Mu ye kwa litaba za mwahali

Mu ye kwa litaba za mwahali

Baezi ba Linzwi La Mulimu Ba Fumana Tabo

Baezi ba Linzwi La Mulimu Ba Fumana Tabo

 Baezi ba Linzwi La Mulimu Ba Fumana Tabo

“Lu lemuha kuli mukopano wo, ki o muñwi wa litukiso za Jehova za ku lu lukiseza misebezi ye miñwi ya Mubuso,” ki mwa n’a bulelezi yo muñwi wa babuleli ba kwa makalelo a Mukopano wa Sikiliti wa Lipaki za Jehova wa “Baezi ba Linzwi la Mulimu.” N’a zwezipili kuli: “Lu itukiselize ku laelwa ka za bupilo bwa lubasi bo bu tabisa, ku susuezwa ku kumalela kopano ya Jehova, ku susueza ku sa fokola mwa sebelezo ya luna ya Mubuso, ni ku hupuzwa ka za tokwahalo ya ku tona.”

KU KALA kwa mafelelezo a May 2000, bolule-lule ba baezi ba linzwi la Mulimu ni balikani ba bona ne ba ile kwa libaka ze likiti-kiti mwa lifasi kaufela kuli ba yo fiwa taelo ya butokwa hahulu ya mwa Bibele. Ne ba itutileñi kwa mukopano wo wa mazazi a malalu?

Lizazi la Pili—Ku Sa Libala Lituso za Jehova

Mwa ngambolo ya pili, muina-situlo n’a kupile baputehi kuli ba ipumanele limbuyoti ze zwa mwa ku lapela Jehova ka buñwi fa mikopano. Baputehi kaufela ne ba sepisizwe kuli tumelo ya bona i ka ekezeha ni kuli silikani sa bona ni Jehova ka butu si ka tiiswa.

“Mulimu ya tabile” wa ziba se lu tokwa kuli lu be ba ba tabile ka butu. (1 Timotea 1:11, NW) Kacwalo, ngambolo ye li “Ku Eza Tato ya Mulimu Ku Tisa Tabo” ne i koñomekile kuli Linzwi la Jehova, yona Bibele, i bonisa mupilelo o munde ka ku fitisisa. (Joani 13:17) Lipuhisano ze sikai ni be se ba bile Lipaki za Jehova ka nako ye telele ne li bonisize m’o ku eza tato ya mulimu mwa miinelo ye fitana-fitana ku tiseza kuli lu be ni mulelo mwa bupilo. Ngambolo ye tatama ye li, “Mu Tabele Hahulu Bunde bwa Jehova,” ne i koñomekile kuli Bakreste, ka ku ba “ba ba likanyisa Mulimu,” ba bata ku tahisa “bunde kaufela” mwa bupilo bwa bona. (Maefese 5:1, 9) Nzila ye ñwi ye ipitezi ya ku eza seo ka yona ki ka ku kutaza taba ye nde ni ku tahisa balutiwa.—Samu 145:7.

Puhisano ye li “Mu Tiye Inge Ba Ba Bona Ya Sa Bonwi” ne i bonisize ka m’o tumelo ye tiile i lu tuseza ku “bona” Mulimu ya sa bonwi. Mubuleli n’a talusize m’o batu ba ba lata za kwa moya ba lemuhela mikwa ya Mulimu, hamohocwalo ni buikoneli bwa hae bwa ku ziba mane ze lu nahana. (Liproverbia 5:21) Be ne ba buhisanwi ni bona ne ba kandekile ze ba ezize kuli ba be ni tumelo ye tiile ni ku eza za kwa moya ku ba za pili mwa bupilo bwa bona.

Kalulo ya kakusasana ne i felile ka ngambolo ye tuna ye li, “Mu Lumbeke Jehova—Muezi wa Ze Komokisa.” Ne i tusize baputehi ku utwisisa kuli ka mo lu itutela za Jehova, ki ka mo lu bela ni mabaka a mañata a ku mu lumbeka ka ku ba Muezi wa ze komokisa. Mubuleli n’a ize: “Ha lu nze lu kengeyela pupo ya Mulimu ye makaza ni ze komokisa kaufela zeo a sweli ku lu ezeza cwale, buitebuho bwa ka pilu yote bu lu susueza ku mu lumbeka. Ha lu yeya limakazo za n’a ezelize sicaba sa hae kwamulaho, lu bata ku mu lumbeka. Mi ha lu nahana lisepiso za ze komokisa zeo Jehova a  na ni ku eza, lu kala hape ku tembauka linzila za ku talusa ka zona buitebuho.”

