Natani—Naa Yemezi Bulapeli bo bu Kenile ka Busepahali

Haki nto ye bunolo ku bulelela mutu ya na ni situlo se situna kuli u fosize ni kuli u swanela ku baka. Kana ne mu ka yo ambota mutu ya cwalo inze mu ziba kuli u bulaile mutu yo muñwi ilikuli bufosi bwa hae ka sibili bu si ke bwa zibahala?

Mulena Davida wa Isilaele naa bukile ni Bati-Sheba, mi Bati-Sheba a itwala. Kuli a pate sibi sa bona, Davida a bulaya muunaa Bati-Sheba mi a nga Bati-Sheba kuli a be musalaa hae. Davida naa zwezipili ku eza misebezi ya hae ya silena ka likweli ze ñata a sa buleleli mutu ufi kamba ufi ka za sibi sa hae. Kono Jehova naa si ka tuhelela sibi sa mulena yo. A luma mupolofita wa hae Natani kuli a yo ambota Davida ka za sibi se situna sa naa ezize.

Musebezi wo ne li o taata. Mu nge kuli ne li mina Natani. Bakeñisa kuli Natani naa sepahala ku Jehova mi naa lata ku kumalela milao ya Mulimu, a yo hupulisa Davida libi za naa ezize. Mupolofita yo naa ka kona cwañi ku eza nto yeo ni ku kolwisa Mulena Davida kuli naa tokwa ku baka?

MULUTI YA NA NI MASEME

Ha mu ipalele liñolo la 2 Samuele 12:1-25. Mu nge kuli ne li mina Natani ya naa bulelela Davida likande le: “Baana ba babeli ne ba yahile mwa munzi u li muñwi; yo muñwi ki muluwi, yo muñwi ki mubotana. Muluwi naa na ni lingu ni likomu ze ñata-nata. Mubotana naa si na se siñwi haisi ngunyana i li ñwi ye nyinyani, ye sihali, ya naa lekile, a i utile, i hulezi ku yena hamoho ni bana ba hae, inze ca lico za hae, i nwela mwa  komoki ya hae, i lobala mwa sifuba sa hae; ku yena inge mwanaa musizana. Kiha ku fita mwenyi ku muluwi; yena a si ka zotela ku nga kwa lingu za hae, ni kwa likomu za hae, nto ye lukisezwa muenyi ya fitile ku yena; a yo nga ngunyana ya mubotana, a i lukiseza mutu ya fitezi ku yena.”—2 Sam. 12:1-4.

Likande la Natani ne li halifisize Davida, mi Davida a li: “Ka Muñaa Bupilo Ya-Pila, mutu ya ezize cwalo u lukela ku shwa!” Natani cwale a bulela ka maata, a li: “Mutu yo, ki wena!” (2 Sam. 12:5-7) Davida naa banga mulisana, mi ku bonahala kuli naa lumela kuli likande leo ki la niti. Ku likana ni za bulela mutalusi yo muñwi wa litaba za mwa Bibele, mwendi Davida naa ikutwile cwalo kakuli Natani naa yanga ku yena ku yo ambolela batu ba ne ba ezwanga maswe ili ba ne ba si na mutusi. Ibe kuli manzwi ao ne li a niti kamba ku tokwa, Natani naa tokwa ku sepahala ku Mulimu ni ku ba ni bundume kuli a yo ambota mulena sina mwa naa ezelize.

Ha mu nahane ze ne tisize kuli Natani a ambole ni Davida ka mukwa wo. Haki nto ye bunolo ku tusa mutu ye lu utwana ni yena kuli a bone hande butata bwa li ku bona. Kaufelaa luna lu latanga ku fa mabaka a ku ikemela ha lu fosize. Kono likande la Natani ne li tisize kuli Davida a inyaze a sa lemuhi. Mulena naa iponezi hande kuli kezo ya naa talusize Natani ne i fosahalile hahulu. Davida ha sa nyazize kezo yeo, Natani a mu taluseza kuli likande leo ne li ama yena. Mi Davida a utwisisa butuna bwa sibi sa naa ezize. Nto yeo ya tahisa kuli ku mu bele bunolo ku amuhela kalimelo. Davida a itumelela kuli naa “shwauzi” Jehova kabakala kezo ya naa ezize ni Bati-Sheba mi a amuhela kalimelo ye ne mu swanela.—2 Sam. 12:9-14; Samu 51, manzwi a ñozwi fahalimu.

