Ezekiele 42:1-20
42 Cwale anitisa mwa lapa la kwande leli kwa mutulo.+ Mi anitisa mwa licelo lenelili mabapa ni sibaka sesisina sesiñwi,+ kwa mutulo wa muyaho one ubapani ni lona.+
2 Butelele bwa licelo kwa makenelo a kwa mutulo nebueza liñokolwa* ze 100, mi nelieza liñokolwa ze 50 mwa bupala.
3 Nelili mwahalaa lapa la mwahali, lene lieza liñokolwa ze 20 mwa bupala,+ ni bulilo bwa lapa la kwande. Makozwana alona naatalimani, mi naalundatami kueza mibamba yemilaalu.
4 Fapilaa macelo,* nekunani nzila ya mwahali+ yene ieza liñokolwa zelishumi mwa bupala ni liñokolwa ze 100 mwa butelele,* mi makenelo aona naatalimezi kwa mutulo.
5 Macelo a kwahalimu a mwa muyaho naakumbani kufita a kwatasi ni a fahali, kakuli makozwana naangile buñata bwa sibaka saona.
6 Kakuli naalundatami kueza mibamba yemilaalu, kono misumo yaona neisa swani ni misumo ya kwa malapa. Ki lona libaka hanaakumbani kufita a kwatasi ni a fahali.
7 Limota la macwe la kwande lene lili bukaufi ni macelo kwa neku la lapa la kwande lene litalimezi kwa macelo a mañwi nelieza liñokolwa ze 50 mwa butelele.
8 Kakuli macelo anaali kwa neku la lapa la kwande naaeza liñokolwa ze 50 mwa butelele, kono anaatalimezi kwa sibaka sesikenile naaeza liñokolwa ze 100 mwa butelele.
9 Macelo naanani makenelo a kwa upa anaazwa mwa lapa la kwande.
10 Hape nekunani macelo mwahalaa* limota la macwe la lapa, kwa neku la upa, bukaufi ni sibaka sesisina sesiñwi ni muyaho.+
11 Nekunani nzila fapilaa ona yeneswana sina ye fapilaa macelo a kwa mutulo.+ Macelo ao naalikanelela mwa butelele ni mwa bupala, naanani mazwelo aswana ni muyahelo oswana. Makenelo aona
12 naaswana sina makenelo a macelo a kwa neku la mboela. Nekunani munyako kwa makalelo a nzila, fapilaa limota la macwe lelitalimezi kwa upa, mwa naakona kukenela mutu.+
13 Cwale ali ku na: “Macelo a kwa mutulo ni macelo a kwa mboela abapani ni sibaka sesisina sesiñwi+ ki macelo akenile, ili ko baprisita babaatumela Jehova bacela linubu zekenile hahulu.+ Ki kona kobabeya linubu zekenile hahulu, linubu za bubeke, linubu za sibi, ni linubu za mulatu, kakuli sibaka seo ki sesikenile.+
14 Baprisita habakena mwa sibaka sesikenile, habaswaneli kuzwa mwateñi kuya mwa lapa la kwande basika tubula kale liapalo zene baapezi hane baeza sebelezo,+ kakuli ki zekenile. Bakaapala liapalo zeñwi kuli baatumele libaka mobalumelelizwe kukena batu.”
15 Hafelize kumishala sibaka sa mwahali sa tempele,* anizwisa ka munyako otalimezi kwa upa,+ mi amishala sibaka kaufela.
16 Amishala lineku la kwa upa ka lutaka lwa kumishalisa.* Ka kuya ka lutaka lwa kumishalisa, lineku leo nelilikana ni butelele bwa mataka a 500, kuzwa lineku leliñwi kuya ku leliñwi.
17 Amishala lineku la kwa mutulo, mi ka kuya ka lutaka lwa kumishalisa, nelilikana ni butelele bwa mataka a 500.
18 Amishala lineku la kwa mboela, mi ka kuya ka lutaka lwa kumishalisa, nelilikana ni butelele bwa mataka a 500.
19 Apotolohela kwa lineku la kwa wiko. Alimishala ka lutaka lwa kumishalisa, mi nelilikana ni butelele bwa mataka a 500.
20 Amishala sibaka seo mwa maneku amane. Nesipotolohilwe ki limota+ lene lieza mataka a 500 mwa butelele ni mataka a 500 mwa bupala,+ ili kukauhanya sibaka sesikenile kwa sibaka sa batu kaufela.+
Litaluso ze kwatasi
^ Ili kutalusa liñokolwa zetelele. Mubone Litaba Zeekelizwe B14.
^ Kamba “mizuzu.”
^ Ka kuya ka toloko ya mañolo a Sigerike ya Septuagint, ki “liñokolwa ze 100 mwa butelele.” Mwa mañolo a Siheberu kuñozwi kuli: “Nzila yeeza ñokolwa iliñwi.” Mubone Litaba Zeekelizwe B14.
^ Linzwi ka linzwi, “mwa bupala bwa.”
^ Linzwi ka linzwi, “ndu ya mwahali.”
^ Mubone Litaba Zeekelizwe B14.
