Mu ye kwa litaba za mwahali

Mu ye kwa litaba za mwahali

Ku Luta Ba Bañwi Bibele ku Tiisa Tumelo

Ku Luta Ba Bañwi Bibele ku Tiisa Tumelo

 Ku Luta Ba Bañwi Bibele ku Tiisa Tumelo

FA MUKITI wa ku feza Sikolo sa Bibele sa Giliadi sa bu-122, muzwale ya n’a yemela sitopa se n’a bulezi cwana: “Lu bile ni tohonolo ye tuna luli ya ku tanda likweli ze ketalizoho ze felile inze lu teeleza ku Mubupi wa luna ni ku ituta ku nga lika mwa li ngela!” Lizazi la March 10, 2007, li ka hupulwanga hahulu ki baituti ba 56, ba ne ba tuha ba kalisa musebezi wa bulumiwa mwa linaha ze 26.

Hamulaho wa ku amuhela baputehi ba 6,205, bo Theodore Jaracz, ba mwa Sitopa Se Si Etelela ba li: “Lu sepa kuli mina kaufela, hamulaho wa ku fumaneha kwa mukiti wo wa ku feza sikolo sa Giliadi, mu ka tiya kwa moya ni ku tiiseza mwa tumelo.” Ku tuha f’o, bo Jaracz ba kala ku mema babuleli ba bane, ba ne ba file lingambolo ze tomile fa Mañolo za ku susueza ni ku eleza baituti kuli ba kondise mwa musebezi wa bona wa bulumiwa.

Baituti Ba Susuezwa ku Tusa Ba Bañwi ku Ba ni Tumelo

Bo Leon Weaver, ba mwa Katengo ka Mutai wa United States, ne ba file ngambolo ye li: “Mu Zwelepili Ku Eza Hande.” Ne ba hupulisize baituti kuli mañi ni mañi wa ku bona n’a tandile lilimo ze 13 mwa sebelezo ya nako kaufela, inze ba luta ba bañwi Bibele ni ku tiisa tumelo ya bona. Ba li: “Wo ki musebezi o munde kakuli u pilisa batu, mi sa butokwa ni ku fita kikuli, musebezi wo u bubeka Ndat’a luna wa kwa lihalimu, Jehova.” Muzwale Weaver kihona cwale a susueza baituti kuli ba zwelepili ku “calela Moya” ni kuli ba si ke ba “katala ku eza hande.”—Magalata 6:8, 9.

Bo David Splane, ba mwa Sitopa Se Si Etelela, ne ba hupulisize baituti litaba za butokwa mwa ngambolo ya bona ye li: “Mu Eze Hande Kwa Makalelo.” Muzwale Splane a susueza balumiwa ba banca kuli ba eze hande kwa makalelo a musebezi wa bona wa bulumiwa ka ku ba taluseza lisupo ze latelela: “Mu be ni tabo. Mu si ke mwa ba ni kayeye mwa lika. Mu be ni silikani. Mu ambuke moya wa ku nyaza-nyaza ba bañwi. Mu ikokobeze, mi mu kuteke mizwale be mu ka yo pila ni bona.” Muzwale Splane kihona a ekeza kuli: “Ha mu ka yo tuluka mwa fulayi, haike Jehova a fuyole mahutu a mina a mande ha nz’a tisa ‘taba ye nde’ kwa batu.”—Isaya 52:7.

Bo muluti ba kwa Giliadi bo Lawrence Bowen ne ba file ngambolo ye li: “Mu Filwe  Sanda Sa Niti.” Muzwale Bowen n’a hupulisize baituti kuli Sikolo sa Giliadi ha si kalisa ka nako ya Ndwa ya Lifasi ya Bubeli, ne ku na ni sepo ye tiile ya kuli Linzwi la Jehova la bupolofita li ka talelezwa. (Maheberu 11:1; Sinulo 17:8) Ku zwelela kwa makalelo, Sikolo sa Giliadi si tusize baituti kuli ba tiise tumelo ya bona. Tumelo ye tiile i susueza baituti kuli ni bona ba ye, ba shaele niti ka tukufalelo.

Baluti ba bañwi ba kwa Giliadi, bo Mark Noumair, ni bona ne ba file ngambolo ye susueza ye li: “Mu Swana ni Mutu Yo Muñwi.” Ba fa mutala wa mupolofita Elisha, ya n’a petile musebezi wa hae ka tumelo ni bundume. Ka ku itusisa manzwi a  kwa 1 Malena 19:21, Muzwale Noumair a li: “Elisha n’a itukiselize ku eza licinceho mwa bupilo bwa hae, n’a beile tato ya hae mwa sibaka sa bubeli, mi a shaela za Jehova.” A babaza baituti kuli ba bonisize moya o swana, mi a ba susueza kuli ba zwelepili ku eza cwalo ko ba ka yo sebeleza kaufela.

Tumelo I Fa Tukuluho ya ku Bulela

Baituti ne ba tiisa tumelo ya bona ka nako ye ne ba li kwa sikolo, mi hape kwa mafelelezo a sunda ni sunda, ne ba kutazanga taba ye nde ku ba bañwi. Baituti ne ba kandekile litaba ze tabisa ze ne ba katananga mwa simu, mi ne ba ezize liponiso za litaba zeo mwa ngambolo ye ne filwe ki bo Wallace Liverance, ba bañwi ba baluti ba kwa Giliadi. Ngambolo ye ne ba file ye li: “Lu Lumezi, Mi Kifo Lwa Bulela,” ne i tomile fa manzwi a muapositola Paulusi a kwa 2 Makorinte 4:13.

