“Ba Lipilu Ze Nde” Ba Amuhela Lushango

“Ba lipilu ze nde kaufela, ba lumela.”—LIKEZO 13:48, NW.

1, 2. Bakreste ba mwa miteñi ya baapositola ne ba ezizeñi ku likana ni bupolofita bwa Jesu bwa kuli taba ye nde i ka kutazwa mwa lifasi kaufela?

MWA buka ya Bibele ya Likezo ku na ni likande le linde le li talusa mo ne ba ezelize Bakreste ba mwa miteñi ya baapositola ku likana ni bupolofita bwa Jesu bwa kuli taba ye nde ya Mubuso i ka kutazwa mwa lifasi kaufela. (Mat. 24:14) Batu ba ne ba tukufalezwi ku kutaza ne ba tomezi mutala batu bañwi ba ne ba ka taha mwamulaho. Bakeñisa kuli balutiwa ba Jesu ne ba kutaza hahulu mwa Jerusalema, batu ba bañata ku beya cwalo ni “buñata bo butuna bwa baprisita,” ba kamuhela mwa puteho ya mwa miteñi yeo.—Lik. 2:41; 4:4; 6:7.

² Balumiwa ba mwa miteñi ya baapositola ne ba tusize batu ba bañata kuli ba lumele lituto za Sikreste. Ka mutala, Filipi, na tamile musipili ku liba kwa Samaria, mi batu bañata ba yo amuhela litaba za na yo ba ambota. (Lik. 8:5-8) Paulusi na faluzi mwa libaka ze ñata mi na zamayanga ni bakutazi ka yena ba ba fapahana-fapahana. Na kutalelize lushango lwa Sikreste kwa Sipera, kwa lilalo za Asia Minor, kwa Masedonia, kwa Greece, ni kwa Italia. Mi mwa litolopo za na kutalelize teñi, Majuda ni Magerike ba bañata b’a ba balumeli. (Lik. 14:1; 16:5; 17:4) Tite yena na izo kutaleza kwa Kreta. (Tite 1:5) Pitrosi na patehile ku kutaza mwa Babilona, mi ka nako ya na ñozi liñolo la hae la pili, ibata iba ka 62-64 C.E., musebezi wa Bakreste wa ku kutaza ne se u zibahala kwa Ponto, kwa Galatia, kwa Kapadosia, kwa Asia, ni kwa Bitinia. (1 Pit. 1:1; 5:13) Zeo ne li linako za ku beleka ka t’ata luli! Bakreste bao ne ba tukufalezwi hahulu ku kutaza kuli mane balwanisi ba bona ne ba ba tamilikelize kuli ne ba “filikanyize naha kaufela.”—Lik. 17:6; 28:22.

3. Ki sifi siselo se ba fumana bashaeli ba Mubuso kacenu mwa musebezi wa bona wa ku kutaza, mi mu ikutwa cwañi ka za taba yeo?

³ Ni mwa miteñi ya cwale, mwa puteho ya Sikreste ku bile ni kekezeho ye tuna hahulu. Ha mu balanga piho ya ka silimo ya mwa lifasi kaufela ya ze ba petile Lipaki za Jehova ni ku bona siselo sa mwa lifasi kamukana, kana ha mu bangi ba ba tabile? Kana ha mu tabi ku ziba kuli bashaeli ba Mubuso ba zamaisize lituto za Bibele ze 6,286,618 mwa silimo sa sebelezo sa 2007? Ku tuha fo, piho ya ba ne ba fumanehile kwa Kupuzo ya lifu la Jesu Kreste ñohola, i bonisa kuli batu ba ba bat’o kwana 10,000,000 be si Lipaki za Jehova ne ba bonisize kuli ba tabela taba ye nde mi ne ba fumanehile ku yona kezahalo ya butokwa yeo. Piho yeo i bonisa kuli ku sa na ni musebezi o mutuna wa ku eza.

4. Ki batu ba ba cwañi ba ba amuhela lushango lwa Mubuso?

⁴ Kacenu, sina fela mwa miteñi ya baapositola, batu “ba lipilu ze nde kaufela,” ba amuhela taba ye nde. (Lik. 13:48, NW) Jehova u kongela batu bao kaufela kwa kopano ya hae. (Mu bale Hagai 2:7.)  Lu swanela ku nga cwañi bukombwa bwa Sikreste ilikuli lu kone ku swalisana hahulu mwa musebezi wo wa ku kutula?

