Lisamu 56:1-13
Ku muzamaisi wa lipina; ka mulumo wa “Liiba Lelikuzize Leli Kwahule.” Samu ya Davida. Mikitami.* Mafilisita hane bamusweli mwa Gati.+
56 Unishemube, wena Mulimu, bakeñisa mutu yanilwanisa.
Lizazi kaufela basweli banilwanisa ni kuninyandisa.
2 Lila zaka lizwelapili kunilwanisa lizazi kaufela;Babañata banilwanisa ka buikuhumuso.
3 Hanisabile,+ nisepanga wena.+
4 Mulimu—muñaa linzwi lenilumbeka—Mulimu ki yena yenisepile; hakuna senisaba.
Ki sika mañi saaka nieza mutu?*+
5 Lizazi kaufela balwanisa zenieza;Zebanahana feela ki kunieza maswe.+
6 Baipata, kuli banitaseze;Batalimisisa fonihata kaufela,+Ka mulelo wa kuniomba moyo.+
7 Ubahane kabakala bumaswe bwabona.
Uwiseze macaba fafasi ka buhali bwahao, wena Mulimu.+
8 Waziba moniyambaelela.+
Ubeye miyoko yaka mwa mukotana wahao wa litalo.+
Kikuli haisika ñolwa mwa buka yahao nji?+
9 Lila zaka likakuta mwamulaho ka lizazi lenika kupa tuso.+
Ninani buniti bwa taba ye: Mulimu u kwa lineku laka.+
10 Mulimu—muñaa linzwi lenilumbeka—Jehova—muñaa linzwi lenilumbeka—
11 Mulimu ki yena yenisepile; hakuna senisaba.+
Ki sika mañi saaka nieza mutu?+
12 Nitamwa ki buitamo bwaka ku wena, Mulimu;+Nika kufa matabelo a buitumelo.+
13 Kakuli unilamulezi kwa lifu+Mi usilelelize mahutu aka kuli asike asitatala,+Kuli nikone kuzamaya fapilaa Mulimu mwa liseli la babapila.+
