Mu ye kwa litaba za mwahali

Mu ye kwa litaba za mwahali

Lipuzo Ze Zwa kwa Babali

Lipuzo Ze Zwa kwa Babali

 Lipuzo Ze Zwa kwa Babali

Lu kona ku utwisisa cwañi manzwi a Paulusi a kuli mbelwa u lukela ku ba “ya n’a nyezwi ki munna a li muñwi fela” ilikuli a tusiwe ki puteho ya Sikreste?—1 Timotea 5:9.

Bakeñisa kuli muapositola Paulusi na bulela ka za mbelwa yo muñwi, pulelo ya kuli musali “ya n’a nyezwi ki munna a li muñwi fela” i lukela ku ba ye ama luli yena musali yo pili a si ka siyamenwa kale. Kana fo ku talusa kuli mbelwa yo u lukela ku ba ya n’a nyezwi fela hañwi? Kamba kana Paulusi hape n’a talusa nto ye ñwi? *

Batu ba bañwi ba akalelize kuli Paulusi n’a bulela za limbelwa ba ne ba nyezwi fela hañwi. Kwa utwahala kuli mwa lizo ni libaka ze ñata, mbelwa ya n’a sa nyalwangi n’a kutekiwanga hahulu. Kono mubonelo o cwalo ha u lumelelani ni za n’a ñozi Paulusi mwa mañolo a hae a mañwi. Ka mutala, kwa Bakreste ba kwa Korinte, n’a talusize hande kuli nihaike n’a bona kuli mbelwa n’a ka taba ha n’a ka zwelapili mwa bukwasha, “u lukuluzwi, u ka nyalwa ki ye a lata; fela ibe ku Mulena.” (1 Makorinte 7:39, 40; Maroma 7:2, 3) Mwa liñolo la n’a ñolezi Timotea, Paulusi n’a ekelize kuli: “Lu lata kuli limbelwa za likalibe li nyalwe.” (1 Timotea 5:14) Kacwalo mbelwa n’a si ke a nyaziwa ha n’a ka ikatulela ku nyalwa hape.

Kacwalo lu kona ku utwisisa cwañi manzwi a Paulusi a n’a ñolezi Timotea? Pulelo ya kuli musali “ya n’a nyezwi ki munna a li muñwi fela” i fumaneha fela mwa timana ye. Mwa puo ya Sigerike, pulelo yeo luli i talusa “musali wa munna a li muñwi.” Mi pulelo yeo i swana ni ya n’a itusisize Paulusi mwa mañolo a hae, ili ya “munna wa musali a li muñwi.” (1 Timotea 3:2, 12; Tite 1:6) Paulusi n’a itusisize pulelo ya bubeli ha n’a kolohanya ze konisa za maeluda ba Sikreste ni batanga ba bukombwa. Mwa taba yeo kaufela, pulelo yeo sihulu i talusa kuli munna ya nyezi kuli a fite fa ku ba eluda mwa puteho, u lukela ku ba ya sepahala ku musal’a hae ni ku ba ya sa nyazahali. * Kacwalo pulelo ye kwa 1 Timotea 5:9 ni yona i talusa nto ye swana: Kuli mbelwa a tusiwe ki puteho, u lukela ku ba musali ya n’a sepahala ku munn’a hae ha n’a sa pila mi u lukela ku ba ya sa nyazahali. Ze ñwi hape za n’a kolohanyize Paulusi ze ne tokwahala kuli mbelwa a tusiwe ki puteho ni zona kaufela li supa ku yena mbelwa ya cwalo.—1 Timotea 5:10.

[Litaluso za kwatasi]

^ para. 3 Mukwa o ne ba banga ni ona basali wa ku nyalwa kwa banna ba bañata ka nako ye swana ne u sa lumelezwi ki Magerike ni Maroma ba mwa nako ya Muapositola Paulusi. Kacwalo Paulusi ha n’a ñolela Timotea, n’a sa talusi mukwa wo kamba ku nyaza mutu ya n’a ezanga cwalo.

^ para. 5 Haiba mu bata litaba ze ñwi, mu bone Tora ya ku Libelela ya November 1, 1996, likepe 13, ni “Lipuzo Ze Zwa kwa Babali” mwa The Watchtower ya September 15, 1980, likepe 31.