Mu ye kwa litaba za mwahali

Mu ye kwa litaba za mwahali

Ki Kabakalañi Ha Lu Swanela ku Lapela ka Libizo la Jesu?

Ki Kabakalañi Ha Lu Swanela ku Lapela ka Libizo la Jesu?

 Ki Kabakalañi Ha Lu Swanela ku Lapela ka Libizo la Jesu?

JESU na lutanga batu mwa ku lapelela. Mwa miteñi ya hae ba bahulu ba bulapeli bwa Majuda ne ba lata hahulu ku lapelelanga “mwa mapatelo a munzi.” Ka mulelo mañi? “Kuli ba bonwe ki batu.” Kaniti luli ne ba bata ku iponahaza kwa batu kuli ki balapeli ba batuna. Buñata bwa bona ne ba lapelanga litapelo ze telele-telele ni ku kuta-kutela manzwi a swana, inge kuli mutu na tokwa ku “bulela hahulu” kuli tapelo ya hae i utwiwe. (Mateu 6:5-8) Jesu na talusize kuli litapelo ze cwalo li yanga fela mwa moya, ili ku bonisa ze ba tokwa ku tokolomoha batu ba ba na ni niti kuli litapelo za bona li alabiwe. Kono na si ka luta fela ze ba swanela ku tokolomoha batu ha ba lapela.

Jesu na lutile kuli ha lu lapela lu swanela ku bonisa kuli lwa bata kuli libizo la Mulimu li keniswe, Mubuso wa Hae u tahe, ni kuli tato ya Hae i ezwe. Jesu hape na bonisize kuli lwa kona ku lapela kuli Mulimu a lu tuse ku fumana lika za kwa mubili. (Mateu 6:9-13; Luka 11:2-4) Mwa liswanisezo za hae, Jesu na lutile kuli lu tokwa ku ba ni tundamo, tumelo, ni buikokobezo kuli litapelo za luna li alabiwe. (Luka 11:5-13; 18:1-14) Mi Jesu na tomezi batu mutala o munde kuli ba kone ku ituta ku yena.—Mateu 14:23; Mareka 1:35.

 Kaniti luli litaelo za Jesu ne li tusize balutiwa ba hae ku ziba hande mwa ku lapelela. Jesu na lutile balutiwa ba hae tuto ya butokwa ka za tapelo fa lizazi la hae la mafelelezo pili a si ka bulaiwa kale.

“Tuto Ye Nca ka za Tapelo”

Pili Jesu a si ka bulaiwa kale, na tandile nako ye ñata inze a susueza baapositola ba hae ba ba sepahala. Ka nako ye swanela yeo, a ba luta tuto ye nca. Jesu na ize: “Ki na nzila, ni niti, ni bupilo; ha ku na mutu ya ka taha ku Ndate, konji ka na.” Nako ye ñwi hape, Jesu na ba sepisize kuli: “Se mu ka kupa kaufela ka Libizo la ka, ni ka si eza, kuli Ndate a lumbwe ka Mwana. Ha mu kupa se siñwi ka Libizo la ka, ni ka si eza.” Pili a si ka ungula kale ngambolo ya hae, na ize: “Ku fitela cwale ha mu si ka kupa se siñwi ka Libizo la ka. Mu kupe mi mu ka fiwa, kuli tabo ya mina i be ye petehile.”—Joani 14:6, 13, 14; 16:24.

Ao ne li manzwi a butokwa hahulu. Hatiso ye ñwi i talusa kuli Jesu fo na luta “tuto ye nca ka za tapelo.” Jesu ha na bulela manzwi ao na sa talusi kuli lu swanela ku lapela ku yena isiñi ku Mulimu. Kono na bonisa nzila ye nca ya mwa ku lapelela ku Jehova Mulimu.

