Mu ye kwa litaba za mwahali

Mu ye kwa litaba za mwahali

Kana Mwa Tabelanga ku ba ni “Tohonolo ya ku Fana ka Sishemo”?

Kana Mwa Tabelanga ku ba ni “Tohonolo ya ku Fana ka Sishemo”?

 Kana Mwa Tabelanga ku ba ni “Tohonolo ya ku Fana ka Sishemo”?

BAKRESTE ba mwa Filipi ne ba zibahala ka moya wa ku lata ku fana kuli ba zwisezapili bulapeli bwa niti. Mwa liñolo la naa ba ñolezi Paulusi ka susumezo ya moya wa Mulimu, naa ize: “Ni itumela ku Mulimu wa ka, kamita ha ni mi hupula; ni mwa milapelo ya ka ye ni ezeza mina kamukana, ni nze ni mi lapelela ka tabo, kakuli mu kumalezi musebezi wa Evangeli, ku kala ka lizazi la pili, ku to fita ku la cwale.” (Mafil. 1:3-5) Paulusi naa hupula hande mo ne ku tahezi kuli Lidia ni ba ndu ya hae ba kolobezwe, ni moya wa naa bonisize Lidia ha naa tundamezi ku kupa Paulusi ni ba naa kutaza ni bona kuli ba ine mwa ndu ya hae.—Lik. 16:14, 15.

Ku si ka fita kale nako ye telele ku zwa fo, puteho ye ne sa zo tomwa mwa Filipi yeo, ne i lumezi habeli limpo ku Paulusi. Ka nako yeo Paulusi naa li ni balumeli ba mwa Tesalonika ka lisunda li sikai, ili muleneñi o bato eza likilomita ze 160 ku zwa mwa Filipi. (Mafil. 4:15, 16)  Hamulaho wa lilimonyana, mizwale ba mwa Filipi ni ba mwa Masedonia ba ne ba li mwa ñalelwa ni mwa ‘bubotana bo butuna,’ ba utwa za butokwi bwa Bakreste ba ne ba nyandiswa mwa Jerusalema, mi ba itakaleza ku ba tusa. Paulusi naa pakile kuli ne ba fanile “ku fita se ne ba kona.” Nihakulicwalo, naa ñozi kuli: “Ba tundamena ku lu kupa ka taata kuli ba fiwe tohonolo ya ku fana ka sishemo sa bona.”—2 Makor. 8:1-4, NW; Maro. 15:26.

Mafilipi ne ba sa bonisa moya wa bufani niha ne se ku fitile lilimo ze lishumi ku zwa fo ne ba bezi Bakreste. Ha ne ba utwile kuli Paulusi naa tamilwe mwa Roma, ba luma Epafrodite kuli a mu iseze lituso. Mi musipili wo, ne u eza likilomita ze 1,287 ka ku zamaya mwa linzila ni ku sila mawate. Mafilipi ne ba bata ku tusa Paulusi ilikuli a zwelepili ku tiisa mizwale ni ku kutaza, niha naa li mwa tolongo.—Mafil. 1:12-14; 2:25-30; 4:18.

Kacenu Bakreste ba niti ba bona kuli ki tohonolo ku tusa mwa musebezi wa ku kutaza ni ku luta batu ku ba balutiwa. (Mat. 28:19, 20) Ba tusa mwa musebezi wa Mubuso ka ku sebelisa nako ya bona, maata a bona, ni masheleñi a bona. Mbokisi ye zamaelela ni taba ye, i bonisa ze ñwi za linzila ze mu kona ku tusa ka zona mwa musebezi wo wa lu file Mulimu.

[Mbokisi fa makepe 22, 23]

Mo Ba Fanelanga Ba Bañwi

LINUBU ZA MUSEBEZI WA MWA LIFASI KAUFELA

Ba bañata ba bulukanga mali a ku beya mwa tumbokisi twa linubu to tu ñozwi kuli “Musebezi wa Mwa Lifasi Kaufela.”

