“Wena Jehova, nikaanga nako yekuma kai inze ni lila kukupa tuso ku wena, kono inge usa niutwi? Nikaanga nako yekuma kai inze nikupa kuli unilamulele kwa mifilifili, kono inge usa nilamuleli?” (Habakuki 1:2, 3) Ao ki manzwi anaabulezi Habakuki, muuna yomunde yanaashemubilwe ki Mulimu. Kana kupo yahae neibonisa kuli naasina tumelo? Kutokwa ni hanyinyani! Mulimu naakolwisize Habakuki kuli kunani nako yatomile yaka felisa manyando.—Habakuki 2:2, 3.

Hamunyanda kamba mutu yomuñwi yomulata hanyanda, kukona kumibela hahulu bunolo kunahana kuli Mulimu wa liyeha kuunga muhato ni kuli kambe ungile kale muhato. Kono Bibele ilukolwisa kuli: “Jehova haliyehisi lisepiso zahae, sina mobahupulela batu babañwi kuli ki kuliyeha, kono umibonisa pilu-telele kakuli hatabeli kuli mutu ufi kamba ufi atimezwe kono utabela kuli batu kaufela babake.”—2 Pitrosi 3:9.

Atuha aeza cwalo! Jesu naapatuluzi kuli lusika loluñwi neluka iponela likezahalo zeipitezi zene kaba sisupo sa mazazi a mafelelezo a “kufela kwa lifasi.” (Mateu 24:3-42) Kutalelezwa kwa bupolofita bwa Jesu mwa linako zaluna kubonisa kuli nako ya kuli Mulimu aange muhato wa kufelisa miinelo yetaata yebakopana ni yona batu ifakaufi. *

Kono Mulimu uka felisa cwañi manyando kaufela? Jesu hanaali fa lifasi naabonisize maata anani ona Mulimu a kuli wakona kufelisa manyando a batu. Munyakisise mitala yelatelela.

Likozi za ka Taho: Jesu ni baapositola bahae hane bali fa Liwate la Galilea, liñungwa lelituna neli batile kutibisa sisepe sabona. Kono Jesu naabonisize kuli, yena ni Ndatahe banani maata a kuzamaisa lika za ka taho. (Makolose 1:15, 16) Jesu naabulezi feela kuli: “Kuza! Uli tuu!” Ki sika mañi sene siezahalile? “Moya wakuza, mi kwaombala luli.”—Mareka 4:35-39.

Matuku: Jesu naazibahala hahulu kuli naakona kufolisa libofu, lianga, hamoho cwalo ni bane bakula kanono, mbingwa ni mufuta kaufela wa buyanga. “Afolisa bane bakula kaufela.”—Mateu 4:23, 24; 8:16; 11:2-5.

Kutaela Kwa Lico: Jesu naaitusisize maata anaamufile Ndatahe kueza makazo ya kutahisa kuli lico zenyinyani libe zeñata. Bibele ibulela kuli naafepile batu babañata habeli ka nako ya bukombwa bwahae.—Mateu 14:14-21; 15:32-38.

Lifu: Litaba za batu babalaalu banaazusize Jesu kwa bafu ili zeñozwi mwa Bibele, libonisa hande kuli Jehova unani maata a kufelisa lifu. Yomuñwi wa batu banaazusize Jesu kwa bafu, naashwile ka mazazi amane.—Mareka 5:35-42; Luka 7:11-16; Joani 11:3-44.