Kauhanyo 7

Ku Utwa Kwa Ku Sileleza

KANA n’o ka tabela ku eza nto kaufela y’o lata ku eza? Kana ku na ni linako ze ñwi fo u ikutwanga kuli kambe ku si ke kwa ba ni mutu ya ku bulelela za ku eza? Ha ku ni bulelele mo u bonela wena.—

Kono ki sifi se sinde ku wena? Kana luli ki ko kunde ku eza lika kaufela z’o lata ku eza? Kamba kana lika li banga hande ha u utwa bondat’aho ni bom’aho?— Mulimu u bulela kuli u swanela ku utwa bashemi ba hao. Kacwalo ku lukela ku ba ni libaka le linde ha u swanela ku eza cwalo. Ha lu bone nji lwa kona ku fumana libaka ha ku li cwalo.

U na ni lilimo ze kai?— Kana wa ziba lilimo za bondat’aho?— Bokukw’a hao kamba bom’aho ba na ni lilimo ze kai?— Ba pilile nako ye telele hahulu ku ku fita. Mi mutu u ituta lika ze ñata ka ku ya ka butelele bwa nako y’a pila. U utwa lika ze ñata, ku bona lika ze ñata, ni ku eza lika ze ñata ka silimo ni silimo. Kacwalo, banana ba kona ku ituta ku ba bahulu.

Kana ku na ni y’o ziba ya li mwanana ku wena?— Kana wa ziba ze ñata ku mu fita?— Ki kabakalañi ha u ziba ze ñata ku mu fita?— Ki kabakala kuli u pilile nako ye telele ku mu fita. U bile ni nako ye ñata ya ku ituta lika ze ñata ku fita yena mwanana ku wena y’o.

 Ki mañi ya pilile nako ye telele ku fita wena kamba na kamba mutu ufi kamba ufi?— Ki Jehova Mulimu. Yena u ziba ze ñata ku ku fita, mi u ziba ze ñata ku ni fita. H’a lu bulelela ku eza nto ye ñwi, i be t’ata i mane, lwa kona ku kolwa kuli nto yeo ki ye nde ku i eza. Kana wa ziba kuli niheba Muluti yo Mutuna n’a kile a fumana kuli ku utwa ku t’ata?—

Nako ye ñwi, Mulimu n’a kupile Jesu ku eza nto ye ñwi ye t’ata. Jesu n’a lapezi ka za teñi, sina ha lu kona ku iponela fa. N’a lapezi kuli: ‘Haiba wa lata, ha ku zwise komoki yeo ku na.’ Ka ku lapela cwalo, Jesu n’a bonisa kuli ku eza tato ya Mulimu haki ko ku bunolo kamita. Kono Jesu n’a felize cwañi tapelo ya hae? Kana wa ziba?—

Jesu n’a i felize ka ku bulela kuli: “Ku si ke kwa ezwa se si latwa ki na, ku ezwe se si latwa ki Wena.” (Luka 22:41, 42) Ee, n’a bata kuli ku eziwe mwa n’a batela Mulimu, isiñi mwa n’a batela yena. Mi n’a zwezipili ku eza mwa n’a batela Mulimu ku fita ku eza mwa n’a ikutwela kuli ne ku lukile.

Lu kona ku itutañi kwa taba yeo?— Lu ituta kuli kamita ki ko kunde ku eza mw’a bulelela Mulimu, niha ne ku si ke kwa ba bunolo ku eza cwalo. Kono lu ituta nto ye ñwi. Kana wa i ziba?— Lu ituta kuli Mulimu ni Jesu haki mutu a li muñwi, sina ba bañwi ha ba bulela. Jehova Mulimu ki yo muhulu mi u ziba ze ñata ku fita Mwan’a hae, yena Jesu.

Ha lu utwa Mulimu, lu bonisa kuli lwa mu lata. Bibele i li: “Ku lata Mulimu, kiha lu mamela litaelo za hae.” (1 Joani 5:3) Wa bona, kaufel’a luna lu tokwa ku utwa Mulimu. Kana ha u tabeli ku mu utwa?—

 Ha lu nge Bibele ya luna mi lu bone seo Mulimu a bulelela banana ku eza. Lu ka bala se i bulela Bibele kwa Maefese kauhanyo 6, litimana 1, 2, ni 3. I bala kuli: “Bana, mu utwe bashemi ba mina ku Mulena, kakuli ki tukelo. Kuteka ndat’aho ni m’aho (ki ona mulao wa pili o na ni sepiso), kuli za hao li konde, mi u pile mazazi a matelele mwa lifasi.”

Wa bona, Jehova Mulimu ki yena ya ku bulelela kuli u kuteke bondat’aho ni bom’aho. Ku ba “kuteka” ku talusañi? Ku talusa kuli wa utwa ze ba ku bulelela kaufela. Mi Mulimu u sepisa kuli ha u utwa bashemi ba hao, ‘za hao li ka konda.’

