fana a tabile.” (2 Makorinte 9:7) Muapositola Paulusi naa bulezi kuli: “Ne lu beleka busihu ni musihali kuli lu si ke lwa fa yo muñwi wa ku mina mushimbo o buima ha ne lu kutaza taba ye nde ya Mulimu ku mina.” (1 Matesalonika 2:9) Paulusi naa ezanga musebezi wa ku luka litende, kuli a kone ku kutaza taba ye nde.—Likezo 18:2, 3.

LIPAKI ZA JEHOVA BA EZA CWAÑI MWA TABA YE?

Lipaki za Jehova hañata ba kopanelanga mwa miyaho ye sa tuli hahulu ye bizwa Mandu a Mubuso. Ba fumananga cwañi masheleñi a ku itusisa? Ha ba fitisangi mikeke ya koleko, kamba ku lumela batu maingilopu a ku kupelela masheleñi. Kono mañi ni mañi ya itumela kwa litukiso za Mulimu, wa kona ku itatela ku beya nubu ya hae mwa kakwakwati ka ka fumaneha mwa Ndu ya Mubuso.

Ku si na ku kakanya, ku tokwahala masheleñi kuli magazini ye i kone ku hatiswa ni ku lumelwa ko i tokwahala kaufela. Nihakulicwalo, Lipaki za Jehova ha ba fundotangi lika za lipisinisi kamba ku kupelela masheleñi kwa batu. Mulelo o mutuna wa magazini ye, ki wa kuli batu ba kone ku ituta niti ya mwa Bibele.

Mu bona cwañi: Kana nzila ye, ya ku fumana ka yona masheleñi a ku itusisa ya lumelelana ni manzwi a Jesu ni mutala wa Bakreste ba kwa makalelo?

[Litaluso za kwatasi]

^ para. 2 Mabizo a mañwi a mwa litaba ze a cincizwe.

[Manzwi a fa likepe 4]

Bulapeli bu swanela ku fumana cwañi masheleñi a ku itusisa?