Mu ye kwa litaba za mwahali

Mu ye kwa litaba za mwahali

Ku Kutaleza mwa Musika

Ku Kutaleza mwa Musika

 Ku Kutaleza mwa Musika

MUAPOSITOLA PAULUSI ha na li mwa muleneñi wa Atene, na yanga kwa musika zazi ni zazi kuli a yo kutaleza taba ye nde ya Jesu kwateñi. (Lik. 17:17) Paulusi na ketile ku yo kutaleza kwa musika kakuli ki kona ko ne ba fumanehanga hahulu bayahi ba Atene.

Hamulaho wa lilimo ze bat’o ba 2,000 ku zwa fo, batu ba Jehova ba sa shaela lushango lwa Mubuso wa Mulimu mwa misika. Kabakalañi? Kakuli batu ba bañata ba fumanehanga kwateñi. Kacenu, musika u kona ku ba sibaka sa lintolo. Hamulaho wa ku kupa tumelezo ku muzamaisi kamba muñ’a sintolo, Lipaki ba bañwi ba itusisize tafule kuli ba yale fateñi libuka ze bulela za Bibele.

Ka mutala, kwa sibaka se siñwi sa lintolo kwa New Jersey, U.S.A., ne ku lukisizwe kuli ku yaliwe libuka ze bonisa mwa ku bulukela likuka ze ama lubasi. Ki sika mañi se ne si zwile mwa ku eza cwalo? Mwa lizazi li li liñwi fela, batu ne ba abezwi libuka ze 153 mwa lipuo ze silezi.

Musali yo muñwi ya na atumezi kwa tafule ya libuka na teelelize ka tokomelo kwa litaba za na sweli ku talusa Paki yo muñwi. Musali yo a lumela kuli ki kwa butokwa ku nahananga za Mulimu mwa bupilo bwa luna ni mwa lubasi lwa luna. Musali yo na ngile libuka ze latelela: Itute ku Muluti Yo Mutuna, Sinotolo kwa Tabo ya Lubasi, ni Questions Young People Ask—Answers That Work.

Ka nako ya musihali, munna yo muñwi a fita bukaufi ni tafule fo ne ku tantekilwe libuka ha na li a kene mwa sintolo se siñwi. A ndwendukela buka ya Young People Ask. Kaizeli ya na yemi kwa tafule a lemuha munna yo mwa na talimela libuka zeo. A mu buza kuli, “Kana ku na ni buka ye mu tabela?” Munna yo a lumela mi a supa buka ya Young People Ask. Kaizeli a mu fa  buka yeo, mi munna yo yena na otolozi kale lizoho la hae kuli a i amuhele. Munna yo a bulela kuli u na ni bana ba balalu. Ha ba nze ba zwelapili ku ambola, munna yo a li u ambolisananga ni bana ba hae hañwi ka sunda. Kwa bana ba hae, ba babeli ba bahulu ba sa nonoboka. Ha na nze a apaula buka yeo, a bulela kuli wa kona ku itusisa yona ka bunolo mwa lipuhisano ze ñwi za lubasi lwa hae. Kaizeli yo hape a mu bonisa ni buka ya Sinotolo kwa Tabo ya Lubasi ni ku mu kolwisa kuli yena ni musal’a hae ba ka fumana likelezo ze ka ba tusa ha ba eza likatulo ze ama lubasi lwa bona. Munna yo a itebuha muhupulo wo, a fa nubu, mi a lumela ku to potelwa ki Paki yo muñwi.

Lipaki bao ne ba ikutwile cwañi hamulaho wa ku yo kutaleza kwa sibaka sa lintolo? Kaizeli yo muñwi na ize: “Ne ni ikozi hahulu ku kutaza ka nzila yeo. Ne ku tabisize luli!” Kaizeli yo muñwi ni yena na ize: “Jehova u ize taba ye nde i ka bulelwa ku isa ko li yo felela lifasi. Kacenu mwa sikiliti sa Paramus se si li mwa New Jersey, taba ye nde i fitile batu ba lipuo ze shutana-shutana kwa lipilu. Ne ni tabezi hahulu ku kutaleza mwa sibaka sa lintolo. Kaufela ba ne ba ezize cwalo ni bona ne ba tabile. Ha ku na ni yo mukana ku luna ya na bata ku kutela kwa ndu lizazi ha ne li likezi.”

Kana mwa kona ku kutaza taba ye nde ka linzila ze shutana-shutana? Nzila ya butokwa ye lu kutazanga ka yona ki ya ku kutaza fa ndu ni ndu. (Lik. 20:20) Kono kana ne mu ka tabela ku kutaleza mwa musika kamba mwa sibaka sa lintolo?