Kalulo ya manzibwana ne i kalile ka ngambolo ye li “Mu Si Ke Mwa Katala ku Eza Hande,” ye n’e hupulisize baputehi bote kuli lisineneketo za lifasi le li paka kuli mafelelezo a fakaufi. (2 Timotea 3:1) Kono ka ku sa katala, lwa kona ku bonisa kuli lu “ku ba ba tiiseza mwa tumelo, ku pilisa mioya ya luna.”—Maheberu 10:39.

Ki kelezo mañi ya mwa Bibele ye n’e filwe ka za bupilo bwa lubasi? Ngambolo ya pili ya ka ku tatamana fa mukopano, ye li “Mu Utwe Linzwi la Mulimu,” ne i kalile ka ngambolo ye li “Ha Mu Keta Sinyalana ni Yena.” Ku keta wa ku nyalana ni yena ki ye ñwi ya likatulo ze tuna ka ku fitisisa ze ezwa ki batu. Kacwalo, Bakreste ha ba mateli mwa linyalo kono ba litela ku fitela ba hula hande, mi ba nyalela ‘fela ku Mulena.’ (1 Makorinte 7:39) Kalulo ya bubeli ya ngambolo yeo ya ka ku tatamana ne i nyakisisize takazo ya Jehova ya kuli mabasi kaufela a Bakreste a kone ku ba mabasi a’ tiile kwa moya, mi ne i file linzila ze sebeza za mwa ku ezeza cwalo. Kalulo ya mafelelezo ne i hupulisize bashemi kuli ku luta bana ba bona ku lata Mulimu ku kala ka lilato la bona bashemi ku yena.

Lisupo ze ne filwe mwa ngambolo ye li “Mu Tokomele Mabulatwi ni Lusebo” ne i tusize bote ku bona kuli nihaike kuli lika ze komokisa za ezahalanga, lu swanela ku ba ni maseme, isiñi ku lumela-lumela fela lika, ha lu utwa lipiho ze nyangumuna. Ku hande kwa Bakreste ku bulela ka ze ba ziba kuli ki za niti, ze cwale ka taba ye nde ya Mubuso. Ba bañata ne ba fumani kuli ngambolo ye tatama ye li “Ku Tiyela ‘Muutwa mwa Mubili,’” ne i ba omba-ombile ni ku ba tiisa hahulu. Ne i ba tusize ku bona kuli niha lu unjamwi ki litiko, Jehova u kona ku lu tiisa ka moya wa hae o kenile, Linzwi la hae, ni ka kopano ya mizwale ba luna ba Sikreste. Ne ku fumanwi susuezo ye tuna ku za n’a ipumani ku zona muapositola Paulusi ze swana.—2 Makorinte 12:7-10; Mafilipi 4:11, 13.

Lizazi la pili ne li felile ka ngambolo ye li “Ku Zamaelela ni Kopano ya Jehova.” Likalulo ze talu m’o kopano ya Mulimu i zwezipili ne li nyakisisizwe: (1) liseli la kwa moya le li zwa ku Jehova le li sweli ku utwisiseha hahulu, (2) bukombwa bwa lu file Mulimu, ni (3) licinceho za ka bunako mwa miezezo ya lika mwa kopano. Mubuleli kiha n’a bulezi ka buikolwiso kuli: “Lu cisehezi ze sa taha  kwapili.” A buza kuli: “Kana kwa kona ku ba ni kakanyo ka za kuli lu na ni mabaka a mande a ku bukeleza buikolwiso bo ne lu na ni bona kwa makalelo kuli lu y’o fita ni bona cwalo kwa mafelelezo?” (Maheberu 3:14) Kalabo ne i itunumanezi. Kwa latelela ku zwiswa kwa broshuwa ye nca ye li Mwa Kona ku Ba Mulikan’a Mulimu! I ka tusa hahulu mwa ku luta batu ba ba si ka kena hande sikolo kamba ba ba sa koni ku bala hande kuli ba itute ka za Jehova.

