LIKALABO KWA LIPUZO ZA BIBELE

Kana libi za luna za kona ku swalelwa?

Bibele i bonisa kuli batu kaufela ki baezalibi. Ne lu hozize mukwa wa ku ezanga sibi ku Adama, yena mutu wa pili. Kabakaleo, fokuñwi lwa ezanga lika ze maswe mi hamulaho mwendi lwa inyazanga. Jesu Kreste, yena Mwanaa Mulimu, naa lifezi libi za luna ka ku lu shwela. Sitabelo sa hae sa tiululo si konahalisa kuli libi za luna li swalelwe. Tiululo ki mpo ye zwa ku Mulimu.—Mu bale Maroma 3:23, 24.

Batu ba bañwi ba ezize libi ze tuna mi ba kakanyanga nji Mulimu wa kona ku ba swalela. Linzwi la Mulimu li li: “Mali a Jesu Mwanaa hae a lu kenisa kwa sibi kaufela.” (1 Joani 1:7) Jehova wa tabela ku swalela nihaiba libi ze tuna, haiba lu baka ku zwelela kwa pilu.—Mu bale Isaya 1:18.

Lu swanela ku ezañi kuli lu swalelwe?

Haiba lu bata kuli Jehova a lu swalele, lu tokwa ku ituta ka za hae, ili ku utwisisa linzila za hae, likelezo za hae, ni litaelo za hae. (Joani 17:3) Jehova wa swalelanga batu ba ba bakela mizamao ya bona ye maswe ni ba ba likanga ka taata ku cinca bupilo bwa bona.—Mu bale Likezo 3:19.

Mulimu ha koni ku palelwa ku lu shemuba. Jehova wa ziba bufokoli bwa luna. U sishemo mi u na ni musa. Kabakala kuli Mulimu u na ni sishemo, kana ha mu tabeli ku ituta ze ñata ka za mo mu kona ku mu tabiseza?—Mu bale Samu 103:13, 14.

Kuli mu bale litaba ze ñata ka za taba ye, mu bone kauhanyo 5 ya buka ye, Bibele i Lutañi Luli?, ili ye hatisizwe ki Lipaki za Jehova

[Siswaniso se si fa likepe 15]

Mulimu ha koni ku palelwa ku lu shemuba