Mu ye kwa litaba za mwahali

Mu ye kwa litaba za mwahali

Ba Ba Kona Ku Luta Linzwi La Mulimu

Ba Ba Kona Ku Luta Linzwi La Mulimu

 Ba Ba Kona Ku Luta Linzwi La Mulimu

“Mulimu . . . ki Yena ya lu fa ku kona ku ba fa sebelezo.”—2 MAKORINTE 3:5, 6.

1, 2. Fokuñwi ku ezwanga buikatazo mañi bwa ku kutaza, kono ki kabakalañi ha bu palanga hañata?

NE MU ka ikutwa cwañi ha ne mu ka fiwa musebezi o mu sa koni ku eza? M’u nge muinelo w’o: Lisebeliso ze mu tokwa li yalilwe fapil’a mina, mi liitusiso li teñi. Kono ha mu zibi mwa ku ezeza musebezi w’o. Ka bumai ni ku fita, musebezi w’o u tokwa ku eziwa kapili-pili. Batu ba itingile ku mina. Nto yeo neikaba ye zwafisa luli!

2 Singanyenganye seo haki sa ku ikupulela fela. Mu nge mutala w’o. Fokuñwi, ye ñwi ya likeleke za Krestendomu se i likile ku lukisa bukombwa bwa fa ndu ni ndu ni ku bu eza. Hañata, buikatazo b’o se bu palile, ili ku fela mwa liviki kamba likweli. Libaka? Ki kabakala kuli Krestendomu ha i si ka tusa balateleli ba yona ku kona ku eza musebezi w’o. Niheba bona ba bahulu ba bulapeli ha ba si ka fita fa ku kona ku kutaza, hañata ni ko ba tanda lilimo-limo za ku ituta kwa likolo za silifasi ni za baprisita. Ki kabakalañi ha lu kona ku bulela cwalo?

3. Kwa 2 Makorinte 3:5, 6, ki pulelo mañi ye itusisizwe halalu, mi i talusañi?

3 Linzwi la Mulimu li talusa se si konisa mukutazi wa niti wa taba ye nde ya Sikreste. Muapositola Paulusi n’a susuelizwe ka moya ku ñola kuli: “Isikuli lu ka kona ku hupula se siñwi lu nosi, inge taba i ka izwela ku luna; kono ku kona kwa luna ku zwa ku Mulimu; hape ki Yena ya lu fa ku kona ku ba fa sebelezo.” (2 Makorinte 3:5, 6) Mu lemuhe pulelo ye itusisizwe halalu fa—yona ya ‘ku kona.’ I talusañi? Vine’s Expository Dictionary of Biblical Words i li: “Ha li itusiswa kwa lika, [linzwi la matatekelo la Sigerike] li talusa ‘ku likana’ . . . ; ha li itusiswa kwa batu, li talusa ‘ku kona,’ ‘ku swanela.’” Kacwalo, ya “kona” wa lukela mi wa swanela ku eza musebezi w’a filwe. Ee, likombwa za niti za taba ye nde za kona ku eza musebezi w’o. Ba swanela, ku lukela, kamba ku kona ku kutaza.

4. (a) Mutala wa Paulusi u bonisa cwañi kuli ku kona ku eza bukombwa bwa Sikreste haki kwa ba sikai fela ba ba ketilwe? (b) Ki linzila lifi z’e talu zeo ka zona Jehova a lu konisa ku ba likombwa?

4 Kono ku kona k’o ku zwelela ku mañi? Kana ku zwelela kwa buikoneli bwa ka butu? Kwa kutwisiso ye ipitezi? Kwa tuto ye tungile ya kwa likolo ze ile libubo? Ku bonahala kuli muapositola Paulusi n’a na ni lika zeo kaufela. (Likezo 22:3; Mafilipi 3:4, 5) Kono n’a itumelezi ka buikokobezo kuli ku kona ku ba sikombwa kwa hae ne ku zwelela ku Jehova Mulimu, isiñi kwa likolo ze pahami. Kana ku kona ko ku cwalo ki kwa ba sikai ba ba ketilwe? Paulusi n’a ñolezi puteho ya mwa Korinte ka za ‘ku kona kwa luna.’ F’o kaniti ki ku akaleza kuli Jehova u bona teñi kuli batanga ba hae  ba ba sepahala kaufela ba swanela, ili ku kona ku eza musebezi w’a ba file ku eza. Jehova u konisa cwañi Bakreste ba niti kacenu? Ha lu nyakisiseñi linzila z’e talu z’a itusisa: (1) Linzwi la hae, (2) moya wa hae o kenile, ni (3) kopano ya hae ya fa lifasi.