Lizazi la Bubeli—Mu Zwelepili ku Talusa Misebezi ya Mulimu ye Komokisa

Hamulaho wa ku nyakisisa liñolo la zazi, lizazi la bubeli la mukopano la zwelapili ka ngambolo ya ka ku tatamana ye li “Likombwa za Linzwi la Mulimu.” Kalulo ya pili ya yona ngambolo yeo ne i nyakisisize ku konda kwa cwale kwa musebezi wa luna wa ku kutaza mwa lifasi kamukana. Kono buitiiso bwa luna mwa musebezi wo bu hanyezwa ki ba bañata, ba ba hana lushango lwa Mubuso. Ba sikai be se ba bile bahasanyi ka nako ye telele ne ba talusize mo ba bukelelize tabo ya bona mwa bukombwa ka ku sileleza minahano ni lipilu za bona kuli ba kone ku talimana ni likulutendano la ku sa iswa pilu kamba ku hanyezwa. Kalulo ya bubeli ne i hupulisize baputehi kuli Lipaki za Jehova ba satalala kuli ba ambolise batu kai ni kai, ka ku tandalelwa ni ka ku sa tandalelwa. Mi kalulo ya mafelelezo ne i talusize linzila ze ñata zeo ka zona Bakreste kaufela ba kona ku yandululela bukombwa bwa bona bwa ka butu. Mubuleli n’a koñomekile kuli, kuli lu yandulule sebelezo ya luna, lu swanela ku eza pili za Mubuso wa Mulimu, ku eza cwalo niha ku ka ama ku pitihanywa ni buitomboli.—Mateu 6:19-21.

Bakeñisa kuli lu pila mwa lifasi le li sa lumeli ili mo ku tezi takazo ya bufumu ye tulile tikanyo, ngambolo ye li “Mu Ise Pilu kwa Bulapeli Mu Nze Mu Ipilisa” ne i tile ka nako ye swanela luli. Ka ku toma ze ñwi za lipulelo za hae fa 1 Timotea 6:6-10, 18, 19, mubuleli n’a bonisize m’o bulapeli bu tuseza Bakreste ku tokolomoha ku lata mali, ko ku kona ku ba yembulula ni ku ba tiseza hahulu masitapilu. N’a koñomekile kuli ku si na taba ni muinelo wa luna ku za bufumu, tabo i itingile fa swalisano ya luna ni Jehova  ni fa buiketo bwa luna bwa kwa moya. Ba bañata ne ba amilwe hahulu ki lisupo ze ne tahisizwe mwa ngambolo ye li “Ku Sa Swabisisa Mulimu.” Taba ya kuli Jehova ni kamuta ha libali Lipaki za hae ba ba sepahala ne i koñomekilwe. Mutala o mutuna ka ku fitisisa wa Jesu Kreste—y’o “inz’e li Yena, ni mabani, ni kacenu, ni ku ya ku ile”—u ka tusa ba bañata ku zwelapili ku mata mwa takano ya bupilo ka buitiiso.—Maheberu 13:8.

Ngambolo ya mafelelezo kakusasana ne li ya kolobezo—yeo kamita i banga kezahalo ye tuna fa mikopano ye mituna ya Lipaki za Jehova. Ki tabo ku bona ba ba sa z’o ineela ba hata mwa n’a hatile Jesu ka ku itahisa kuli ba kolobezwe mwa mezi! (Mateu 3:13-17) Ba b’a nga muhato wo kaufela se ba petile ze ñata mwa ku ba baezi ba linzwi la Mulimu. Mi hape ha ba kolobezwa ba fita fa ku ba likombwa za taba ye nde ba ba sumekezwi, ili ba ba fumana tabo ye tuna mwa ku ziba kuli ba abana mwa ku bonisa bukeni bwa libizo la Jehova.—Liproverbia 27:11.

Kelezo ye nongile fa taba ne i filwe mwa ngambolo ye li “‘Ku Keta Ze Nde ku Ze Maswe’ ku Tokwa Yeloseli.” Lipimo za silifasi za ze lukile ni ze fosahezi haki ze likani ni hanyinyani. Kacwalo lu tokwa ku itinga fa lipimo za Jehova. (Maroma 12:2) Bote ne ba susuelizwe ku eza ka t’ata kuli ba be ni kutwisiso ye nepahezi ya linzila za Mulimu ni ku hula kwa moya. Kihona cwale kutwisiso ya luna ha se lu i twaelize i ka lutiwa “ku keta ze nde ku ze maswe.”—Maheberu 5:11-14.