Ha ku zwa ngambolo yeo, bo Daniel Barnes ni bo Charles Woody, ba lubasi lwa Betele, ne ba bile ni lipuhisano ni ba ba sebeza sina balumiwa cwale, ni ba bañwi ba ne ba banga balumiwa kwamulaho. Mizwale ba, ne ba talusize kuli Jehova wa babalela ni ku fuyaula batu ba ba mu sebeleza ka ku sepahala. (Liproverbia 10:22; 1 Pitrosi 5:7) Mulumiwa yo muñwi n’a bulezi kuli: “Ka lituto ze ne lu lutilwe kwa Giliadi, na ni bomusal’a ka ne lu iponezi hande kuli Jehova wa babalela. Lituto ze luli ne li tiisize tumelo ya luna. Batanga ba Mulimu kaufela, mane ni balumiwa, ba tokwa ku ba ni tumelo, kakuli ba ka kopana ni litiko, matata, mane ni lipilaelo.”

Mu Zwelepili ku Luta Ba Bañwi Bibele Kuli Ba Tiye mwa Tumelo

Bo Samuel Herd, ba mwa Sitopa Se Si Etelela, ne ba file ngambolo ye swanela ya ku ungula mukiti wa Giliadi, ye li: “Mu Zwelepili ku Tiisa Mizwale Ba Mina.” Bo Herd ne ba bulezi cwana ha ne ba talusa mulelo wa lituto ze ne filwe baituti kwa Giliadi: “Mulelo wa lituto ze mu filwe ki ku mi luta mwa ku itusiseza lilimi la mina kwa ku lumbeka Jehova, ku luta niti ya Jehova kwa batu ba ba pila kwa sibaka ko mu ka yo sebeleza, ni ku tiisa mizwale ba mina.” Kono ne ba hupulisize baituti kuli lilimi hape li kona ku bulela litaba ze sa yahisi. (Liproverbia 18:21; Jakobo 3:8-10) Ne ba susuelize baituti kuli ba likanyise Jesu mwa n’a itusiselize lilimi la hae. Muta o muñwi balutiwa ba man’o teeleza ku Jesu, ba li: “Ha lu li, lipilu za luna ne li tuka mwa lifuba za luna, ha n’a . . . lu taluseza Mañolo?” (Luka 24:32) Muzwale Herd a li: “Haiba mu bulela litaba ze tiisa, mu ka susueza mizwale ni likaizeli ko mu ka yo sebeleza.”

Ku tuha f’o, baituti ba fiwa mapampili a ku feza sikolo. Kihona ku baliwa liñolo le ne ba ñozi baituti la ku itumela. Liñolo leo ne li bala cwana: “Lu ka bata ku itusisa ze lu itutile ha lu nze lu peta ka busepahali misebezi ya luna ya bulumiwa. Lu itatela ku ya kwa mafelelezo a lifasi, mi lu sepa kuli musebezi wa luna u ka tisa tumbo ku Muluti wa luna Ya Pahami, yena Jehova Mulimu.” Baputehi ba fitisa buitumelo bwa bona ka ku kwashela. Kaniti luli, mukiti wa ku feza sikolo sa Giliadi ne u tiisize tumelo ya bote ba ne ba fumanehile teñi.

[Manzwi a fa likepe 17]

“Haiba mu bulela litaba ze tiisa, mu ka susueza mizwale ni likaizeli ko mu ka yo sebeleza”

[Mbokisi fa likepe 15]

LITABA KA ZA SITOPA

Palo ya linaha ko ba zwa baituti: 9

Palo ya linaha ko ba lumezwi: 26

Palo ya baituti: 56

Avareji ya lilimo za ku pepwa: 33.4

Avareji ya lilimo za ku ba mwa niti: 16.8

Avareji ya lilimo za ku ba mwa bukombwa bwa ka nako kaufela: 13

[Siswaniso se si fa likepe 16]

Sitopa Sa bu-122 Se Si Feza kwa Sikolo sa Giliadi sa Bibele

Fa mukoloko o kwatasi, milaini i baliwa ku zwa kwapili ku kuta kwamulaho, mi mabizo a kolohanyizwe ku zwa kwa nzohoto ku ya kwa silyo mwa mulaini o muñwi ni o muñwi.

(1) Howitt, R.; Smith, P.; Martinez, A.; Pozzobon, S.; Kitamura, Y.; Laud, C. (2) Fiedler, I.; Beasley, K.; Matkovich, C.; Bell, D.; Lippincott, W. (3) Sites, W.; Andersen, A.; Toevs, L.; Fusano, G.; Rodríguez, C.; Yoo, J. (4) Sobomehin, M.; Thomas, L.; Gasson, S.; Dauba, V.; Bertaud, A; Winn C.; Dobrowolski, M. (5) Yoo, J.; Dauba, J.; Mixer, H.; Newton, M.; Rodríguez, F.; Mixer, N. (6) Laud, M.; Lippincott, K.; Martinez, R; Haub, A.; Schamp, R.; Pozzobon, L.; Toevs, S. (7) Howitt, S.; Kitamura, U.; Newton, D.; Haub, J.; Sites, J.; Thomas, D. (8) Sobomehin, L.; Matkovich, J.; Fusano, B.; Winn, J.; Schamp, J.; Andersen, D.; Dobrowolski, J. (9) Fiedler, P.; Bell, E.; Beasley, B.; Smith, B.; Bertaud, P.; Gasson, M.