Mu Kutaze ku Mañi ni Mañi

5. Ki batu ba ba cwañi ba shemuba Jehova?

⁵ Bakreste ba mwa miteñi ya baapositola ne ba lemuhile kuli “Mulimu h’a yi ka ku keta batu; kono mwa sicaba ni sicaba, ya mu saba mi a eza se si lukile, u lumelelwa ki Yena.” (Lik. 10:34, 35) Batu ha ba bata ku ba ni silikani se sinde ni Jehova, ba swanela ku ba ni tumelo mwa sitabelo sa tiululo sa Jesu Kreste. (Joa. 3:16, 36) Mi tato ya Jehova kikuli “batu kamukana ba piliswe, mi ba fite fa zibo ya ku ziba niti.”—1 Tim. 2:3, 4.

6. Bashaeli ba Mubuso ba swanela ku ambukañi, mi ki kabakalañi?

⁶ Ne ku si ke kwa ba hande bashaeli ba taba ye nde ha ne ba ka keta batu ba ku ambota, ku ya ka mishobo ya bona, libubo la bona, ponahalo ya bona, keleke ko ba lapela, kamba lika ze ñwi ze tisa kuli ba shutane ni batu ba bañwi. Ha mu nahane fela taba ye ka nakonyana: Kana ha mu itebuhi kuli batu ba ne ba ikambotile ni mina lwa pili litaba za mwa Mañolo ne ba si ka mi ketulula? Ka ku swana, ni luna ha lu swaneli ku zina-zina ku shaela lushango lo lu pilisa kwa batu kaufela ba ba nyolelwa ku lu teeleza.—Mu bale Mateu 7:12.

7. Ki kabakalañi ha lu swanela ku ambuka ku atula batu be lu kutaza ku bona?

⁷ Jehova u ketile Jesu kuli a be muatuli; kacwalo, ha lu na tukelo ya ku atula mutu ufi kamba ufi. Taba ye ya swanela, kakuli—ka ku sa swana ni Jesu—luna lu kona fela ku atula ka ku ya “ka sobozi ya meto” a luna kamba ka ku ya ka “taba ya kutwi.”—Isa. 11:1-5; 2 Tim. 4:1.

8, 9. (a) Saule ne li mutu ya cwañi pili a si ka ba kale Mukreste? (b) Likande la ze ne ezahezi ku muapositola Paulusi li lu lutañi?

⁸ Ibata iba batu ba lisimuluho kaufela ba bile batanga ba Jehova. Mutala o munde hahulu ki wa Saule wa kwa Terese, ya na til’o ba muapositola Paulusi. Saule ya na li Mufalisi ne li munyandisi yo mutuna wa Bakreste. Bakeñisa kuli na na ni buikolwiso bwa kuli Bakreste ne si balapeli ba niti ba Jehova, a kala ku nyandisa puteho ya Sikreste. (Magal.1:13) Ka ku ya ka mibonelo ya batu, ha ku na ya na ka libelela kuli mutu ya cwalo na ka kona ku ba Mukreste. Kono Jesu na boni kuli pilu ya Saule ne li ye nde mi a mu noma kuli a pete musebezi wa butokwa. Kacwalo, Saule a ba yo muñwi wa batu ba ne ba sebeza ka t’ata ni ba ne ba na ni mafulofulo mwa puteho ya Sikreste ya kwa makalelo.

⁹ Likande la ze ne ezahezi ku muapositola Paulusi li lu lutañi? Mwa kalulo ya luna ya simu, mwendi ku na ni batu ba bañwi ba ba bonahala ku lwanisa hahulu lushango lo lu kutaza. Niha ku ka bonahala cwañi kuli ha ku na ni yo mukana ku bona ya kona ku ba Mukreste wa niti, ha lu swaneli ku lisela ku ikambotanga ni bona taba ye nde. Fokuñwi nihaiba bona batu be lu nga kuli ha ba tabeli, ba fitanga fa ku amuhela lushango lwa luna. Musebezi wa luna ki ku zwelapili fela ku kutaza kwa batu kaufela ‘lu sa liseli.’—Mu bale Likezo 5:42.