Linzwi la Jehova La Lu Konisa

5, 6. Mañolo a Kenile a na ni susuezo mañi kwa Bakreste ba niti?

5 Sapili, Linzwi la Mulimu li lu konisa cwañi ka ku ba likombwa? Paulusi n’a ñozi kuli: “Liñolo kamukana li tahile ka Moya wa Mulimu, mi li na ni tuso kwa ku luta, ni ku kolisa, ni ku nyaza, ni ku hulisa ka ku luka; kuli mutu wa Mulimu a petahale mi a talifele luli misebezi kaufela ye minde.” (2 Timotea 3:16, 17) Kacwalo, Mañolo a Kenile a tusa kuli lu “petahale mi [lu] talifele” ku eza “misebezi . . . ye minde” ya ku luta batu ka za Linzwi la Mulimu. Kono ku cwañi ka za balateleli ba likeleke za Krestendomu? Ba na ni Bibele. Buka i liñwi i kona ku tusa cwañi batu ba bañwi ku ba likombwa ze petahezi mi ni ku sa tusa ba bañwi? I kona ku eza cwalo ka ku ya ka mo l’u ngela Bibele.

6 Ka bumai, ba bañata ba ba yanga kwa keleke ha ba amuheli lushango lwa Bibele “sina Linzwi la Mulimu, mi ki lona luli.” (1 Matesalonika 2:13) Krestendomu i ezize lika ze swabisa mwa taba yeo. Ba bahulu ba bulapeli ha se ba tandile lilimo-limo za ku ituta kwa likolo za bulapeli, kana ki ba ba kona ku luta hande Linzwi la Mulimu? Kutokwa. Esi mane baituti ba bañwi ba kalisanga ku ituta kwa likolo za baprisita sina balumeli ba Bibele kono ha ba y’o li fezanga ba i honona! Ku zwa f’o, ku fita ku kutaza Linzwi la Mulimu—ili leo buñata bwa bona se ba tuhezi ku li lumela—se ba eza bukombwa bwa mufuta u sili, ili ku ikenya mwa lipuhisano za bupolitiki, ku bata ku tatulula butata bwa nyangela ka lituto za Sikreste, kamba ku koñomeka lituto za mihupulo ya batu mwa lingambolo za bona. (2 Timotea 4:3) Ka ku shutana, Bakreste ba niti ba latelela mutala wa Jesu Kreste.

7, 8. M’o Jesu n’a ngela Linzwi la Mulimu ne ku shutana cwañi ni mo ne ba li ngela ba bahulu ba bulapeli ba mwa miteñi ya hae?

7 Jesu n’a si ka tuhelela ba bahulu ba bulapeli ba mwa miteñi ya hae ku yaulula munahanelo wa hae. Niha n’a luta sikwatanyana, inge cwalo baapositola ba hae, kamba batu ba bañata-ñata, Jesu n’a itusisize hande mañolo a kenile. (Mateu 13:10-17; 15:1-11) Mukwa w’o n’o mu bisize ya sa swani ni ba bahulu ba bulapeli ba mwa miteñi ya hae. Ne ba sa lumelezangi ni hanyinyani batu-tu fela ku  nyakisisa lika ze tibile za Mulimu. Mane, hañata baluti ba mwa miteñi yeo ne ba lumela kuli litaba ze ñwi za mwa Bibele n’e li ze tibile hahulu kuli ne li sa konwi ku buhisanwa ni mutu ufi kamba ufi kwand’a muituti ya latwa ka ku fitisisa—mi niha ne ku li cwalo, ne li konwa fela ku balwa mwatasi mi toho inge i apesizwe. Ba bahulu ba bulapeli bao ne ba na ni sabo ye sa utwahali ya ku saba ku talusa likalulo ze ñwi za Bibele ye bat’o swana ni ye ne ba saba ka yona ku bulela libizo la Mulimu!

