Mu ye kwa litaba za mwahali

Mu ye kwa litaba za mwahali

Lipuzo Ze Zwa kwa Babali

Lipuzo Ze Zwa kwa Babali

 Lipuzo Ze Zwa kwa Babali

Ha n’a zuhile kwa bafu, ki kabakalañi Jesu ha n’a kupile Tomasi ku mu swala kono niteñi kwamulaho n’a hanezi Maria Magdalena ku mu swala?

Litoloko ze ñwi za kale za Bibele li fa muhupulo wa kuli Jesu n’a taluselize Maria Magdalena kuli a si ke a mu swala. Ka mutala, Bibele ye Kenile i tolokile manzwi a Jesu kuli: “U si ke wa ni swala; kakuli ha ni si ka ya kale kwahalimu ku Ndate.” (Joani 20:17) Kono linzwi la Sigerike le ne li itusisizwe luli le li tolokiwanga hañata kuli “ku swala,” hape li talusa “ku kumalela, ku swalelela, ku manja, kamba ku lambela.” Seo si bonisa kuli Jesu n’a sa hani fela kuli Maria Magdalena a si ke a mu swala, kakuli nakonyana fela hamulaho wa f’o, n’a lumelelize basali ba bañwi be ne ba inzi kwa libita ku mu “swala kwa mautu.”—Mateu 28:9.

Litoloko ze ñata za miteñi ye, ze cwale ka New World Translation of the Holy Scriptures, The New Jerusalem Bible, ni The New English Bible, li lu tusa ku utwisisa taluso luli ya manzwi a Jesu kakuli a tolokilwe kuli: “U si ke wa ni kumalela.” Ki kabakalañi Jesu ha n’a bulezi cwalo ku Maria Magdalena ya n’a utwana hahulu ni yena?—Luka 8:1-3.

Mwendi Maria Magdalena n’a saba kuli Jesu n’a tuha a funduka ku kambamela kwa lihalimu. Ka ku lakaza hahulu ku ba ni Mulen’a hae, a kumalela Jesu, ku si na ku mu tuhela. Mi ka ku mu kolwisa kuli n’a sa funduki, Jesu a laela Maria ku tuhela ku mu kumalela kono a mu luma ku yo taluseza balutiwa ba hae kuli u zuhile kwa bafu.—Joani 20:17.

Likande la Jesu ni Tomasi lona la fapahana. Jesu ha n’a iponahalize kwa balutiwa ba bañwi, Tomasi yena n’a siyo. Hamulaho, Tomasi a honona kuli Jesu u zuhile kwa bafu, mi a bulela kuli n’a si ke a lumela konji ha n’a ka bona mañiba a limapo za Jesu ni ku kenya mazoho mwa lubaci lwa Jesu. Ha se ku fitile mazazi a 8, Jesu a iponahaza hape kwa balutiwa ba hae. Tomasi n’a li teñi cwale ka nako yeo, mi Jesu a mu kupa ku swala mwa mañiba.—Joani 20:24-27.

Kacwalo, ku Maria Magdalena, Jesu n’a zwisa takazo ye n’e si ka luka ya ku mu tibela ku funduka; mi haili ku Tomasi, Jesu n’a mu tusa ku tuhela ku honona. Mi mwa miinelo ye mibeli yeo kaufela, Jesu n’a na ni mabaka a mande a ku eza mwa n’a ezelize.