Mu ye kwa litaba za mwahali

Mu ye kwa litaba za mwahali

Lipuzo Ze Zwa kwa Babali

Lipuzo Ze Zwa kwa Babali

 Lipuzo Ze Zwa kwa Babali

Ku ba ni “bupilo ku yena” ku talusañi?

Bibele i bulela kuli Jesu Kreste u na ni “bupilo ku yena” ni balutiwa ba hae ni bona ba bulelwa kuli ba na ni ‘bupilo ku bona.’ (Joani 5:26; 6:53) Nihakulicwalo, mañolo a mabeli ao h’a talusi nto ye swana.

Jesu n’a bulezi kuli, “sina Ndate h’a na ni bupilo ku yena, ni Mwana cwalo, u mu file ku ba ni bupilo ku yena.” Pili a si ka bulela kale manzwi ao a hoha mamelelo, Jesu n’a ize: “Kaniti-niti na mi bulelela, ni li: Ya utwa linzwi la ka, mi a lumela ku Ya ni lumile, u na ni bupilo bo bu sa feli . . . Nako ya ta, mane i se i tile mo bafu ba ka utwa linzwi la Mwan’a Mulimu; mi ba ba li utwa ba ka pila.” F’o Jesu n’a bulela za m’ata a ipitezi a’ filwe ki Ndat’ahe—a ku tahisa kuli batu ba amuhelwe ki Mulimu. Hape, Jesu wa kona ku zusa ba ba shwile ni ku ba fa bupilo. Ku bulela kuli Jesu u na ni “bupilo ku yena” ku talusa kuli u filwe m’ata a ku eza cwalo. Manzwi ao hape a konwa ku bulelwa kuli sina Ndat’ahe, Mwana ni yena u na ni ‘mpo ya bupilo ku yena.’ (Joani 5:24-26) Balateleli ba hae bo?

Ibat’o ba hamulaho wa silimo, Jesu n’a bulelezi bateelezi ba hae kuli: “Kaniti-niti na mi bulelela, ni li, Ha mu sa ci nama ya Mwan’a mutu, mi mu sa nwi mali a hae, bupilo ha bu yo ku mina. Ya ca nama ya ka, mi a nwa mali a ka, u na ni bupilo bo bu sa feli; mi ni ka mu zusa ka lizazi la mafelelezo.” (Joani 6:53, 54) F’a Jesu u bapanya pulelo ya kuli ‘bupilo ku mina’ ku ya ku fumana “bupilo bo bu sa feli.” Lipulelo ze ñozwi sina mo i ñolezwi pulelo ya ‘bupilo ku mina’ za fumaneha mwa Mañolo a mañwi a Sigerike. Mitala ye mibeli ki ye, “Mu be ni lizwai mo ku mina” ni “ba amuhela mo ku bona mupuzo.” (Mareka 9:50; Maroma 1:27) Lipulelo zeo ha li talusi m’ata a ku fa lizwai ku ba bañwi kamba ku fa mupuzo ku mutu ufi kamba ufi ka tikanyo. Kono li talusa ku kwana, kamba ku talelela. Kacwalo, pulelo ya kuli ‘bupilo ku mina’ ye bulezwi kwa Joani 6:53 i talusa fela ku fumana bupilo bo bu tezi.

 Jesu ha n’a bulela za balateleli ba hae kuli ba na ni bupilo ku bona, n’a amile kwa nama ni mali a hae. Hamulaho, ha n’a toma Mulalelo wa Mulena, Jesu n’a bulezi hape ka za nama ni mali a hae mi a bulelela balateleli ba hae ba ne ba ka kenyiwa mwa bulikani bo bunca kuli ba ce kwa liswanisezo za sinkwa se si si ka ya mumela ni ku nwa kwa veine. Kana f’o ku talusa kuli Bakreste ba ba tozizwe ba ba mwa bulikani bo bunca ni Jehova Mulimu ki bona fela ba ba ka fumana bupilo bo bu tezi b’o? Kutokwa. Ku zwa fa kezahalo yeo ya pili ku ya ku ya bubeli ne ku fitile silimo. Ba ne ba utwile manzwi a Jesu a’ ñozwi kwa Joani 6:53, 54 ne ba s’a zibi za kupuzo ya ka silimo ya liswanisezo ze yemela nama ni mali a Kreste.

Ka ku ya ka Joani kauhanyo 6, Jesu pili u bapanya mubili wa hae kwa manna kuli: “Bokuku a mina ba cile manna mwa lihalaupa, mi ba shwile. Buhobe bo bu zwa kwa lihalimu ki bo, kuli ya ca kwateñi a si ke a shwa. Ki na buhobe bo bu pila, bo bu zwile kwa lihalimu. Mutu h’a ca kwa buhobe bo, u ka pila kamita.” Nama ya Jesu ni mali a hae, n’e li ze tuna ku fita manna tenyene. Ka mukwa ufi? Kakuli mubili wa hae ne u fezwi kuli u “pilise lifasi,” ili ku konahalisa kuli bupilo bo bu sa feli bu be teñi. * Kacwalo, pulelo ya ku ba ni ‘bupilo ku bona’ ye kwa Joani 6:53 i talusa kaufela ba ba amuhela bupilo bo bu sa feli—ibe kwa lihalimu kamba fa lifasi-mubu.—Joani 6:48-51.

Balateleli ba Kreste ba amuhela lili bupilo ku bona, kamba ku fumana bupilo bo bu tezi? Bacalifa ba ba tozizwe ba Mubuso ba fumana bupilo bo bu tezi muta ba zuha ku ya kwa lihalimu sina libupiwa za moya ze sa shwi. (1 Makorinte 15:52, 53; 1 Joani 3:2) “Lingu ze ñwi” za Jesu li ka fumana bupilo bo bu tezi hamulaho wa Puso ya hae ya Lilimo ze Sikiti. Ka nako yeo, ba ka be ba likilwe, ni ku fumanwa kuli b’a sepahala, ni ku beiwa ba ba lukile ilikuli ba ikole bupilo bo bu sa feli mwa Paradaisi fa lifasi-mubu.—Joani 10:16; Sinulo 20:5, 7-10.

[Litaluso za kwatasi]

^ para. 7 Mwa lihalaupa, Maisilaele ni “Silundwamanje sa batu ba mishobo ye kopa-kopani” ne ba tokwa manna kuli ba zwelepili ku pila. (Exoda 12:37, 38; 16:13-18) Bakreste kaufela ibe ba ba tozizwe kamba ba ba si ka toziwa, kuli ba pile ku ya ku ile, ni bona ba swanela ku ca kwa manna ya lihalimu ka ku bonisa tumelo mwa m’ata a liulula a nama ni mali a Jesu ze ne filwe sina sitabelo.Mu bone The Watchtower, ya February 1, 1988, makepe 30-1.

[Maswaniso a fa likepe 31]

Bakreste ba niti kaufela ba kona ku ba ni ‘bupilo ku bona’