8 Kreste n’a siyo cwalo. N’a lumela kuli batu kaufela, isiñi ba sikai fela ba ba ketilwe, ne ba tokwa ku nyaka ‘manzwi kaufela a’ zwa mwa mulomo wa Mulimu.’ Jesu n’a sa tabeli ku luta sitopa sa baituti b’a sikai fela. N’a bulelezi balutiwa ba hae kuli: “Se ni mi bulelela mwa lififi, mu si bulele mwa liseli; se mu shobotelwa mwa zebe, mu si shaele mu yemi fa lituwa za mandu.” (Mateu 4:4; 10:27) Jesu n’a lakaza hahulu ku talusa zibo ya Mulimu kwa batu ba bañata-ñata ka mo ne ku konahalela kaufela.

9. Bakreste ba niti ba itusisa cwañi Bibele?

9 Linzwi la Mulimu li lukela ku ba mutomo wa ze lu luta. Ka mutala, ha lu fa ngambolo kwa Ndu ya Mubuso ya Lipaki za Jehova, hañata haki ko ku likani ku bala litimana ze ketilwe mwa Bibele. Lu tokwa ku talusa, ku tolongosha, ni ku sebelisa liñolo le li nyakisiswa. Ka mubulelelo wa swanisezo, mulelo wa luna ki ku zwisa lushango lwa Bibele fa makepe fo lu ñozwi, ni ku lu kenya mwa lipilu za bateelezi ba luna. (Nehemia 8:8, 12) Bibele hape i lukela ku itusiswa ha ku tokwahala ku fiwa kelezo kamba kalimelo. Batu ba Jehova niha ba bulela lipuo ze sa swani ni ku simuluha mwa miinelo ye shutana-shutana, kaufela bona ba kuteka Buka ye ipitezi kwa libuka kaufela—yona Bibele.

10. Lushango lo lu mwa Bibele lo lu tahile ka moya lu kona ku lu ama cwañi?

10 Lushango lwa Bibele ha lu itusiswa ka likute cwalo, lu na ni m’ata. (Maheberu 4:12) Lu susumeza batu ku eza licinceho mwa bupilo bwa bona, inge cwalo ku tuhela ku eza likezo zeo mañolo a nyaza ze cwale ka buhule, bubuki, ku lapela milimu ya maswaniso, bucakolwa, ni busholi. Lu tusize batu ba bañata-ñata ku tubula mutu wa kale ni ku apala yo munca. (Maefese 4:20-24) Ee, ha lu kuteka hahulu Bibele ku fita mihupulo kamba lizo za batu ni ku itusisa yona ka busepahali, ya kona ku lu petahalisa, ku lu konisa ku ba baluti ba Linzwi la Mulimu.

Moya wa Jehova Wa Lu Konisa

11. Ki kabakalañi moya wa Jehova o kenile ka swanelo ha u taluswa kuli ki “Mutiisapilu”?

11 Sa bubeli, ha lu nyakisiseñi kalulo yeo moya wa Jehova o kenile, kamba m’ata a sebeza, a si peta mwa ku lu konisa. Ni kamuta lu si libali kuli moya wa Jehova ki ona m’ata a matuna ka ku fitisisa a’ li teñi. Jehova u laezi Mwan’a hae ya lateha ku itusisa m’ata a matuna-tuna ao kwa ku tusa Bakreste ba niti kaufela. Ka swanelo, Jesu n’a bulezi kuli moya o kenile ki “Mutiisapilu.” (Joani 16:7) N’a susuelize balateleli ba hae ku kupa Jehova moya w’o, ili ku ba kolwisa kuli Jehova u ka ba fa ona ka buñata.—Luka 11:10-13; Jakobo 1:17.

12, 13. (a) Ki kabakalañi ha ku li kwa butokwa ku kupa moya o kenile kuli u lu tuse mwa bukombwa bwa luna? (b) Bafalisi ne ba bonisize cwañi kuli moya o kenile n’o sa sebezi ku bona?