Ba Ba Kutaza ka ku ‘Sa Lisela’ Ba Ka Fiwa Limbuyoti

10. Ki kabakalañi ha lu sa swaneli ku lisela ku kutaza kwa batu ba ba kana ba bonahala ku sabisa? Mu kandeke mitala ya mwa sibaka sa mina.

¹⁰ Ponahalo ya batu ya kona ku puma. Ka mutala, Ignacio, * na kalile ku ituta Bibele ni Lipaki za Jehova inz’a li mwa tolongo mwa naha ye ñwi ya kwa Mboela wa America. Batu ne ba mu saba bakeñisa kuli ne li mutu wa mifilifili. Mi kacwalo, mapantiti ba ne ba panganga lika ni ku li lekisa ku ba bañwi ne ba kupanga Ignacio ku yo ba ngelanga likoloti za bona kwa batu ba ne ba liyehanga ku lifa. Kono Ignacio ha na nze a zwelapili ku ituta Bibele ni ku sebelisa za na ituta mwa bupilo bwa hae, munna yo ya na banga wa mifilifili a fita fa ku ba munna ya sishemo. Ha ku sa na ya mu kupanga kuli a yo mu ngela likoloti za hae, kono Ignacio u kozwi kuli litaba za mwa Bibele ni moya wa Mulimu li cincize butu bwa hae. Mi hape u sa itumela ni kwa bahasanyi  ba Mubuso ba ne ba si na saluluti ba ne ba ikatalize ku ituta ni yena.

11. Ki kabakalañi ha lu kutelanga kwa batu be ne lu ikambotile kale ni bona?

¹¹ Le liñwi la mabaka a tisanga kuli lu kutele kwa batu be ne lu ikambotile kale ni bona za taba ye nde ki la kuli miinelo ni mibonelo ya bona ya kona ku cinca, mi ya cincanga luli. Ku zwa fo lu ba potela lwa pili, batu ba bañwi mwendi ne ba lengilwe ki matuku a mutuna, ku zusiwa fa mubeleko, kamba ku shwelwa ki mutu ye ba lata hahulu. (Mu bale Muekelesia 9:11.) Lika ze maswe ze ezahala mwa lifasi li kona ku tiseza batu kuli ba nahane hahulu ka za bupilo bwa bona bwa kwapili. Lika zeo li kona ku tisa kuli mutu ya na sa tabeli, kamba ya na lu lwanisa kwa makalelo, a kone ku amuhela lushango. Kacwalo, ha lu swaneli ku lisela ku ikambota ni ba bañwi taba ye nde fo lu bela ni nako kaufela.

12. Lu swanela ku nga cwañi batu be lu kutaza ku bona, mi ki kabakalañi?

¹² Batu ba na ni mukwa wa ku ketahanyanga batu ni ku ba atula. Kono Jehova u bona mutu ni mutu mwa inezi luli. U bonanga mikwa ye minde ya mutu ni mutu. (Mu bale 1 Samuele 16:7.) Ni luna ha lu li mwa bukombwa lu swanela ku ba ni mubonelo o swana. Makande a mañata a ze ezahezi a bonisa siselo se sinde se si tisizwe ki ku nga hande batu kaufela be lu kutaza ku bona.

13, 14. (a) Ki kabakalañi paina yo muñwi ha na si ka iseza pilu musali ya na katani mwa bukombwa? (b) Likande le li lu luta nto mañi?

¹³ Sandra, kaizeli ya sebeza sina paina, na li mwa bukombwa bwa fa ndu ni ndu fa sooli se siñwi sa kwa Caribbean ha katana bo Ruth, ba ne ba li ba mikiti hahulu. Mi ba kile ba wina habeli mwa naha kaufela kwa mikiti yeo. Ne ba tabezi hahulu litaba ze ne ba bulezi bo Sandra, mi kacwalo ba lumelelana kuli ba ka itutanga Bibele hamoho. Bo Sandra ha ba iheta, ba li: “Ha ni kena mwa ndu ya bona, na bona siswaniso se situna sa bo Ruth inge ba apezi litino ze buheha za silena ni mushukwe ze ba fiwanga ba ba wina kwa mukiti, mi na bona ni mipuzo ye miñwi ye pazima ye ne ba winile. Mi ka mafosisa, mwa pilu ne ni nze ni nahana kuli mutu ya tumile hahulu cwana, ni wa mikiti hahulu, na si ke a tabela niti. Kacwalo, na lisela ku ba potelanga.”