 Kiha ne ku latelezi ngambolo ya ka ku tatamana ye li “Mu Tukufalelwe ku Hulisa Lilato la Lika Za kwa Moya.” Bakreste ba niti ba lemuha butokwa bwa ku hulisa lilato la bona la lika za kwa moya. Zeo li tokwa ku sebeza ka t’ata, ili ku bala, ku ituta, ni ku yeya. (Mateu 7:13, 14; Luka 13:24) Batu ba ba lata lika za kwa moya hape ba ‘lapela ka Moya ka nako ni nako, ka litapelo kaufela ni ka likupo.’ (Maefese 6:18) Lu lemuha kuli litapelo za luna li bonisa butungi bwa tumelo ya luna ni buipeyo bwa luna, lilato la luna kwa lika za kwa moya, hamoho cwalo ni ze l’u nga ku ba “linto ze nde ku fita.” (Mafilipi 1:10) Hape ne ku koñomekilwe butokwa bwa ku ba ni swalisano ye silikani, ye lilato ni Jehova ye swana ni yeo mwana ya utwa a na ni yona ni ndat’ahe ya sishemo. Ha lu ba bulapeli fela—nihaike kuli bulapeli bwa luna ki bwa niti—kono lu bata ku ba ni tumelo ye tiile, ‘inge lu bona Mulimu.’—Maheberu 11:6, 27.

Taba ya ku hula kwa moya ne i nyakisisizwe hape mwa ngambolo ye li “Mu Bonise Zwelopili ya Mina.” Ne ku nyakisisizwe likalulo ze talu za zwelopili ye cwalo: (1) ku ekeza kwa zibo, kutwisiso, ni butali, (2) ku tahisa muselo wa moya, ni (3) ku peta buikalabelo bwa luna ka ku ba lilama za lubasi.

Kwa mafelelezo a ngambolo ye ungula lizazi leo ye li, “Ku Zamaya mwa Liseli Le Li Zwelapili la Linzwi la Mulimu,” baputehi ne ba tabile ku amuhela buka ye nca ye li, Bupolofita bwa Isaya—Liseli kwa Batu Kamukana I. Yeo ki ya pili kwa libuka ze peli ze ka nyakisisa buka ya Isaya ya mwa Bibele ka likauhanyo. “Buka ya Isaya i na ni lushango lo lu ama luna kacenu,” ki mwa n’a bulelezi mubuleli. A ekeza kuli: “Ee, buñata bwa bupolofita bwa yona ne bu talelelizwe mwa mazazi a Isaya. . . . Nihakulicwalo, buñata bwa bupolofita bwa Isaya bu sweli bwa talelezwa kacenu, mi bo buñwi bona bu ka talelezwa mwa lifasi le linca l’a sepisize Mulimu.”

Lizazi la Bulalu—Mu Be Baezi Ba Linzwi la Jehova

Lizazi la mafelelezo fa mukopano ne li kalile ka nyakisiso ya liñolo la zazi. Kiha ne ku latelezi ngambolo ya ka ku tatamana ye li “Bupolofita bwa Zefania bwa Butokwa ku Ba Ba Eza Tato ya Mulimu.” Likalulo ze talu za ngambolo yeo ya ka ku tatamana ne li bonisize kuli Jehova u ka tisa ziezi ku bao cwale ba hana ku utwa temuso ya hae, sina mwa n’a ezelize mwa miteñi ya Juda ye ne i sa utwi. Bakeñisa kuli ba foseza Mulimu, ba ka zamaya-zamaya inge libofu ze si na wa ku li tusa, ba sa lukuluhi. Kono Bakreste ba niti ba zwelapili ku bata Jehova ka busepahali, mi ba ka silelezwa mwa lizazi la buhali bwa Mulimu. Hape, ba ikola limbuyoti ze  ñata nihaiba cwale. Ba na ni tohonolo ye tuna ya ku bulela ka “milomo ye kenile” ya niti ya mwa Bibele. (Zefania 3:9) Mubuleli n’a ize: “Ku bulela ka milomo ye kenile ha ku tokwi fela ku lumela niti ni ku i luta ba bañwi. Ku tokwahala hape kuli muzamao wa luna u lumelelane ni milao ni likuka za Mulimu.”

