Lisamu 64:1-10
-
Kusilelezwa kwa litasezo za babaipatile
-
“Mulimu uka bakunupa” (7)
-
Ku muzamaisi wa lipina. Samu ya Davida.
64 Wena Mulimu, uutwe linzwi laka haniitilelela.+
Ubukeleze bupilo bwaka kwa litasezo zesabisa za sila.
2 Unisileleze kwa milelo yebalela babamaswe kwa mukunda,+Unisileleze kwa silundwamanji sa babaeza zemaswe.
3 Baloza malimi abona sina mikwale;Banongisa manzwi abona aasituhu, sina masho,
4 Kuli bakunupe yasina mulatu kuzwelela mwa libaka mobaipatile;Bamukunupa kapili-pili, basasabi.
5 Batiiseza mwa mulelo wabona omaswe;*Baambolisana za mobaka patela tutwa twabona.
Bali: “Ki mañi yaka tubona?”+
6 Babata linzila zenca za kufosa ka zona;Kwa mukunda balela zemaswe ka maano abona;+Zanahana mutu ni mutu mwa pilu yahae haliutwisisehi.
7 Kono Mulimu uka bakunupa;+Bakaholofazwa ki lisho ka sipundumukela.
8 Bakawiswa ki malimi abona kasibili;+Batu kaufela babatalimezi bakanyunga litoho zabona.
9 Mi cwale batu kaufela bakasaba,Mi bakazibahaza zaezize Mulimu,Mi bakautwisisa likezo zahae.+
10 Yalukile ukataba kabakala Jehova mi ukasabela ku yena;+Batu kaufela ba lipilu zenani niti bakawabelwa.*