12 Lu tokwa ku kupa moya o kenile ka zazi, sihulu kuli u lu tuse mwa bukombwa bwa luna. M’ata a sebeza ao a kona ku lu ama cwañi? A kona ku susueza muhupulo ni pilu ya luna, ku lu tusa ku cinca, ku hula, ni ku yolisa mutu wa kale ka ku apala yo munca. (Makolose 3:9, 10) A kona ku lu tusa ku ba ni mikwa ye minde hahulu ye swana ni ya Kreste. Buñata bwa luna lwa kona ku peta Magalata 5:22, 23. Litimana zeo li kolohanya miselo ya moya wa Mulimu. Wa pili ki lilato. Muselo w’o ki wa butokwa mwa bukombwa bwa luna. Libaka?

13 Lilato ki susuezo ye tuna. Ku lata Jehova ni batu ba bañwi ku susueza Bakreste ba niti ku shaela taba ye nde. (Mareka 12:28-31) Ha ku si na lilato le li cwalo, ne lu si ke lwa kona  luli ku ba baluti ba Linzwi la Mulimu. Mu lemuhe m’o Jesu n’a shutanela ni Bafalisi. Mateu 9:36 i bulela ka za Jesu kuli: “H’a bona undi wa nyangela, a ba utwela butuku, kakuli ne ba katezi, ba hasani, inge lingu ze si na mulisana.” Bafalisi ne ba ikutwa cwañi ka za batu-tu fela? Ne ba ize: ‘Haili buñata bo, bo bu sa zibi Mulao, bu kutilwe.’ (Joani 7:49) Bafalisi bao ne ba sa lati batu, kono ne ba ba nyaziseza hahulu. Kaniti, moya wa Jehova n’o sa sebezi ku bona.

14. Mutala wa Jesu wa ku bonisa lilato mwa bukombwa bwa hae u lukela ku lu susueza cwañi?

14 Jesu n’a utwelanga batu makeke. N’a ziba za butuku bwa bona. N’a ziba kuli ne ba nyandisizwe, ku katala, ni ku hasanywa inge lingu ze si na mulisana. Joani 2:25 i lu bulelela kuli Jesu “n’a ziba se si li teñi ku mutu.” Ka ku ba kuli n’a li yena ya n’a sebeleza Jehova ka nako ya pupo, Jesu n’a utwisisa hahulu mo ba inezi batu. (Liproverbia 8:30, 31) Kutwisiso yeo ne i tungisize lilato la hae. Haike lilato le li cwalo i be lona le li lu susueza mwa musebezi wa luna wa bukutazi! Haiba lu ikutwa kuli lwa kona ku eza zwelopili mwa taba yeo, haike lu kupe Jehova moya o kenile mi lu eze ka ku lumelelana ni litapelo za luna. Jehova u ka lu alaba. U ka lu fa m’ata ao a’ sa konwi ku tibelwa, kuli a lu tuse ku likanyisa hahulu Kreste, ya n’a kona ka ku tala ku shaela taba ye nde.

15. Manzwi a Isaya 61:1-3 n’a ama cwañi Jesu mi hape ni ku nyaza bañoli ni Bafalisi ka nako ye swana?

15 Ku kona kwa Jesu ne ku zwelela kai? N’a ize: “Moya wa Mulena u fahalimw’a ka.” (Luka 4:17-21) Ee, Jehova ka sibili n’a ketile Jesu ka moya o kenile. Jesu n’a sa tokwi bupaki bo buñwi. Kana ba bahulu ba bulapeli ba mwa miteñi ya hae ne ba ketilwe ka moya o kenile? Kutokwa. Mi hape ne ba sa koni ku peta Isaya 61:1-3, yeo Jesu n’a balile ka ku tumusa ni ku bulela kuli ne i talusa yena ka sibili. Ha mu bale litimana zeo, mi mu iponele kuli bañoli ni Bafalisi ba baipi bao ne ba sa swaneli. Ne ba si na taba ye nde ya ku bulelela babotana. Mi ne ba kona ku lukulula cwañi bahapiwa ni ku kwalula meto a libofu? Kwa moya, bona ka sibili ne ba li libofu mi ne ba li mwa butanga bwa milao ya batu! Ka ku sa swana ni batu bao, kana luna lu ba ba kona ku luta batu?

