Mu ye kwa litaba za mwahali

Mu ye kwa litaba za mwahali

Likuka Ze Mu Keta

Likuka Ze Mu Keta

 Likuka Ze Mu Keta

KANA mu na ni likuka? Kamba kana m’u nga likuka ze li teñi ku ba za kwakale? Niti kikuli, mañi ni mañi u etelelwa ki likuka ze ñwi, ili z’a ikutwa kuli ki za butokwa. Sikuka si kona ku taluswa ku ba sipimo sa ze li ze lukile. Likuka li ama likatulo ze lu eza ni mupilelo wa luna. Likuka li kona ku sebeza sina kapangaliko ka ka supeza nzila (compass).

Ka mutala, Jesu n’a susuelize balateleli ba hae ku buluka Sikuka Se Situna, se si kwa Mateu 7:12 se si li: “Mi cwale linto kamukana ze mu lata kuli batu ba mi ezeze, mu ba ezeze zona ni mina.” Balateleli ba Confucius ba mamela likuka ze ama likezo ze swanela ni ze musa (li ni jen), ili ze bulela ka za tulemeno to tu cwale ka sishemo, buikokobezo, likute, ni busepahali. Niheba batu ba ba si balapeli ba na ni lika ze ba nga ku ba za butokwa hahulu kamba liketelelo z’e ba bonisa mupilelo.

Ki Likuka Ze Cwañi?

Kono ne lu ka eza hande ku ziba kuli likuka li kona ku ba ze nde kamba ze maswe. Ka mutala, palo ye ekezehile ya batu ba susuelizwe ki moya wa ku bata ku ba wa pili o n’o li teñi lilimo ze lishumi kamba ku fitelela kwamulaho. Nihaike kuli mwendi ba bañata ha ba zibi pulelo yeo kamba mwendi ba ikutwa kuli ha i ba ami, moya wa ku bata ku ba wa pili ki sona sikuka sa muzamao seo ba bañata ba iketela ha ba fulalela likuka ze nde hahulu za mupilelo. Ibe kuli u zibwa ka pulelo yeo kamba kutokwa, moya wa ku bata ku ba wa pili ki ponahazo ya buitati, mi hañata u kopanyeleza ku lata hahulu ku fuma. Ya zamaisa za TV mwa China n’a ize: “Lu na ni likuka ze peli fela. Sapili ki ku fa batu ze ba bata hahulu. Sa bubeli ki ku panga mali.”

Moya wa ku bata ku ba wa pili u kona ku ba inge magineti. Magineti i ezangañi kwa kapangaliko ka ka supeza nzila? Ze peli zeo ha li bapani, ndonga ya kapangaliko ka ka supeza nzila i supanga ku sili. Ka nzila ye swana, moya wa ku bata ku ba wa pili u kona ku lyanganisa kapangaliko ka ka supeza nzila ka mutu ka muzamao, kamba sikuka sa mupilelo o lukile, ilikuli kwa lika kaufela, z’a lata ibe zona za pili.

Kana ne mu ka komoka ku ziba kuli moya wa ku bata ku ba wa pili haki nto ye kalile miteñi ye? Mupilelo w’o ne u kalezi mwa simu ya Edeni bashemi ba luna ba pili ha ne ba fulalezi likuka za mupilelo ze n’e tomilwe ki Mubupi wa luna. Nto yeo ne i fetuzi kapangaliko ka ka ba supeza nzila ya bona ya muzamao. Ka ku ba ba ba simuluhile ku Adama ni Eva, batu ba katazwa ki mupilelo o swana, ili o til’o bizwa cwanoñu fa kuli ki “moya wa ku bata ku ba wa pili.”—Genese 3:6-8, 12.

Ku yambalakana kwa moya w’o sihulu ku bonwa mwa nako ye bizwa ki bupolofita bwa Bibele kuli ki “mazazi a maungulelo” ili a zibahala ka “linako ze tata.” Batu ba  bañata ki “baitati.” Ha ku komokisi hahulu ha lu ipumana mwatas’a sineneketo ya ku yambula kwa moya w’o wa ku bata ku ba wa pili.—2 Timotea 3:1-5.

Mwendi mu ka swana mwa lumelelana ni mucaha ya bizwa Olaf ya n’a ñolezi kwa mutai wa Lipaki za Jehova mwa Yurope kuli: “Ku t’ata ku zwelapili mwa muzamao o munde, sihulu luna micaha. Shangwe mu zwelepili ku lu hupuzanga butokwa bwa ku kumalela kwa likuka za Bibele.”

Olaf n’a bonahalize mubonelo o munde. Likuka za Mulimu za kona ku lu tusa ku kumalela kwa likuka ze nde hahulu za mupilelo, ibe kuli lu banana kamba ba bahulu. Hape za kona ku lu tusa ku itakeleza kwa moya wa ku bata ku ba wa pili, ibe kuli u bizwa cwalo kamba kutokwa. Haiba mu bata ku ituta ze ñata ka za m’o likuka za Bibele li kona ku mi tuseza luli, mu kupiwa ku nyakisisa taba ye tatama.

[Maswaniso a fa likepe 4]

Batu ba bañata kacenu ha ba isi pilu kwa butokwi bwa ba bañwi