Mu ye kwa litaba za mwahali

Mu ye kwa litaba za mwahali

Muta Busupali Bu Ba “Mushukwe wa ku Kutekiwa”

Muta Busupali Bu Ba “Mushukwe wa ku Kutekiwa”

 ‘Tuso ya Ka I Zwa ku Jehova’

Muta Busupali Bu Ba “Mushukwe wa ku Kutekiwa”

MURIEL wa lilimo za buhulu ze 101 n’a bulezi kuli: “Ki bupilo bo bunde ka ku fitisisa.” Theodoros wa lilimo za buhulu ze 70 u bulela kuli: “Ki litohonolo luli!” Maria ha n’a na ni lilimo za buhulu ze 73 n’a ize: “Bupilo bwa ka ni bu sebelisize ka nzila ye nde ka ku fitisisa.” Kaufel’a bona bao ne ba tandile bupilo bwa bona mwa ku sebeleza Jehova Mulimu.

Basupali ba ba cwalo ba sebeza sina buñata bwa balapeli ba Jehova ba bañwi ba mwa lifasi kaufela. Ku si na taba ni busupali, lipilaelo za buikangulo, miinelo ye miñwi ye t’ata, ba sa zwelapili ku sebeleza Mulimu ka moyo kaufela. Mwa puteho ya Sikreste, basupali ba ba cwalo ba ba sepahala ki mitala ye mituna ya ku sebeleza Mulimu. Jehova u itebuha hahulu sebelezo ya basupali, nihaike kuli ba kana ba paleliswa ki miinelo ya bona. *2 Makorinte 8:12.

Buka ya Lisamu i fa sisupo se si swanela ka za bupilo bo bunde bo ba kona ku libelela basupali ba ba sepahala. Ba kona ku swana sina kota ya kale ye tuna ili ye sa tuheli ku beya miselo. Ka za basupali ba ba sepahala, walisamu n’a opezi kuli: “Ba beye miselo ni mwa bucembele bo butuna bwa bona, inze ba tezi mezi ni butala.”—Samu 92:14.

Ba bañwi ba kana ba saba kuli ba ka yubekiwa ni ku tokolomohiwa ha ba ka felelwa ki m’ata bakeñisa busupali. Davida n’a itilelezi ku Mulimu kuli: “U si ke wa ni hana mwa nako ya busupali bwa ka; niha ni felelwa ki m’ata, u si ke wa ni tuhela.” (Samu 71:9) Kiñi se si tisa kuli mutu a si ke a fokola kono a kondise mwa busupali? Ki kalemeno ka ku luka ke lu lutiwa ki Mulimu. Walisamu n’a opezi kuli: “Batu ba niti ba ka konda sina nzalu.”—Samu 92:12.

Ba ba sebelelize hahulu Mulimu ka busepahali mwa bupilo bwa bona kaufela ba zwelangapili ku beya miselo ye minde mwa lilimo za bona za busupali. Ku swana fela inge kuli buñata bwa lipeu ze ba cezi mwa bupilo bwa bona tota kamba bwa ba bañwi za hula ni ku kola ku fitela li beya miselo ye miñata. (Magalata 6:7-10; Makolose 1:10) Ki niti, batu ba ba sinyelize bupilo bwa bona kwa ku ndongwama lika za ka butu ze sa lumelelani ni likuka za Mulimu hañata ha ba kutulangi ze nde ha se ba supezi.

Ku luka ko ku li mukabo wa busupali hape ku koñomekilwe mwa buka ya Bibele ya Liproverbia. Mwateñi lu bala kuli: “Milili ye li pululu, ki mushukwe wa ku kutekiwa, u fumanwa mwa mizamao ye lukile.” (Liproverbia 16:31) Ee, ku luka ku bonisa bunde bo bu mwahali. Ku latelela nzila ye lukile mwa bupilo kaufela ku tahisa likute. (Livitike 19:32) Milili ye li pululu, ha i kopana ni butali ni muzamao o munde, li tahisa likute.—Jobo 12:12.

