“Mu Tahe Ku Na . . . , Mi Ni Ka Mi Imulula”

Kekezeho Ye Tuna I Tahisa Kulo ya ka Putako

JESU KRESTE n’a ize: “Mu tahe ku na . . . , mi ni ka mi imulula.” (Mateu 11:28) Ki memo kwa ku tabisa ye zwa ku Toho ya puteho ya Sikreste! (Maefese 5:23) Ha lu nyakisisa manzwi ao, lwa kona ku itebuha simbule sa butokwa sa kimululo—ili siango ni mizwale ni likaizeli ba luna ba kwa moya ha lu li kwa mikopano ya Sikreste. Kaniti, lwa lumelelana ni walisamu ya n’a opezi kuli: “Ku munati cwañi mi ku kateleha cwañi, batu ni banabahabo bona ha ba pila hamoho, mwa buñwi.”—Samu 133:1.

Kaniti, balikani be lu ezanga sango ni bona kwa mikopano yeo ki bona ba bande ka ku fitisisa, mi moya o banga teñi wa tabisanga mi ha u bangi wa mifilifili. Ku swanezi Mukreste yo muñwi wa mwanana ha n’a ize kuli: “Ni yanga kwa sikolo musihali kaufela, mi nto yeo ya ni bombisa luli. Kono mikopano i swana inge sibaka se si na ni mezi mwa lihalaupa, ko ni katuluswa kuli ni kone ku talimana ni lizazi le li tatama kwa sikolo.” Mukulwani yo muñwi wa kwa Nigeria n’a ize: “Ni fumani kuli sango ni ba bañwi ba ba lata Jehova si ni tusa ku zwelapili ku utwana ni yena.”

Ndu ya Mubuso ya Lipaki za Jehova ya fa silalanda i tusa hahulu ka ku ba makopanelo a bulapeli bwa niti mwa silalanda seo. Mwa libaka ze ñata, ka viki, mikopano i ezezwa kwa Ndu ya Mubuso habeli kamba ku fitelela, mi baituti ba Bibele ba susuezwanga ku kala kapili-pili ku yanga teñi ilikuli ba ikole teñi siango se si katulusa.—Maheberu 10:24, 25.

 Butokwi Bo Butuna

Kono kwa iponahaza hande kuli haki Lipaki za Jehova kaufela ba ba itusisa Ndu ya Mubuso ye swanela. Kekezeho ye tuna ya palo ya bakutazi ba Mubuso mwa lifasi kamukana i tahisize butokwi bo butuna. Ku sa tokwahala likiti-kiti za Mandu a Mubuso, sihulu mwa linaha ze sa zwelapili.—Isaya 54:2; 60:22.

Ki ye mitala: Liputeho ze 290 ze mwa muleneñi wa naha ya Democratic Republic of Congo, ne li na ni Mandu a Mubuso a 10 fela. Naha yeo n’e na ni butokwi bo butuna bwa Mandu a Mubuso a mañata. Mwa naha ya Angola buñata bwa liputeho li kopanela fande kakuli Mandu a Mubuso ki a balwa fela. Ku na ni butokwi bo bu swana mwa linaha ze ñwi z’e ñata.

Kacwalo, ku kala ka 1999, ku se ku ezizwe buikatazo bwa ka sikwata bwa ku tusa ku yaha Mandu a Mubuso mwa linaha ze luwile hanyinyani. Kuli ba tuse mwa ku babalela mingendenge ya ku yaha mwa linaha ze cwalo, Lipaki ba ba cuukile ba itatezi ku fana lisebelezo za bona. Muta buikatazo bo bu cwalo bu kopana ni moya wa ku itatela ni ku fumaneha kwa baitateli fa silalanda, ku zwanga teñi ze susueza. Hape Lipaki ba fa silalanda ba tusehanga ka ku twaezwa musebezi. Kaufela zeo li konisa ku taleleza butokwi bwa ku yaha Mandu a Mubuso mwa linaha za bona.

