Mu ye kwa litaba za mwahali

Mu ye kwa litaba za mwahali

Lipuzo Ze Zwa kwa Babali

Lipuzo Ze Zwa kwa Babali

 Lipuzo Ze Zwa kwa Babali

Jesu n’a talusañi ha n’a bulezi kuli mutang’a hae ya sepahala n’a ka ba ni “kutwisiso”?

Jesu n’a buzize puzo ye li: “Ki mañi mutanga ya sepahala, ya na ni kutwisiso, y’a ka beya Mulen’a hae ku lisa batanga ba hae, ku ba fa lico ka nako ye lukela?” (Mateu 24:45) “Mutanga” yo ya sula “lico” za kwa moya ki puteho ya Bakreste ba ba tozizwe ka moya. Ki kabakalañi Jesu ha n’a bulezi kuli mutanga yo u na ni kutwisiso? *

Za n’a lutile Jesu li kona ku lu tusa ku utwisisa hande za n’a talusa ha n’a bulezi za linzwi la “kutwisiso.” Ka mutala, Jesu ha n’a bulezi za “mutanga ya sepahala, ya na ni kutwisiso,” n’a kandekile za nguli ya basizana ba ba lishumi ba ne ba libelela munyali. Basizana ba ba lishumi ba lu hupulisa Bakreste ba ba tozizwe ba ne ba li teñi pili silimo sa 1914 si si ka fita kale ili ba ne ba libelela ka tukufalelo Munyali yo mutuna, yena Jesu Kreste. Basizana baketalizoho ku bona ne ba si na mafula a likani mwa malambi a bona ka nako ya fita munyali, kacwalo ne ba si ka kena mwa mukiti wa linyalo. Kono ba bañwi baketalizoho bona ne li ba ba butali kamba ba ba na ni kutwisiso. Ne ba itekezi mafula a mañata ilikuli malambi a bona a zwelepili ku tuka munyali ha fita, mi ne ba lumelelizwe ku kena mwa mukiti wa linyalo.—Mateu 25:10-12.

Jesu ha n’a filwe m’ata a Mubuso ka 1914, Bakreste ba ba tozizwe ba bañata ne ba libelela kuli ne ba ka ya kwa lihalimu hona fo fela kuli ba yo busa ni yena. Kono ne ba sa na ni musebezi o mutuna fa lifasi o ne ba sa swanela ku peta, mi ba bañwi ku bona ne ba si ka itukiseza ku peta musebezi wo. Ka ku swana ni basizana ba likuba, Bakreste bao ne ba si ka itiisa kwa moya, kacwalo ne ba si ka itukiseza ku zwelapili ku benyisa liseli. Kono ba bañata ne ba bile ni kutwisiso, kakuli ne ba bile ni butali mi ne ba bonezi cimo lika, mi kacwalo ne ba tiile kwa moya. Ha ne ba utwile kuli ne ba sa na ni musebezi o mutuna o ne ba swanela ku peta, ba itukiseza ku peta musebezi wo ka tabo. Kacwalo ne ba konile ku ba yena “mutanga ya sepahala, ya na ni kutwisiso.”

Hape ha lu nyakisiseñi linzwi la kutwisiso kamba ngana ka mwa n’a itusiselize lona Jesu kwa Mateu 7:24. Jesu n’a bulezi kuli: “Mutu kaufela ya utwa manzwi a ka ao, mi a ya ka ona, ni ka mu likanyisa ni munna ya na ni ngana [kamba kutwisiso], ya yahile ndu ya hae fa licwe.” Munna ya na ni kutwisiso yo n’a yahile ndu ya hae fa licwe ilikuli ha ku ka taha liñungwa ndu yeo i si ke ya wa. Kono munna ya n’a si na kutwisiso yena n’a yahile ndu ya hae fa mushabati mi ndu yeo ya sinyiwa ki liñungwa. Kacwalo mulateleli wa Jesu u swanela ku ba ni kutwisiso kamba ngana ya ku zibela cimo kuli ku latelela butali bwa batu ku libisa kwa kozi. Bakeñisa kuli u na ni temuho ni butali, u toma tumelo ya hae, likezo za hae ni lituto za hae ku za n’a lutile Jesu. “Mutanga ya sepahala, ya na ni kutwisiso” ni yena u cwalo.

Ha mu bone hape mo li itusiselizwe linzwi la “kutwisiso” mwa litimana ze ñata za Mañolo a Siheberu. Ka mutala, Faro n’a ketile Josefa kuli a kubukanye lico za naha ya Egepita. Yeo ne li nzila ya n’a itusisize Jehova ku fa lico kwa batu ba hae. Ki kabakalañi Josefa ha n’a ketilwe? Faro n’a bulelezi Josefa libaka la n’a mu ketezi, a li: ‘Ha ku na mutu ya ka utwisisa, ya butali sina wena.’ (Genese 41:33-39; 45:5) Ka ku swana, Bibele i bulela kuli Abigaili; “n’a na ni kutwisiso hahulu.” N’a file lico mutoziwa wa Jehova yena Davida ni ba n’a zamaya ni bona. (1 Samuele 25:3, 11, 18) Josefa ni Abigaili ne ba na ni kutwisiso kakuli ne ba lemuhile tato ya Mulimu, ne ba bonezi cimo lika mi ne ba ezize lika ka butali.

Kacwalo Jesu ha n’a bulezi kuli mutanga ya sepahala u ka ba ni kutwisiso, n’a bonisa kuli mutanga ya sepahala u na ni temuho, u bonela cimo lika mi u na ni butali kakuli tumelo ya hae, likezo za hae, ni lituto za hae li tomile fa linzwi la Mulimu la niti.

[Litaluso za kwatasi]

^ para. 3 Linzwi la “kutwisiso” li tolokilwe fa linzwi la Sigerike la phroʹni·mos. Buka ye bizwa Word Studies in the New Testament, ye ñozwi ki M. R. Vincent i talusa kuli linzwi la kutwisiso hañata li amanga kwa ku ba ni butali ni ngana.