Ki niti kuli Mulimu na utwanga litapelo za batanga ba hae. (1 Samuele 1:9-19; Samu 65:2) Kono ku zwa fela Mulimu fa itamela bulikani bwa Mulao ni Maisilaele, batu kaufela ba ne ba bata kuli litapelo za bona li alabiwe ne ba swanela ku lumela kuli Isilaele ki sicaba sa Mulimu. Mi mwa miteñi ya Salumoni, ne ba swanela ku lumela kuli Mulimu na lukisize kuli litabelo li cisezwange fela kwa tempele. (Deuteronoma 9:29; 2 Makolonika 6:32, 33) Nihakulicwalo, batu ne ba si ke ba tokwiwa kuli ba cisange matabelo ku ya ku ile. Muapositola Paulusi na ñozi kuli Mulao o ne u filwe kwa Maisilaele ni matabelo a ne ba cisezanga kwa tempele ne li “muluti fela wa ze ne ka taha, isi mubili luli wa lika.” (Maheberu 10:1, 2) Lika zeo ne li si ke za tokwahala hape mulelo o ne li peta ha se u talelelizwe. (Makolose 2:17) Ku zwa fela ka 33 C.E., batu ne ba sa tokwi ku buluka Mulao wa Mushe kuli ba be ni silikani ni Jehova. Kono ne ba swanela ku kuteka Kreste Jesu, kona ko ne u ba libisa Mulao.—Joani 15:14-16; Magalata 3:24, 25.

“Libizo Le Li Fahalimw’a Mabizo Kamukana”

Jesu na lutile nto ya butokwa hahulu ye lu swanela ku eza ha lu lapela ku Jehova, ya ku lapela ka libizo la hae kuli litapelo za luna li alabiwe ki Mulimu. Ki sika mañi se si konisa Jesu ku peta musebezi o lu tusa wo?

 Kaufela luna lu baezalibi, kacwalo ni ko lu ka ikataza cwañi ni cwañi, ha lu koni ku feza sibi sa luna kamba ku ba balikani ba Mulimu wa luna ya kenile, Jehova. (Maroma 3:20, 24; Maheberu 1:3, 4) Kono Jesu na file bupilo bwa hae bo bu petehile sina sitabelo kuli a kone ku liulula batu kwa sibi. (Maroma 5:12, 18, 19) Kacwalo batu kaufela ba ba bata kuli libi za bona li swalelwe ki Jehova, ni kuli ba kone ku mu atumela ka ku lukuluha ba swanela ku ba ni tumelo mwa sitabelo sa Jesu ni ku lapela ka libizo la hae.—Maefese 3:11, 12.

Ha lu lapela ka libizo la Jesu, lu bonisa kuli lwa itebuha lika ze talu za peta ku likana ni tato ya Mulimu: (1) Ki “Ngunyan’a Mulimu,” ili yo sitabelo sa hae si tusa kuli libi za luna li swalelwe. (2) Jehova na mu zusize kwa bafu mi cwale sa li “muprisita yo mutuna” ya liulula batu. (3) Ki yena fela “nzila” i nosi ye lu kona ku atumela Jehova ka yona.—Joani 1:29; 14:6; Maheberu 4:14, 15.

Ku lapela ka libizo la Jesu ku bonisa kuli lwa mu kuteka. Likute le li cwalo la swanela bakeñisa kuli Jehova u bata kuli “ka Libizo la Jesu, mañwele kaufela a kubame . . . , mi malimi kamukana a bulele kuli Jesu Kreste ki Mulena, ibe kanya ku Mulimu Ndate.” (Mafilipi 2:10, 11) Kono mane sa butokwa ni ku fita kikuli ku lapela ka libizo la Jesu ku bubekisa Jehova, ya na file Mwan’a hae kuli lu kone ku fumana tuso.—Joani 3:16.

Bibele i itusisa malumbatina ni mabizo a shutana-shutana kuli lu kone ku utwisisa situlo se situna sa filwe Jesu. Malumbatina ni mabizo ao a lu tusa ku ziba lituso ze lu fumana bakeñisa za ezize Jesu, za sweli ku eza cwale, ni za ka lu ezeza kwapili. (Mu bone sikwenda se si li “Musebezi wa Butokwa wa Peta Jesu,” fa likepe 14) Kaniti luli Jesu u filwe “libizo le li fahalimw’a mabizo kamukana.” * M’ata kaufela a filwe yena mwa lihalimu ni fa lifasi-mubu.—Mafilipi 2:9; Mateu 28:18.