¹⁴ Nakonyana hasamulaho, bo Ruth ba ya kwa Ndu ya Mubuso, mi mikopano ha se i felile, ba buza bo Sandra kuli, “Kiñi ha mu tuhezi ku tahanga ku to ituta ni na?” Bo Sandra ba kupa swalelo mi ba lumelelana kuli ba kalise hape ku no itutanga. Bo Ruth ba eza zwelopili ka bubebe, ba yumba maswaniso a bona a za mikiti, ba kalisa ku abananga mwa misebezi kaufela ya puteho, mi ba ineela bupilo bwa bona ku Jehova. Kaniti, bo Sandra hamulaho ne ba lemuhile kuli mubonelo wa bona wa pili ne u si ka luka.

15, 16. (a) Ki lika mañi ze ne ezahezi muhasanyi yo muñwi ha na kutalize ku wahabo yena? (b) Ki kabakalañi litumelo za bulapeli za bahabo luna ha li sa swaneli ku lu palelwisa ku kutaza ku bona?

¹⁵ Lipaki ba bañata ba bile ni siselo se sinde ka ku kutaza ku bahabo bona ba ba sa lumeli, niha ne ku bonahala kuli bahabo bona bao ne ba si ke ba amuhela lushango. Mu nge mutala wa Joyce, kaizeli wa Sikreste ya pila kwa United States. Bo mulamw’a bo Joyce ne li batu ba  litolongo ku kala fela inge ba sa li banana. Bo Joyce ba kandeka kuli, “Batu ne ba nga kuli [bo mulamu] ne ba si batu, bakeñisa kuli ne ba itusisa milyani ye kola, ne li masholi, mi ne ba ezize lika ze ñata ze maswe. Niha ne ku bonahala kuli ne ba si ke ba cinca mikwa ya bona, ne ni zwezipili ku ikambotanga ni bona litaba za Bibele ka lilimo ze 37.” Buikatazo bwa bo Joyce ni pilu-telele ya bona ya ku tusa mulamw’a bona yo, ne li konile ku tisa ze nde, kakuli hamulaho wa nako bo mulamw’a bona ne ba kalile ku ituta Bibele ni Lipaki za Jehova mi ne ba ezize licinceho ze tuna mwa bupilo bwa bona. Cwanoñu fa, bo mulamw’a bo Joyce ne ba kolobelizwe fa mukopano wa sikiliti o ne u bezi kwa California, U.S.A. mi ne se ba li ba lilimo ze 50. Bo Joyce ba li: “Ne ni lilile bakeñisa tabo. Ni tabile hahulu kuli ne ni si ka lisela ku itutanga ni bona!”

¹⁶ Mu kana mwa zina-zina ku ikambota litaba za mwa Bibele ni bahabo mina ba bañwi bakeñisa mo ba inezi. Kono bo Joyce ne ba si ka zina-zina ku kutaza ku bo mulamw’a bona. Ha ku na mutu luli ya kona ku ziba ze mwa pilu ya mutu yo muñwi. Mutu ye mu nahana kuli ha tabeli mwendi mane u sweli ku bata luli litaba za niti. Kacwalo, mu tuse mutu ya cwalo ku ziba litaba za bata.—Mu bale Liproverbia 3:27.

Buka Ye Nde Ya Lituto za Bibele

17, 18. (a) Lipiho ze futuka mwa lifasi li bonisañi ka za butokwa bwa buka ya Bibele I Lutañi Luli? (b) Ki lifi ze bonwi ze nde ze mu bile ni zona ka ku itusisa buka ye?