Teeleza ni ku kandekele likande ka za batu ba bañwi be ne ba pilisizwe bakeñisa ku utwa. Batu bao ne ba pilile kale-kale k’o mwa muleneñi o mutuna wa Jerusalema. Buñata bwa batu ba mwa muleneñi w’o ne ba si ka utwa Mulimu, kacwalo Jesu n’a ba lemusize kuli Mulimu n’a ka sinya muleneñi wa bona. Jesu hape n’a ba bulelezi mo ne ba ka punyuhela haiba ne ba lata ze lukile. N’a ize: ‘Ha mu bona Jerusalema u potolohilwe ki limpi, mu zibe kuli ku sinyeha kwa ona ku sutelezi. Yeo ki yona nako ya ku zwa mwa Jerusalema ni ku matela kwa malundu.’—Luka 21:20-22.

Sina Jesu ha n’a bulezi, masole ne ba til’o taseza Jerusalema. Masole ba Maroma ba u potoloha kaufel’a ona. Cwale, ka mabaka a’ sa zibahali, masole ba ikela. Buñata bwa batu ba hupula kuli ziyezi ne i felile. Kacwalo, ba ina mwa muleneñi w’o. Kono ki sifi seo Jesu n’a bulezi kuli ne ba swanela ku eza?— Kambe n’o pila mwa Jerusalema, n’o ka be u ezizeñi?— Be ne ba lumezi ku Jesu luli ne ba siile mandu a bona ni ku matela kwa malundu kwahule-hule ni Jerusalema.

Silimo mutumbi sa fela, mi ne ku si na se ne si ezahezi kwa Jerusalema. Mwa silimo sa bubeli, ha ku na se ne si ezahezi. Mi ni mwa silimo sa bulalu, ha ku na se ne si ezahezi. Batu ba bañwi mwendi ne  ba hupuzi kuli be ne ba matile mwa muleneñi w’o ne ba li likuba. Kono cwale mwa silimo sa bune, masole ba Maroma ba taha hape. Hape ba potoloha Jerusalema kamukan’a yona. Cwale, ku mata ne ku sa konahali. Ka nako yeo, masole bao ba sinya muleneñi w’o. Buñata bwa batu be ne ba li mwahali ba shwa, mi be ne ba siyezi ba isiwa mwa butanga.

Kono ku cwañi ku bale be ne ba utwile Jesu?— Ne ba pilile. Ne ba li kwahule ni Jerusalema. Kacwalo, ne ba si ka bulaiwa. Ku utwa ne ku ba silelelize.

Ha u utwa, kana ni wena u ka silelezwa?— Bashemi ba hao mwendi ba ka ku bulelela kuli u si ke wa lika ku bapalela mwa mukwakwa. Ki kabakalañi ha ba ku bulelela cwalo?— Ki kabakala kuli wa kona ku hatiwa ki mota. Kono zazi le liñwi u kana wa nahana kuli: ‘Ha ku na limota ka nako ye. Ha ni na ku holofala. Banana ba  bañwi ba bapalelanga mwa mukwakwa, mi na li ku ba ni bone ya holofezi.’

Batu ba bañata mwa Jerusalema ne ba ikutwile cwalo. Masole ba Maroma ha se ba fundukile, ne ku bonahala inge kuli cwale ku iketile. Ba bañwi ne ba zwezipili ku ina mwa muleneñi. Kacwalo, ni bona ba ina. Ne ba lemusizwe, kono ne ba si ka utwa. Kabakaleo, ne ba shwile.

Ha lu bone mutala o muñwi. Kana u kile wa bapalisa fateñi menkisi?— Ku kana kwa bonahala kuli kwa tabisa ku bona mulilo ha u cakula menkisi. Kono ku bapalisa menkisi ku kona ku tahisa kozi. Ndu kaufela ya kona ku ca, mi wa kona ku shwa!

U si libali kuli ku utwa fela ka linako ze ñwi ha ku si ka likana. Kono haiba wa utwa kamita, fohe u ka silelezwa luli. Mi ki mañi ya ku bulelela kuli, “Bana, mu utwe bashemi ba mina”?— Ki Mulimu. Mi u si libali kuli u bulela cwalo kakuli wa ku lata.

Cwale ha ku bale mañolo a a’ bonisa butokwa bwa ku utwa: Liproverbia 23:22; Muekelesia 12:13; Isaya 48:17, 18; ni Makolose 3:20.

[Siswaniso se si fa likepe 42]

Ki kabakalañi ha u lukela ku utwa batu ba bahulu?

[Siswaniso se si fa likepe 43]

Lu kona ku itutañi kwa tapelo ya Jesu?

[Siswaniso se si fa likepe 45]

Ku utwa taelo ya Jesu ne ku pilisize cwañi batu ba?

[Maswaniso a fa likepe 46]

Ki kabakalañi ha u lukela ku utwa niha ku si na kozi?