Ku Jehova, bupilo bwa ku sepahala mwa sebelezo ya hae ki nto ye kateleha. Mañolo a bulela kuli: “Mu ka be mu supale, mane mu tunye limbi, inze li Na [Jehova] ya ka mi lwala; ni mi ezize, mi ni ka itwalela mina; e, ni ka mi lwala, ni ka mi pilisa.” (Isaya 46:4) Kwa omba-omba hakalo ku ziba kuli Ndat’a luna wa kwa lihalimu ya lilato u sepisa ku tusa ni ku yemela batu ba hae ba ba sepahala mwa busupali bwa bona!—Samu 48:14.

 Bakeñisa kuli bupilo bwa ku sepahala mwa sebelezo ya Jehova ki nto ye kateleha ku yena, kana ba bañwi ha ba swaneli ku bu katelwa ni bona? Ka ku likanyisa mubonelo wa Mulimu, lu iyakatwa hahulu balumeli ka luna be li basupali. (1 Timotea 5:1, 2) Kacwalo ha lu bateñi linzila ze nde za ku bonisa ka zona lilato la Sikreste ka ku ba fa ze ba tokwile.

Ku Zamaya mwa Nzila ya ku Luka mwa Busupali

Salumoni u lu kolwisa kuli: “Niti, mwa nzila ya yona, ku na ni bupilo.” (Liproverbia 12:28) Busupali ha bu palelwisi mutu ku zamaya mwa nzila yeo mwa bupilo bwa hae. Ka mutala, mwa Moldova, munna muhulu wa lilimo ze 99 n’a neezi bucaha bwa hae kwa ku tumisa mihupulo ya Komyunizimu. N’a ikutwisisa bakeñisa kuli n’a ambolanga pata ka pata ni baeteleli ba ba bubana ba Komyunizimu, ba ba cwale ka V. I. Lenin. Kono Komyunizimu ha se i fokozi ni ku wa, munna muhulu y’o a felelwa ki mulelo mi n’a sa bonahali kuli ku na ni za eza. Kono Lipaki za Jehova ha ne ba mu bonisize kuli Mubuso wa Mulimu ki ona fela o ka felisa matata a batu, n’a amuhezi niti ya Bibele mi a ba muituti yo mutuna wa Mañolo. Kambesi a timele kambe n’a fitile fa ku ba mutang’a Jehova ya kolobelizwe.

Musali ya pila mwa Hungary wa lilimo za buhulu ze 81, ha n’a itutile likuka za Mulimu za muzamao a lemuha kuli n’a swanela ku nyalwa ka mulao ki munna ya n’a pilile ni yena mapoto ka lilimo ze ñata. Musali yo a itiisa mi a taluseza munna yo ya n’a pila ni yena ka za mubonelo wa hae o tomile fa Bibele wo. A komoka hahulu ni ku nyakalala kuli munna yo n’a lumezi ku ñolisa linyalo la bona kwa mulao. Ha se ba catile, musali yo a eza kapili zwelopili ya kwa moya. Mwa likweli fela ze 8 ku zwa fa n’a kalezi ku ituta Bibele, a ba muhasanyi ya si ka kolobezwa, mi hamulahonyana wa fo a kolobezwa. Ki niti luli, ku luka kwa kona ku fa basupali mushukwe wa ku kutekiwa!

Ee, basupali ba ba sepahala ba Sikreste ba kona ku kolwa kuli Mulimu wa iyakatwa bona. Jehova ha na ku yubeka ba ba zwelapili ku sepahala ku yena. Kono, u ba sepisa ku ba etelela, ku ba yemela, ni ku ba tusa niha se ba supezi. Mi ba paka manzwi a walisamu a’ li: “Tuso ya ka i zwa ku [Muñ’a] bupilo.”—Samu 121:2.

[Manzwi a fa likepe 9]

‘Milili ye li pululu, ki mushukwe wa ku kutekiwa, u fumanwa mwa mizamao ye lukile.’—LIPROVERBIA 16:31

[Litaluso za kwatasi]

^ para. 4 Mu bone 2005 Calendar of Jehovah’s Witnesses, January/February.

[Mbokisi fa likepe 8]

JEHOVA U BABALELA BATANGA BA HAE BA BASUPALI

‘U yeme, ha u li fapil’a wa toho ye ize pululu, u kuteke munnamuhulu.’—Livitike 19:32.

‘Mu ka be mu supale, mane mu tunye limbi, inze li Na ya ka mi lwala.’—Isaya 46:4.