Lu kona ku itutañi kwa taba yeo? Mulelo wa muluti wa Bibele ki ku tusa bateelezi ba hae ku nahanisisa litaba ni ku utwisisa se si lukile ili bona. Natani naa kuteka Davida mi kabakaleo a ambola ni yena ka maseme. Natani naa ziba kuli Davida naa lata ku luka. Kabakaleo a itusisa likande la naa ziba kuli ne li ka susumeza mutu ya naa na ni kalemeno kao. Ni luna lwa kona ku tusa batu ku utwisisa mihupulo ya Jehova. Kamukwaufi? Ka ku ba susumeza ku itusisa zibo ya se si lukile ye ba na ni yona lu sa ba bonisi kuli lwa ba fita kamba kuli lu na ni swanelo ya ku ba bulelela za ku eza. Bibele ki yona ye lu bulelela se si lukile ni se si si ka luka, isiñi luna bañi.

Nto ye ne tusize hahulu Natani ku kalimela mulena ya maata ne li ku sepahala ku Mulimu. (2 Sam. 12:1) Haiba ni luna lu sepahala ku Mulimu, lu ka ba ni bundume bwa ku yemela likuka za Jehova ze lukile.

MUYEMELI WA BULAPELI BO BU KENILE

Ku bonahala kuli Natani ni Davida ne li balikani ba bande, kakuli mane Davida naa beile yo muñwi wa bana ba hae libizo la Natani. (1 Makol. 3:1, 5) Natani ha bulelwa lwa pili mwa Bibele, u inzi ni Davida. Kaufelaa bona ne ba lata Jehova. Ku bonahala kuli mulena naa sepile mihupulo ya Natani kakuli naa bulelezi mupolofita yo kuli naa lakaza ku yahela Jehova tempele. Davida naa ize: “Cwale, bona, na ni ikahezi ndu ya likota za sidare, kanti Aleka ya Mulimu i inzi mwa tende ya lisila. Natani a li ku mulena: Zamaya, u eze kaufela ze mwa pilu ya hao; kakuli Muñaa Bupilo u inzi ni wena.”—2 Sam. 7:2, 3.

Natani naa li mulapeli wa Jehova ya sepahala, mi kabakaleo naa lata ku yemela muhupulo wa Davida wa ku yaha tempele ya pili ya bulapeli bo bu kenile fa lifasi. Kono ka nako yeo, za naa bulezi Natani ne li muhupulo wa hae; ne si zona za naa bulezi Jehova kuli a li bulele. Ka bona busihu bo, Jehova a laela mupolofita wa hae kuli a yo bulelela Davida kuli ne si yena ya naa ka yaha tempele ya Jehova. Ne i ka yahiwa ki yo muñwi wa bana ba Davida. Kono Natani a bulela kuli Mulimu naa itama bulikani ni Davida bwa kuli lubona lwa hae ne lu ka “tiya ku ya ku ile.”—2 Sam. 7:4-16.

Muhupulo wa Natani ka za mutu ya naa ka yaha tempele ne u sa lumelelani ni tato ya Mulimu. Kono mupolofita yo ya naa ikokobeza naa si ka bilaela. A eza ka ku lumelelana ni mulelo wa Jehova. Natani naa tomile mutala o munde o lu swanela ku latelela ha lu kalimelwa ki Jehova.  Lwa ziba kuli Natani naa zwezipili ku shemubwa ki Mulimu bakeñisa mwa naa itusiselize yena hamulaho wa fo. Ku bonahala kuli Jehova naa susumelize Natani ni muboni Gadi ku laela Davida kuli a onga-onge baopeli ba 4,000 mwa sebelezo ya tempele.—1 Makol. 23:1-5; 2 Makol. 29:25.

