Mu ye kwa litaba za mwahali

Mu ye kwa litaba za mwahali

Kana Linzwi la “Mukreste” Li Zamaya Li Latehelwa ki Taluso ya Lona?

Kana Linzwi la “Mukreste” Li Zamaya Li Latehelwa ki Taluso ya Lona?

 Kana Linzwi la “Mukreste” Li Zamaya Li Latehelwa ki Taluso ya Lona?

KU BA Mukreste ku talusañi? Ne mu ka alaba cwañi? Batu ba ba nopa-nopilwe fela ba mwa linaha ze shutana-shutana ne ba buzizwe yona puzo yeo, mi ki ze likalabo ze ne ba file ba bañwi:

“Ku latelela Jesu ni ku mu likanyisa.”

“Ku ba mutu yo munde ni ku ikabela lika ni ba bañwi.”

“Ku amuhela Kreste ku ba yena Mulena ni Mupulusi.”

“Ku ya kwa Misa, ku lapela ka Rosari, ni ku ca Silalu.”

“Ha ni kolwi kuli ku ba Mukreste konji ha u ya kwa keleke.”

Nihaiba lidikishinari li fa litaluso ze fapana-fapana. Mane hatiso ye ñwi i fa litaluso ze lishumi za linzwi la “Mukreste.” Zona litaluso zeo li kala ka “ku lumela kamba ku ba yo muñwi wa bulapeli bwa Jesu Kreste” ku yo fita ku “mutu ya kutekeha kamba y’a ngiwa ku ba yo munde.” Ha ku komokisi kuli ba bañata ba fumana t’ata ku talusa kuli ku ba Mukreste ku talusañi.

Moya wa Tukuluho

Kacenu, mwahal’a ba ba ipala ku ba Bakreste, nihaiba ba ba mwa bulapeli bo bu swana, mutu u kona ku fumana mibonelo ye shutana-shutana ka za litaba ze cwale ka za ku buyelelwa ki Mulimu kwa Bibele, tuto ya za ku ipilaula kwa lika, ku ikenya kwa keleke ku za bupolitiki, ni za mutu ku abana litumelo za hae ni ba bañwi. Litaba ka za muzamao, ze cwale ka za ku sulula limba, kalombe, ni munna ni musali ku pila hamoho ba si ka nyalana, hañata li tisanga likañi le lituna. Ku si na kuli cwañi ze tisa zeo kaufela ki moya wa tukuluho.

Ka mutala, hatiso ye bizwa Christian Century i biha kuli kuta ye ñwi ya keleke ya Protestanti, cwanoñu fa ne i ezize liketisa za ku fa tukuluho kwa keleke kuli i “kete muzamaisi yo muñwi ya n’a ipatuluzi ku ba muezi wa kalombe kuli a be mwa sitopa sa bazamaisi ba keleke.” Baituti ba bañwi ba bulapeli mane ba file mubonelo wa kuli mutu h’a tokwi ku lumela ku Jesu kuli a fumane puluso. Piho ye mwa The New York Times i talusa kuli bona baituti bao ba lumela kuli Majuda, Mamozilemu, ni ba bañwi “mwendi ni bona ba ka kona ku ya kwa lihalimu [sina mo ba kana ba konela Bakreste].”

Haiba mwa kona, mu nahane ku bona mutu ya lumela kuli bufumu bu lukela ku abiwa mwahal’a batu kaufela a nze a yemela muinelo wa batu ku ikubukanyeza tutu ba nosi, kamba ku bona mutu ya lumela kuli batu ba lukela ku iketela babusi ba bona inge a yemela puso ya mutu a li muñwi ya buhateleli, kamba ku bona mutu ya lumela kuli maino a batu a lukela ku babalelwa a nze yemela ku lemakiwa kwa likota mutakafululele. Mu ka li, “mutu y’o h’a koni luli ku ba ya lumela kuli bufumu bu lukela ku abiwa, kamba ya lumela kuli batu ba lukela ku iketela babusi, kamba kuli maino a batu a lukela ku babalelwa. Mi ha mu bulela cwalo mu nepile. Kono, ha mu nyakisisa mibonelo ye fapana-fapana ye ba na ni yona batu ba ba ipala ku ba Bakreste kacenu, mu bona litumelo ze shutanela kwahule-hule ni ku lwanisana ni za n’a lutile Jesu Kreste, yena Musimululi wa Bukreste. Seo si bonisañi ka za mufuta wa Bukreste bwa bona?—1 Makorinte 1:10.

Takazo ya ku cinca lituto za Bukreste kuli li lumelelane ni moya o li teñi i kalile kale, sina mo lu ka bonela. Mulimu ni Jesu Kreste ba ikutwa cwañi ka za zona licinceho zeo? Kana likeleke ze yemela lituto ze sa zweleli ku Kreste za kona luli ku ipiza kuli ki za Sikreste? Lipuzo zeo li ka nyakisiswa mwa taba ye tatama.