¹⁷ Lipiho ze futuka mwa linaha za lifasi li bonisa kuli batu ba bañata ba lipilu ze nde ba amuhela buka ya lituto ya Bibele I Lutañi Luli? Penni, kaizeli ya sebeza sina paina kwa United States, na kalisize lituto za ñata ka ku itusisa yona buka ye. Ze peli kwa lituto zeo na li zamaisa kwa batu ba bahulu ba ne ba li balapeli ba ba mafulofulo mwa likeleke za bona. Bo Penni ne ba sa zibi kuli batu bao ne ba ka nga cwañi litaba za mwa Mañolo ze talusizwe mwa buka ya Bibele I Lutañi? Kono ba ñola kuli, “Bakeñisa kuli litaba za mwa buka ye, li ñozwi ka muñolelo o utwahala hande mi ki litaba ze kuswani, batu bao ne ba lumezi kapili ze ne ba ituta kuli ne li yona niti, mi ne ba sa kanani kamba ku fela pilu.”

¹⁸ Pat, muhasanyi wa kwa Britain, na kalile ku ituta Bibele ni musali yo muñwi ya na balehile ku zwa kwa naha ye ñwi ya kwa Asia. Musali yo na tunuhile mwa naha ya habo, munn’a hae ni bana ba hae ha ne ba shimbilwe ki masole ba baipanguli, na si ka ba bona hape. Na bembilwe, mi lapa la hae ne li cisizwe, mi na swelwi likalala ki banna ba bañata ka ku tatamana. Kabakala lika ze kaufela, na batanga ku ipulaya kakuli na sa boni tuso ya na pilela. Kono tuto ya Bibele ne i mu file sepo. Bo Pat ba ñola kuli: “Mitalusezo ye bunolo ya litaba ni liswanisezo ze utwahala hande ze mwa buka ya Bibele I Lutañi?  ne li mu fitile hahulu kwa pilu.” Muituti yo na ezize zwelopili ka bubebe, a fita fa ku ba muhasanyi ya si ka kolobezwa, mi a kupa kuli ite a kolobezwe fa mukopano o no tatami. Kwa tabisa luli ku tusa batu ba ba tabela kuli ba utwisise ni ku itebuha sepo ya mwa Mañolo!

“Lu Si Ke Lwa Katala ku Eza Hande”

19. Ki kabakalañi musebezi wa ku kutaza ha u li wa ka putako?

¹⁹ Mo li pazulela lizazi, musebezi wa luna wa ku kutaza ni ku tahisa balutiwa u ba wa ka putako ni ku fita. Ka silimo ni silimo, batu ba bañata ba ba bata ku ituta za Mulimu ba amuhela lushango lo lu kutaza. Kono “lizazi la [Muñ’a] Bupilo le lituna li sutelezi,” mi fo ku talusa kuli batu kaufela ba ba sa li mwa lififi la kwa moya “ba ya kwa ku bulawa.”—Zef. 1:14; Liprov. 24:11.

20. Ki nto mañi ya swanela ku ikatulela ku eza mañi ni mañi wa luna?

²⁰ Niteni, lu sa kona ku tusa batu ba ba cwalo. Kono kuli lu eze cwalo, lu swanela ku likanyisa Bakreste ba mwa miteñi ya baapositola, ba ne ba ‘si ka lisela, ka mazazi kaufela, ku luta batu, ni ku bulela mwa Tempele ni mwa mandu kuli Jesu ki Kreste.’ (Lik. 5:42) Mu likanyise mutala wa bona ka ku itiisa mwa bukombwa ku si na taba ni matata, ka ku “luta ka bukwala,” ni ka ku kutaza kwa batu kaufela ku si na saluluti. “Lu si ke lwa katala ku eza hande,” kakuli haiba lu itiisa, Mulimu u ka lu kapweka limbuyoti ze ñata.—2 Tim. 4:2, NW; mu bale Magalata 6:9.

[Litaluso za kwatasi]

Mu Kona ku Alaba Cwañi?

• Ki batu ba ba cwañi ba ba amuhela taba ye nde?

• Ki kabakalañi ha lu sa swaneli ku atula batu be lu kutaza ku bona?

• Ki lifi ze zwa mwa ku itusisa buka ya Bibele I Lutañi Luli?

[Lipuzo za Tuto]

[Maswaniso a fa likepe 13]

Batu ba bañata ba lipilu ze nde ba sweli ku amuhela lushango

[Maswaniso a fa likepe 15]

Lu itutañi kwa licinceho za na ezize muapositola Paulusi?

[Siswaniso se si fa likepe 16]

Bashaeli ba taba ye nde ha ba atulangi batu