Ka kweli ni kweli, liputeho li lumelanga mali ao kwa ofisi ya Lipaki za Jehova ye sebeleza liputeho zeo. Linubu za mali ze fiwa ka ku itatela hape za konwa ku lumelwa kwa Watch Tower Society, Attention Treasury, P. O. Box 33459, 10101 Lusaka, kamba kwa ofisi ya mutai ya Lipaki za Jehova ye sebeleza naha ya mina. (Linubu za ku itatela ze bulezwi kwatasi ni zona li swanelwa ku lumelwa kwa ofisi ya Lipaki za Jehova ye sebeleza naha ya mina.) Maceke aa lumelwa kwa keyala ye fahalimu a swanela ku bonisa kuli mali a ñozwi ao a fiwe “Watch Tower Society.” Lika ze pangilwe fa macwe a butokwa ni zona za kona ku fiwa sina nubu. Liñolo le li talusa ka bukuswani kuli lika zeo li filwe sina mpo li lukela ku zamaelela hamoho ni linubu zeo.

TUKISO YA LINUBU ZA TUMELELANO

Mwa kona ku kalima Watch Tower Bible and Tract Society of Pennsylvania mali, ilikuli a itusiswe mwa lifasi kaufela. Kono ha mu ka bata mali a mina mwa kona ku a kupa mi mu ka a kutisezwa.

MILELO YA KU FANA

Kwandaa ku fa linubu za mali, ku na ni mifelo ye miñwi ye tusa ku zwisezapili musebezi wa ku kutaza mwa lifasi kaufela. Mifelo yeo i kopanyeleza:

Insurance: Batu ba bañwi ba kona ku lukisa kuli hamulaho wa lifu la bona, mali e ne ba bulukisanga kwa likampani ze ñwi kamba mali a bona a penshini a fiwe Watch Tower Bible and Tract Society of Pennsylvania.

Liakaunti za Kwa Panga: Liakaunti za kwa panga, mapampili a bonisa mali a kalimilwe ki panga, kamba mali a penshini a bulukisanga mutu kwa panga, za konwa ku fiwa Watch Tower Bible and Tract Society of Pennsylvania kuli i itusise zona, kamba mutu wa kona ku lukisa kuli mali ao a fiwe Watch Tower Bible and Tract Society of Pennsylvania ha ka shwa, ili tukiso ya eza ka ku latelela milao ya panga yeo.

Ma-Stock ni Ma-Bond: Ma-stock ni ma-bond a konwa ku fiwa Watch Tower Bible and Tract Society of Pennsylvania sina mpo, kamba muñaa ona wa kona ku eza tukiso ya kuli a fiwe Watch Tower Bible and Tract Society of Pennsylvania ha ka timela.

Miyaho ni Ndao: Miyaho ni ndao ze konwa ku lekiswa za konwa ku fiwa sina mpo, mi haiba mufi u sa pila mwa miyaho yeo, wa kona ku zwelapili ku pila mwateñi ku fitela a shwa.

Gift Annuity: Gift annuity ki tukiso ya kona ku itusisa mutu ku fa mpo ya mali a mañata kwa kopano ye itusiswa ki Lipaki za Jehova kamba ku i fa lika ze ñwi ze kona ku tisa mali a mañata. Mi kabakala mpo yeo ya file, kopano i ka mu fanga mali e i lumelelani ni yena ka silimo ni silimo ku fitela a timela.

Ma-Will ni Ma-Trust: Tutu kamba mali za konwa ku fiwa Watch Tower Bible and Tract Society of Pennsylvania ka ku itusisa will ye ñozwi ka mulao (pampili ye bonisa mwa batela mutu kuli libyana za hae li abelwe ha sa shwile), kamba kwa konwa ku ezwa tumelelano ye ñwi (trust agreement) ye bonisa kuli Watch Tower Bible and Tract Society of Pennsylvania i fiwange se siñwi. Trust ye tusa kopano ya bulapeli i kona ku tahisa kuli ba ba ezize tumelelano yeo ba si ke ba telanga mitelo ye miñwi.

Sina ka mo i taluseza pulelo ya kuli “milelo ya ku fana,” linubu ze cwalo li tokwa kuli mufani a lele hande. Mu buze ofisi ya mutai ye sebeleza naha ya mina mu si ka itusisa kale tukiso ya linubu za tumelelano kamba tukiso ya milelo ya ku fana.