Mu Nge Mihato Ye Ka Mi Tusa Ku Ikangula Hande

KANA mu sa hupula za bo Ram, ba ba bulezwi mwa taba ya pili mwa litaba ze za ka ku tatamana? Ka ku swana ni batu ba bañata mwa lifasi, bo Ram ne ba sa zibi kuli ku ba ni mucelo o munde ni mikwa ye miñwi ya ka zazi ni zazi kwa kona ku tusa mutu ku ba ni buikangulo bo bunde. Ba talusa kuli: “Taba ye li, ‘Nutritious Foods Within Your Reach,’ ye ne i hatisizwe mwa Mu Zuhe! (May 8, 2002) ne i ni tusize ku utwisisa libaka ha lu swanela ku tokomela ze lu ca.”

Bo Ram ba talusa kuli: “Sina lubasi, ne lu likile ku itusisa ze ne lu itutile mwa taba yeo. Hasamulaho wa nako, lwa lemuha kuli mibili ya luna ne se i tiile kwa matuku. Pili lu si ka kala kale ku tokomela micelo ya luna, ne lu kula-kulanga libelenge, kono ka nako ya cwale se lu kulanga libelenge ka siwela. Hape ne lu itutile linzila ze sa tuli ni ze bunolo za mwa ku fumanela mezi a kenile a ku nwa, mwa taba ye li, ‘Six Ways to Safeguard Your Health’ ye ne hatisizwe mwa Mu Zuhe!”—September 22, 2003.

“Taba ye ñwi ya mwa Mu Zuhe! ne i ni konisize ku tusa lubasi lwa ka ku ba ni buikangulo bo bunde. Taba yeo ne li ya toho ya taba ye li, ‘Soap—A “Do-It-Yourself Vaccine,”’ ye ne hatisizwe mwa Mu Zuhe! ya November 22, 2003. Lu mano feza feela ku bala taba yeo, ne lu likile ku itusisa liakalezo ze ne filwe mwateñi. Ka nako ya cwale ha lu sa tahelwanga hahulu ki matuku a meeto sina sapili.

“Mwa sibaka se lu pila ku sona, batu ha ba na taba ni za ku isileleza kwa linzi ni minañi ze atile. Kono ku buha vidio ye li, The Bible—Its Power in Your Life, * ne ku tusize lubasi lwa luna ku ituta kuli lu swanela ku isileleza kwa likokwani ze cwalo. Taba ye lu itutile yeo ni yona i lu tusa ku ba ni buikangulo bo bunde.”

Mu si ke mwa zwafa! Ha mu tokwa ku eza licinceho lifi kamba lifi, mwa kona ku kondisa hande hahulu ka ku kalisa ku eza licinceho zeo hanyinyani-hanyinyani ni ku sa itomelanga likonkwani ze mu sa koni ku kwanisa. Ka mutala, mu like ku fukuza kwa lico ze mu canga ze sa tusi hahulu mubili wa mina, ku fita ku ambuka lico zeo kaufela ka nako ye swana. Mu like ku lobalanga ka ku itahanela hanyinyani ni ku ezanga hanyinyani lipapali ze tiisa mubili. Ku ezanga lika zeo nihaiba hanyinyani ku mbubo ku fita ku sa li ezanga. Hañata ku kona ku nga nako—ili ye kona ku kwana lisunda kamba likweli—kuli mutu a kone ku twaela mukwa o munde o munca. Ka nako ya cwale, haiba mu bona kuli ha ku na ze nde ze zwa mwa buikatazo bwa mina, mu si ke mwa zwafa. Haiba mu tundamena, ku si na taba ni lika ze kona ku mi kutiseza mwamulaho, mu ka ba ni buikangulo bo bunde.

Mwa lifasi le li si ka petahala le, ha ku na mutu ya kona ku ba ni buikangulo bo bu petehile. Ha mu kula, haki kuli mwendi ha mu si ka ipabalela hande, kono mwendi ki kabakala mifokolo ya butu ye lu hozize. Kacwalo, mu si ke mwa tuhelela litaba za buikangulo bwa mina, kamba nto ifi kamba ifi, ku mi kalelwisa ni ku mi tahiseza lipilaelo. Jesu naa buzize kuli: “Ki mañi ku mina ya kona ku ekeza mazazinyana kwa butelele bwa bupilo bwa hae, ha bu mu bilaeza?” (Luka 12:25, Bibele ye Kenile, Hatiso ya 1984) Mwa sibaka sa ku bilaela, mu like ku ambuka lika ze kona ku kusufaza kwa mazazi a bupilo bwa mina ni ku tahisa kuli mu si ke mwa ikola bona hande. Ku eza cwalo kwa kona ku mi tusa ku ikola buikangulo bo bunde hahulu bo bu konahala ka nako ya cwale, ku fitela nako ye li ka taha lifasi la Mulimu le linca mo ku si ke kwa ba ni “mutu . . . ya ka ipulela kuli: Na kula.”—Isaya 33:24.

[Litaluso za kwatasi]