16. Batu ba Jehova ba kona ku ba ni buikolwiso mañi ka za ku kona kwa bona ka ku ba likombwa?

16 Ki niti kuli ha lu si ka ituta kwa likolo ze pahami za Krestendomu. Ha lu si ka ketiwa ku ba baluti kwa likolo za lituto za bulapeli. Kacwalo, kana ha lu ba ba kona? Kutokwa! Ku ketiwa kwa luna sina Lipaki za Jehova ku zwa ku Yena. (Isaya 43:10-12) Ha lu kupa moya wa hae ni ku eza ka ku lumelelana ni tapelo ya luna, u zibe lu ba ba ipitezi hahulu mwa ku kona. Ki niti kuli ha lu si ka petahala mi lu fitelwa kwahule-hule ki mutala wa n’a tomile Muluti yo Mutuna, yena Jesu. Niteñi, kana ha lu itebuhi kuli Jehova u itusisa moya wa hae ku lu konisa ni ku lu bakanya ka ku ba baluti ba Linzwi la hae?

Kopano ya Jehova Ya Lu Konisa

17-19. Mikopano ya ka viki ye ketalizoho ye fiwa ka kopano ya Jehova i tusa cwañi ku lu konisa ka ku ba likombwa?

17 Cwale ha lu buhisaneñi nzila ya bulalu yeo ka yona Jehova a lu konisa ku ba baluti ba Linzwi la hae—yona puteho, kamba kopano ya hae ya fa lifasi, y’e lu luta ku ba likombwa. Ka mukwa ufi? Mu hupule fela ka za tukiso ya litaelo ye lu na ni yona! Mwa viki, lu fumanehanga kwa mikopano ya Sikreste ye ketalizoho. (Maheberu 10:24, 25) Lu kopananga mwa likwata ze nyinyani kwa Tuto ya Buka ya Puteho kuli lu ikole tuto ye tungile ya Bibele ka ku itusisa buka ya tuto ye tahiswa ka kopano ya Jehova. Ka ku teeleza ni ka ku alaba, lwa lutana ni ku susuezana. Hape lu amuhela litaelo za ka butu ni ku iswa mamelelo ki muokameli wa tuto ya buka. Kwa Mukopano wa Nyangela ni kwa Tuto ya Tora ya ku Libelela, lu ifepa lico za kwa moya ze tiisa.

18 Sikolo sa Bukombwa sa Teokratiki sa luna si lukiselizwe ku lu luta mwa ku lutela. Ka ku itukiseza lingambolo za baituti, lu ituta mwa  ku itusiseza Linzwi la Mulimu ku luta fa litaba ze fitana-fitana. (1 Pitrosi 3:15) Kana mu kile mwa fiwa ngambolo fa taba ye ne mu bona kuli mwa i ziba, konji ku fumana kuli mu ituta se sinca ka za yona? Hañata ki mona mo ku ezahalelanga cwalo. Ha ku na nto ye ñwi ye shemuna zibo ya luna kwand’a ku i luta ba bañwi. Niha ne lu si ke lwa fiwa ngambolo luna ka sibili, lu sa kona ku ituta ku ba baluti ba ba bukwala. Lu ituta mikwa ye minde ku muituti ni muituti, mi lwa kona ku bona mwa ku likanyiseza yona mikwa yeo.

