Mu ye kwa litaba za mwahali

Mu ye kwa litaba za mwahali

Muleneñi wa Astana

 LINAHA NI BATU

Kupotela Naha ya Kazakhstan

Kupotela Naha ya Kazakhstan

BATU babapila kwa Kazakhstan nebapilanga bupilo bwa kututa-tuta. Ni kacenu, balisana babañwi ba kwa Kazakhstan batutisezanga limunanu zabona kwa mafulisezo ashutana-shutana kulikana ni nako ya mwa silimo. Ka nako ya mbumbi bainanga mwa libaka zebata za malundu ili mokunani mafulisezo amande. Mi nako ya maliha fokuwelanga hahulu litwa hainze isutelela, baisanga mitapi yabona kwa libaka zefutumala.

Batu babañwi ba kwa Kazakhstan bapila mwa litolopo zezwezipili. Nihakulicwalo, buñata bwa lizo zabona, lico, ni lika zebaezize ka mazoho libonisa bupilo bwa kututa-tuta bone bapila bo kuku wabona. Batu babapila kwa Kazakhstan baikola lika zene baikolanga bo kuku wabona, ze cwale ka litoko, lipina, mane ni lipina zelizwa fa lipangaliko zeshutana-shutana za mwa naha yabona.

Situngu sa yurt, ili situngu sesikona kututiswa ki batu  babapila bupilo bwa kututa-tuta, ki sisupo sesibonisa kuli batu ba kwa Kazakhstan bababalela libaka zebapila ku zona. Balisana basalata hahulu situngu sa yurt, mi mane mwa litolopo, batu ba kwa Kazakhstan baitusisanga situngu sa yurt hakunani likezahalo zeipitezi. Batu hape baitusisanga litungu zeo sina malobalo a bapoti. Situngu seo fokuñwi sakona kuitusiswa kwa kubonisa lika zeshutana-shutana zebonisa misebezi yebaeza basali ba kwa Kazakhstan ye cwale ka kulukela lika zeñwi fa masila, kuluka libyana zeshutana-shutana, ni kuluka masila a kuyala fafasi.

Mwahalaa situngu sa yurt

Mabasi apila mwa matakanyani a Kazakhstan aanga lipizi kuba lifolofolo za butokwa. Mwa puo ya Sikazaki, kunani manzwi afitelela 21 atalusa pizi, mi libizo leliñwi ni leliñwi linani taluso yalona, mi kunani manzwi ni lipulelo zefitelela 30 zetalusa mibala ya boya bwayona. Nihaiba kacenu, pizi ki folofolo yetula hahulu mi ikona kuungiwa kuli ki mpo ya butokwa. Mwa libaka za matakanyani, bashimani baitutanga kupahama lipizi inze basali banana.

Batu ba kwa Kazakhstan batabela hahulu kuca nama yesina masipaisi. Koumiss ki sesiñwi sa lino zebatabela hahulu batu babapila kwa Kazakhstan, ili sino sesiezizwe fa mabisi a pizi, mi sino seo sinani lituso zeñata mwa mubili. Sino sesiñwi hape sebatabela hahulu ki shubat, ili sesinunisa ni sesiwawata hanyinyani, mi sieziwanga fa mabisi a kamele.

Batu balukuluhile kupotela ofisi ya mutai wa Lipaki za Jehova mwa Almaty.

Ngwe yefumaneha mokuwanga hahulu litwa ili yesaipona-ponelwi feela, ka nako ya mbumbi iyopilanga mwa malundu a mwa naha ya Kazakhstan