MUYEMELI WA BULENA

Natani naa ziba kuli Salumoni ki yena ya naa ka yola Davida fa bulena. Kabakaleo Natani a nga muhato kapili muta Adonija naa likile ku nga lubona lwa Davida ha sa supezi. Natani hape naa ezize ka maseme ni ka busepahali. Pili a susueza Bati-Sheba kuli a hupulise Davida ka za sepiso ya hae ya kuli mwanaa bona Salumoni naa ka ba mulena. Mi cwale Natani ka sibili a ya ku Davida ku yo mu buza haiba naa ketile Adonija kuli a be mulena ya tatama. Davida ha sa lemuhile kuli taba yeo ne li ye tuna, a laela Natani ni batanga ba bañwi ba ba sepahala kuli ba yo toza Salumoni ni ku mu zibahaza kuli sa li mulena. Mulelo wa Adonija wa kuli a ipeye fa bulena wa pala.—1 Mal. 1:5-53.

MUÑOLI WA LITABA YA IKOKOBEZA

Batu ba lumela kuli Natani ni Gadi ki bona ba ne ba ñozi likauhanyo za 25 ku isa 31 za buka ya 1 Samuele ni buka mutumbi ya 2 Samuele. Lu bala cwana ka za libuka zeo ze tahile ka moya wa Mulimu: “Haili litaba za mulena Davida za ku kala ni za ku ungula, ki ze, li ñozwi mwa Litaba za muboni Samuele, ni mwa Litaba za mupolofita Natani, ni mwa Litaba za muboni Gadi.” (1 Makol. 29:29) Bibele hape i bulela kuli Natani naa ñozi ka za ‘litaba za Salumoni.’ (2 Makol. 9:29) Taba yeo i bonisa kuli Natani naa zwezipili ku sebeleza mwa ndu ya mulena hamulaho wa lifu la Davida.

Ku bonahala kuli buñata bwa litaba ze lu ziba ka za Natani ne li ñozwi ki yena ka sibili. Kono hape lwa kona ku ituta ze ñata ka za hae bakeñisa litaba za naa si ka ñola. Ku bonahala kuli Natani ne li muñoli wa litaba ya naa ikokobeza. Naa sa bati ku ipatela libubo. Buka ye ñwi ye talusa manzwi a mwa Bibele i bulela kuli litaba ze bulezwi mwa Bibele ka za hae ha li talusi za simuluho ya hae ni lubasi lwa hae. Ha ku na ze lu ziba ka za mupilelo wa Natani.

NAA LATA KU SEPAHALA KU JEHOVA

Kwa litaba ze nyinyani ze lu bala ka za Natani mwa Mañolo, lu ituta kuli naa latelezi linzila za Mulimu ka buikokobezo ni ka tukufalelo. Jehova Mulimu naa mu file musebezi o mutuna. Mu kengeyele tulemeno twa Natani, to tu cwale ka ku sepahala ku Mulimu ni ku lata likuka za Mulimu. Mu ikataze ku ba ni tulemeno to tu cwalo.

Mwendi mina ha mu na ku tokwa ku kalimela malena ba ba bukile kamba ku tibela batu ba ba bata ku tulula mulonga. Kono ka tuso ya Mulimu, mwa kona ku sepahala ku yena ni ku yemela likuka za hae ze lukile. Mi ni mina mwa kona ku ba muluti ya bundume ili ya na ni maseme ni muyemeli wa bulapeli bo bu kenile.

[Siswaniso se si fa likepe 25]

Natani naa ambozi ni Bati-Sheba ka maseme kakuli naa bata ku yemela bulena