Mu ye kwa litaba za mwahali

Mu ye kwa litaba za mwahali

Mucaha Ya Fumile U Eza Keto Ye Maswe

Mucaha Ya Fumile U Eza Keto Ye Maswe

 Mucaha Ya Fumile U Eza Keto Ye Maswe

NE KU na ni mucaha ya n’a fumile ya n’a li mutu yo munde. Mucaha yo n’a latelela mulao mi n’a li mulapeli ya tiile. A taha ku Jesu, a to kubama ku yena ni ku mu kupa kuli: “Muluti, bunde bo ni ka eza ki bufi, kuli ni luwe bupilo bo bu sa feli?”

Jesu a mu alaba kuli n’a tokwa ku mamela milao ya Mulimu kuli a fumane bupilo bo bu sa feli. Mucaha yo ha n’a kupile Jesu kuli a mu bulelele sa n’a tokwa ku eza luli, Jesu a mu bulelela kuli: “U si ke wa bulaya; u si ke wa buka; u si ke wa uzwa; u si ke wa paka za buhata; kuteka ndat’aho ni m’aho, mi, u late wahenu mo u itatela.” Zeo ne li litaelo za butokwa hahulu ze n’e li mwa Mulao wa n’a filwe Mushe. Cwale mucaha yo a li: “Zeo kaufela ni li mamezi; ni sa tokwile nto mañi?”—Mateu 19:16-20.

Jesu “a mu lata” mi a li ku yena: “U sa tokwile ku eza nto i liñwi; u ye, u lekise s’o sweli kaufela, u si fe babotana, mi u ka ba ni bufumu kwa lihalimu; ha u felize zeo, taha, u ni latelele.”—Mareka 10:17-21.

Mucaha honafo fela n’a na ni ku eza katulo ye tuna ya n’a si ka libelela. Ki sifi sa n’a ka eza mucaha yo? Kana n’a ka itatela ku siya maluwo a hae kuli a latelele Jesu, kamba kana n’a ka zwelapili ku kumalela maluwo a hae? Kana n’a ka tundamena ku ikubukanyeza bufumu mwa lifasi, kamba kana n’a ka ikubukanyeza bufumu kwa lihalimu? Mwendi ne ku li t’ata ku yena ku keta sa ku eza. Kwa bonahala luli kuli mucaha y’o n’a lata Mulimu, kakuli n’a mamela Mulao mi n’a buzize Jesu za n’a swanela ku eza hape kuli a shemubiwe ki Mulimu. Mucaha yo n’a ezize katulo mañi? A “yelela a swabile hahulu; kakuli n’a sweli maluwo a matuna.”—Mareka 10:22.

Katulo ya mucaha yo ne li ye maswe. Kambe n’a ketile ku ba mulateleli wa Jesu ya sepahala, kambe n’a fumani sa n’a bata, ili bupilo bo bu sa feli. Ha lu si ka talusezwa ze ne ezahezi ku mucaha yo hamulaho. Kono se lu  ziba kikuli hamulaho wa lilimo ze bat’o ba 40, mpi ya Maroma ne i til’o sinya Jerusalema ni kalulo ye tuna ya Judea. Majuda ba bañata ne ba sinyehezwi ki maluo a bona mi ne ba bulailwe.

Ka ku sa swana ni mucaha ya n’a fumile yani, muapositola Pitrosi ni balutiwa ba bañwi bona ne ba ezize keto ye nde. Ne ba “tuhezi linto kaufela” mi ba latelela Jesu. Katulo ye ne ba ezize yeo ne i ba tusize luli. Jesu n’a ba bulelezi kuli ne ba ka amuhela linto ze ñata ku fita ze ne ba siile. Mi hape ne ba ka yola sanda sa bupilo bo bu sa feli. Ne ba ezize katulo ye nde mi ne ba si ka inyaza hamulaho.—Mateu 19:27-29.

Kaufela luna lwa ezanga likatulo, ibe kuli ki ze nyinyani kamba ki ze tuna. Ki kelezo mañi ya n’a file Jesu ka za likatulo zeo? Kana mu ka latelela kelezo ya hae? Haiba mu latelela kelezo yeo, mu ka fumana mupuzo o mutuna luli. Cwale ha lu nyakisiseñi mo lu kona ku latelela Jesu ilikuli lu tusiwe ki za n’a bulezi.