19 Mukopano wa Sebelezo ni ona u lukiselizwe ku lu konisa ku ba baluti ba Linzwi la Mulimu. Ka viki, lu ikolanga lingambolo, lipuhisano, ni liponiso ze mafulofulo ze lukiselizwe ku lu tusa mwa bukombwa. Lu ka itusisa tahiso ifi? Lu kona ku tatulula cwañi makulutendano a mañwi mwa bukombwa bwa luna bwa fa nyangela? Ki mikutalezo ifi ye lu na ni yona ye lu kona ku itusisa? Ki nto mañi ye ka lu tusa ku ba baluti ba ba bukwala hahulu ha lu eza misipili ya makutisezo ni ku zamaisa lituto za Bibele? (1 Makorinte 9:19-22) Lipuzo ze cwalo li tatubiwa ni ku buhisanwa ka butungi kwa Mukopano wa Sebelezo. Buñata bwa likalulo za mukopano li tomile fa litaba ze mwa Bukombwa bwa Luna bwa Mubuso, siitusiso se siñwi se si lukiselizwe ku lu konisa mwa musebezi wa luna wa butokwa.

20. Lu kona ku tusiwa cwañi ka ku tala ki mikopano ya puteho ni ye mituna?

20 Ka ku itukiseza mikopano ni ku fumaneha teñi mi ni ku sebelisa mwa musebezi wa luna wa ku luta ze lu itutile, lu fiwa lituto ze ñwi. Kono ku sa na ni ze ñwi. Lu na ni mikopano ye mituna ni ku fita—ya mupotoloho ni ya sikiliti—ye lukiselizwe ku lu konisa ku ba baluti ba Linzwi la Mulimu. Mi lu nyolelwanga ku teeleza ka tokomelo ni ku sebelisa kelezo ye cwalo!—Luka 8:18.

21. Ki bupaki mañi bo bu bonisa kuli ku lutiwa kwa luna ku bile ko ku sebeza, mi ya lumbiwa ki mañi?

21 Kana tuto ya Jehova i bile ye sebeza? Ha lu nyakisiseñi bupaki. Ka silimo, batu ba ba eza likiti ze mianda-nda ba sweli ku tusiwa ku ituta lituto ze mutomo za Bibele ni ku lutiwa ku pila ka ku lumelelana ni z’a tokwa Mulimu ku bona. Lu sweli ku ekezeha mwa buñata, kono ha ku na ni yo mukana ku luna ya kona ku lumbiwa kabakala zeo. Lu lukela ku nga miinelo ka mo i inezi luli, ka mwa n’a ezelize Jesu. N’a ize: “Ha ku na mutu ya ka ta ku na, konji h’a ka hohiwa ki Ndate ya ni lumile.” Sina baapositola ba kwaikale, sihulu lu batu fela ba ba si ka ituta. (Joani 6:44; Likezo 4:13) Ku kona kwa luna ku itingile ku Jehova, ya hohela kwa niti ba ba sepahala. Paulusi n’a talusize hande taba yeo ha n’a ize: “Na ni calile, Apolosi u selaezi mezi; kono ya melisize, ki Mulimu.”—1 Makorinte 3:6.

22. Ki kabakalañi ha lu sa lukeli ku zwafa hahulu ka za ku abana ka ku tala mwa bukombwa bwa Sikreste?

22 Ee, Jehova Mulimu u sweli ku lu tusa hahulu mwa musebezi wa luna wa ku ba baluti ba Linzwi la hae. Haki kamita lu kana lwa ikutwa ku kona ku ba baluti. Kono mu si libali kuli Jehova ki yena ya hohela batu ku yena ni ku Mwan’a hae. Jehova ki yena ya lu konisa ku kombwekela ba banca ka Linzwi la hae, moya wa hae o kenile, ni kopano ya hae ya fa lifasi. Haike lu amuhele tuto ya Jehova ka ku sebelisa lika ze nde z’a sweli ku lu fa cwale za ku lu konisa ku ba baluti ba Linzwi la Mulimu!

Ne Mu Ka Alaba Cwañi?

• Bibele i lu konisa cwañi ku peta musebezi wa bukutazi?

• Moya o kenile u peta kalulo mañi mwa ku lu konisa ku ba likombwa?

• Kopano ya Jehova ya fa lifasi i mi tusize mwa linzila lifi ku kona ku ba mukutazi wa taba ye nde?

• Ki kabakalañi ha lu kona ku ba ni buikolwiso ha lu zwela mwa bukombwa?

[Lipuzo za Tuto]

[Siswaniso se si fa likepe 25]

Ka ku ba muluti wa Linzwi la Mulimu, Jesu n’a bonisize lilato kwa batu