Kacwalo tuso sakata i sweli y’a fiwa ka muatumelelo o bunolo wa ku yaha Mandu a Mubuso ka ku itusisa miezezo ni liitusiso za fa sibaka. Mulelo haki wa ku taleleza fela butokwi bo butuna bwa Mandu a Mubuso kono hape ni ku toma tukiso ya ku a babalela ye lumelelana ni miinelo ya fa sibaka.—2 Makorinte 8:14, 15.

Lizwelopili Ze Katulusa

Ki lifi ze zwile mwa buikatazo bo bwa ku fumana libaka za ku lapelela teñi? Kwa makalelo a silimo sa 2001, piho ye ne zwile kwa Malawi ne i’ze: “Z’e petilwe mwa naha ye z’a tabisa luli. Mwa likweli ze peli ze taha, lu ka be lu felize ku yaha Mandu a Mubuso a mañwi.” (Maswaniso 1 ni 2) Mwa naha ya Togo, baitateli mwa likweli za cwanoñu fa ba yahile Mandu a Mubuso a swanela a sikai. (Siswaniso 3) Musebezi o munde o petiwa ki baitateli hape u fumanisa Mandu a Mubuso a swanela mwa linaha za Mexico, Brazil, ni ze ñwi.

Liputeho li fumana kuli Ndu ya Mubuso ha s’e yahilwe, batu ba mwa sibaka seo ba lemuhanga kuli Lipaki za Jehova ba inelezi. Ku bonahala kuli ba bañata ne ba katakata ku swalisana ni Lipaki ku fitela ku fumaneha sibaka se si swanela sa ku lapelela teñi. Puteho ya Nafisi kwa Malawi i biha  kuli: “Bakeñisa kuli cwale lu na ni Ndu ya Mubuso ye swanela, se ku bile ni bupaki bo bunde. Kacwalo, ku bunolo ku kalisa lituto za Bibele.”

Lilama za Puteho ya Krake mwa naha ya Benin, ne ba tiyezi sheununo ye tuna mwa nako ya kwamulaho kakuli Ndu ya Mubuso ya kale ne i sa bonahali hande ha ne i bapiswa kwa likeleke ze ñwi. (Siswaniso 4) Ka nako ye puteho se i na ni Ndu ya Mubuso ye nca ye nde ili ye yemela bulapeli bwa niti ka nzila ye swanela ni ye tompehisa. (Siswaniso 5) Puteho yeo n’e na ni bahasanyi ba Mubuso ba 34 ni avareji ya 73 ya baputehi fa mikopano ya la Sunda, kono ba 651 ne ba fumanehile kwa kakulo ya Ndu ya Mubuso. Buñata bwa bona n’e li ba ba pila mwa tolopo  be ne ba nyangumuzwi ki ku bona kuli Lipaki ne ba konile ku yaha muyaho mwa nakonyana fela. Ka ku ama kwa likezahalo ze felile ze cwale ka zeo, mutai wa Zimbabwe n’o ñozi kuli: “Mwahal’a kweli i liñwi ya ku yaha Ndu ya Mubuso ye nca, palo ya baputehi hañata ya minahananga.”—Maswaniso 6 ni 7.

Ku si na kakanyo, Mandu a Mubuso a manca a mañata a konisa Bakreste ba ba ineezi ni batu ba ba tabela ku ba ni libaka za ku katuluhela teñi kwa moya. Puteho ye ñwi mwa naha ya Ukraine ha s’e kalisize ku itusisa Ndu ya Mubuso ya yona ye nca, Paki yo muñwi n’a bulezi kuli: “Lu ikutwa ku ba ni tabo ye tuna. Lu iponezi ka meto a luna tota ka mo Jehova a tuseza batu ba hae.”

[Mbokisi/Maswaniso a fa likepe 10]

Bufani Bwa Itebuhiwa

Lipaki za Jehova ba nyakalaliswa ki zwelopili ya ka bubebe ye ezizwe ilikuli butokwi bo butuna bwa Mandu a Mubuso a manca mwa lifasi kaufela bu talelezwe. Palo ye zwelapili ku hula ya balapeli ba Jehova mwa linaha ze ñata i tokwa kuli ku yahiwe Mandu a Mubuso a mañata. Kakuli ka ku ya ka avareji, mwahal’a silimo sa sebelezo sa 2001, ne ku tomiwa liputeho ze nca ze 32 ka viki ni viki! Liputeho ze cwalo li tokwa libaka za ku kopanela ni ku lapelela teñi.