Baputehi ne ba libelezi ka tabo drama ye li “Mitala Ye Li Litemuso mwa Miteñi Ye.” Yona drama yeo ya ba ba apezi mikanjo ne i bonisize ka m’o Maisilaele ba ba likiti-kiti ne ba bulaezwi kwa museto wa Naha ya Sepiso kakuli ne ba libezi Jehova mi ne ba shembilwe ki basali ba mahedeni kuli ba buke ni ku eza bulapeli bwa buhata. Yo muñwi ya zibahala hahulu kwa batu ba mwa drama yeo, ya bizwa Jamini, pili n’a lyangani mwahal’a ku coezwa ki basali ba Mamoabi ni ku bata ku bukeleza buipeyo bwa hae ku Jehova. Lipulelo ze fosahezi ni maikuto a’ kwasheka a Zimiri ya n’a sa lumeli ne li iponahalize hahulu. Tumelo ni buipeyo bwa Finehasi ni zona ne li bonahezi. Kozi ya ku eza sango ni ba ba sa lati Jehova ne i bonisizwe hande-nde.

Litaba za drama ki zona ze ne kanatezwi ki ngambolo ye ne i latelezi ye li, “Mu Si Ke Mwa Ba Bautwi Fela Ba Ba Libala.” Nyakisiso ya 1 Makorinte 10:1-10 ne i bonisize kuli Jehova u likanga ku utwa kwa luna kuli a bone haiba lu swanela ku ba ni sanda mwa lifasi le linca. Ku ba bañwi, litakazo za kwa mubili li ba palelwisa ku eza lika za kwa moya nihaiba cwale, ha lu li bukaufi ni ku kena mwa muinelo o munca. Bote ne ba susuelizwe ku sa latehelwa ki kolo ya ‘ku kena mwa pumulo ya Jehova.’—Maheberu 4:1.

Ngambolo ya nyangela ne i li “Libaka Ha Lu Swanela ku Nahana Misebezi ya Mulimu ye Komokisa.” “Misebezi ye komokisa” ya Jehova i bonisa butali bwa hae ni m’ata a hae fahalimw’a pupo ye lu bona kai ni kai. (Jobo 37:14) Lipuzo li sikai ze shwashwata litaba ili za n’a buzize Jehova ne li konile ku tiseza Jobo ku lemuha m’ata a Mubupi ya m’ata ote. Hape Jehova u ka ezeza batanga ba hae ba ba sepahala “misebezi ye komokisa” kwapili. Mubuleli n’a felize ka ku bulela kuli: “Mabaka ki a mañata ha lu swanela ku nahana misebezi ye komokisa ya Jehova—ili z’a ezize kwamulaho, z’a sweli ku eza kacenu mwa pupo ye mwahal’a luna, ni z’a sepisa ku eza kwapilinyana.”

Hamulaho wa nyakisiso ya ngambolo ye kusufalizwe ya tuto ya viki yeo ya Tora ya ku Libelela, ngambolo ya mafelelezo ne i filwe. Yona ngambolo ye nyangumuna yeo ye li “Mu Itebuhe Hahulu Tohonolo ya Mina ya ku Ba Baezi ba Linzwi la Mulimu,” ne i koñomekile kuli ku ba baezi ba linzwi la Mulimu ki nto ye tompehisa. (Jakobo 1:22) Baputehi ne ba hupulisizwe kuli tohonolo ya luna ya ku ba baezi ba Linzwi la Mulimu ki ye ipitezi, mi ka mo lu ka bela ni yona ka nako ye telele, ki ka mo lu ka itebuhela yona hahulu. Baputehi kaufela ne ba susuelizwe ku nahana susumezo ye tusa ya mukopano wa sikiliti wo mwa takazo ya bona ya ku ba baezi ba linzwi la Mulimu ka ku tala luli. Yeo ki yona nzila inosi ya ku fumana ka yona tabo ye tuna ka ku fitisisa ye konahala.

[Mbokisi/Siswaniso se si fa likepe 25]

Mwa Kona ku Ba Mulikan’a Mulimu!

Lizazi la pili manzibwana ne ku zwisizwe broshuwa ye nca ye bizwa Mwa Kona ku Ba Mulikan’a Mulimu! Mwa libaka ze ñata mwa lifasi ku tokwahala tuto ya Bibele ye nolofalizwe, mi broshuwa yeo i ka fa yona tuto yeo. I ka tusa hahulu batu ba ba si ka ituta hahulu kamba ba ba sa koni ku bala hande.

[Mbokisi/Maswaniso a fa likepe 26]

Bupolofita bwa Isaya—Liseli kwa Batu Kamukana

Be ne ba putehani kwa mukopano ne ba tabile ku amuhela Volyumu ya pili ku ze peli za hatiso ye li Bupolofita bwa Isaya—Liseli kwa Batu Kamukana. Mwa hatiso ye, se si koñomekwa ki mo bu sebeleza bupolofita bwa Isaya mwa miteñi ya luna.