Mukwa O Swanelwa ku Ambukiwa

Ki niti, lu swanela ku lapela ka libizo la Jesu haiba lu bata kuli Jehova a utwe litapelo za luna. (Joani 14:13, 14) Kono lu swanela ku  tokolomoha mukwa wa ku kutelanga fela pulelo ya kuli “ka libizo la Jesu.” Ki kabakalañi ha lu tokwa ku ambuka mukwa wo?

Lu ngeni mutala wo. Mu kana mwa amuhela liñolo le li zwa ku mutu yo muñwi le li ungula ka manzwi a itusiswanga hahulu a li “wa mina.” Kana fo ku talusa kuli mutu yo wa iyakatwa mina luli, kamba u ezeza fela mulao kakuli mañolo kona mwa ungulelwanga cwalo? Kacwalo ha lu lapela, lu swanela ku itusisa hande libizo la Jesu, isi sina manzwi e ba itusisanga batu ha ba ungula mañolo. Ki niti kuli lu swanela ku ‘lapela ka ku sa lisela,’ kono hape lu swanela ku eza cwalo ‘ka pilu kaufela,’ isi ku ezeza fela mulao.—1 Matesalonika 5:17; Samu 119:145.

Mu kona ku eza cwañi kuli mu ambuke mukwa wa ku itusisanga fela pulelo ya kuli “ka libizo la Jesu” mu sa isi ni pilu kwateñi? Mu like ku yeya tulemeno to tunde twa Jesu. Mu like ku nahana lika za mi ezelize ni za tabela ku mi ezeza. Mu itebuhe ku Jehova mwa tapelo ni ku mu lumba kabakala nzila ye nde ya mwa itusiselize Mwan’a hae. Haiba mu eza cwalo, mu ka ba ni buikolwiso bwa kuli Mulimu u ka alaba litapelo za mina, ku likana ni mwa na bulelezi Jesu kuli: “Se mu ka kupa kaufela ku Ndate, u ka mi fa sona ka Libizo la ka.”—Joani 16:23.

[Litaluso za kwatasi]

^ para. 14 Hatiso ye ñwi (Expository Dictionary of New Testament Words) i bonisa kuli mwa Sigerike linzwi la “libizo” li kona ku talusa “sa li sona mutu kaufela, situlo, tulemeno, mayemo a hae, m’ata ni libubo la hae.”

[Manzwi a fa likepe 11]

Lu swanela ku lapela ka ‘pilu kaufela,’ isi ku ezeza fela mulao

[Mbokisi fa likepe 12]

MUSEBEZI WA BUTOKWA WA PETA JESU

Kuli mu utwisise hande musebezi wa peta Jesu, mu nyakisise malumbatina, manzwi, ni mabizo a itusisizwe ku yena.

Adama wa Mafelelezo. 1 Makorinte 15:45.

Amen.2 Makorinte 1:19, 20; Sinulo 3:14.

Emanuele.Mateu 1:23.

Kreste/Mesiya.Mateu 16:16; Joani 1:41.

Linzwi.Joani 1:1.

Mikaele, Nduna ya Mangeloi.1 Matesalonika 4:16; Juda 9.

Muapositola.—Maheberu 3:1.

Muatuli.Likezo 10:42.

Mubusi.Sinulo 11:15.

Muelezi.Isaya 9:6.

Mulena.Joani 13:13.

Mulen’a Bupilo.Likezo 3:15.

Mulena wa Kozo.Isaya 9:6.

Mulimu ya Mata.Isaya 9:6.

Mulisana Yo Munde. Joani 10:11.

Muluti.Joani 13:13.

Mupilisi.Luka 2:11.

Muprisita Yo Mutuna. Maheberu 4:14, 15.

Muyemeli.1 Timotea 2:5.

Muzamaisi.Mateu 23:10.

Mwan’a Mulimu.Joani 1:34.

Mwan’a Mutu.Mateu 8:20.

Ndate wa Kamita.Isaya 9:6.

Ngunyan’a Mulimu. Joani 1:29.

Paki Ye Sepahala.Sinulo 1:5.

Toho ya Keleke.Maefese 5:23.