Ku kana kwa zuha puzo y’e li, ‘Lu fumana cwañi mali a ku itusisa mwa misebezi ye cwale ka mungendenge wa ku yaha Mandu a Mubuso, sihulu mwa linaha mo ku bezi mizwale t’ata ku fumana mali?’ Kalabo i supa kwa kemelo ya Mulimu hamohocwalo ni bufani bwa batu.

Ku likana ni mwa n’a sepiselize, Jehova u fa moya wa hae o kenile kwa batanga ba hae, ili ku ba konisa kuli “ba sebeze ze nde; ba fume misebezi ye minde; ba abe za bona; ba tuse ba bañwi.” (1 Timotea 6:18) Moya wa Mulimu u susumeza Lipaki za Jehova ku fa kemelo ka linzila kaufela kwa musebezi wa ku kutaza Mubuso—ba neela nako ya bona, m’ata, buikoneli, ni maluo a mañwi kwa misebezi ya Sikreste.

Moya wa bufani u susumeza Lipaki ni ba bañwi ba ba tusa kwa kulo ni kwa musebezi wa ku yaha ka ku fana mali a bona. Kwand’a ku tusa ku lifela lisinyehelo za kamita za puteho ya fa sibaka, ba fa linubu ze tusa kwa musebezi wa ku yaha mwa likalulo ze ñwi za lifasi.

Mwa puteho ni puteho, ku na ni mambokisi a ñozwi ka ku bonahala hande kuli “Linubu za Musebezi wa mwa Lifasi Kaufela—Mateu 24:14.” Batu ka butu b’a kona ku beya mwateñi linubu za ka ku itatela haiba ba tabela ku eza cwalo. (2 Malena 12:9) Linubu kaufela, ze tuna ni ze nyinyani, za itebuhiwa. (Mareka 12:42-44) Mali ao a itusiswa mwa linzila ze fapahana-fapahana ka ku likana ni butokwi, ku kopanyeleza cwalo ni musebezi wa ku yaha Mandu a Mubuso. Mali a cwalo h’a itusiswi kwa ku holisa manduna ba fa musebezi kakuli Lipaki za Jehova ha ba na manduna ba ba cwalo.

Kana linubu za musebezi wa mwa lifasi kaufela z’a peta mulelo wa zona? Ee, za u peta. Mutai wa kwa naha ya Liberia—ili naha ye n’e shandauzwi ki ndwa ya mukowa—u biha kuli buñata bwa Lipaki ba mwa naha yeo ha ba na mibeleko mi mali a ba kataza hahulu ku a fumana. Batu ba Jehova ba mwa naha yeo ne ba ka kona cwañi ku fumana libaka ze swanela za ku lapelela teñi? Ofisi ya mutai i biha kuli: “Linubu za ka ku itatela ze zwa kwa mizwale ba ba mwa linaha ze ñwi li ka itusiswa mwa ku peta musebezi. Yeo ki tukiso ye butali ni ye lilato.”

Mizwale ba mwa naha ni bona ba tusa ku si na taba ni ku sa ipumanela hande kwa bona. Naha ya mwa Africa ya Sierra Leone i biha kuli: “Mizwale ba mwa naha b’a ikataza mi ba tabela ku fana misebezi ya mazoho a bona ni linubu za mali kaufela ze ba ikonela kwa ku yemela musebezi wa ku yaha Mandu a Mubuso.”

Sa butokwa hahulu kikuli buikatazo bwa ku yaha bo, bu tahisa tumbo ku Jehova. Mizwale ba kwa Liberia ba bulela ka cisehelo kuli: “Ku yahiwa kwa libaka ze swanela za ku lapelela teñi mwa naha kaufela ku ka bonisa batu kuli bulapeli bwa niti bu inelezi mi ku ka kutekehisa ni ku bubahaza libizo le lituna la Mulimu wa luna.”