Ezekiele 19:1-14
-
19 Pina ya malilo yebulela za manduna ba Isilaele (1-14)
19 “Uopele pina ya malilo yebulela za manduna ba Isilaele
2 uli:‘Maho neli mañi? Neli tau yamusali mwahalaa litau.
Naabutanga mwahalaa litau za bana* zetiile mi naahulisa bana bahae.
3 Ahulisa yomuñwi wa bana bahae, mi mwana yo aba taunyana yetiile.+
Aituta kuzuma lifolofolo,Mane aca batu.
4 Macaba autwa zahae, amuswasa mwa mukoti waona,Mi amuisa kwa naha ya Egepita ka lumingo.+
5 Mahe alibelela, mi hasamulaho abona kuli nekusina sepo ya kuli ukakuta.
Kihaa luma yomuñwi hape wa bana bahae, sina taunyana yetiile.
6 Ni yena azamaya mwahalaa litau zeñwi mi aba taunyana yetiile.
Aituta kuzuma lifolofolo, mi mane aca batu.+
7 Azamaya inze ananalela mwahalaa litawala zabona zesilelelizwe mi asinya mileneñi yabona,Mi naha yeli matota yatala mulumo wa kubuluma kwahae.+
8 Macaba aazwa mwa likiliti za mwa matuko, ato mulwanisa kuli amukwahele ka kanyandi kaona,Mi yena aswasiwa mwa mukoti waona.
9 Bamubeya mwa sikalamunanga ka lumingo mi bamuisa ku mulena wa Babilona.
Bayo mukwalela kwateñi, kuli linzwi lahae lisike lautwahala hape fa malundu a Isilaele.
10 Maho naaswana sina kota ya veine+ mwa mali ahao,* yecezwi kwatuko ni mezi.
Neibeile miselo mi neinani mitai yemiñata kabakala mezi amañata.
11 Yaba ni mitai yetiile,* yakuezisa milamu ya babusi.
Yahula mi yaba yetelele kufitelela likota zeñwi,Mi neibonahala kabakala butelele bwayona ni kabakala buñata bwa mitai ni matali ayona.
12 Kono akumulwa ka buhali+ ni kunepelwa fafasi,Mi miselo yahae yaomiswa ki moya ozwa kwa upa.
Mitai yahae yetiile yalobakiwa mi yaoma,+ mi yaciswa ki mulilo.+
13 Cwale ucezwi mwa lihalaupa,Mwa naha yeomile, yesina mezi.+
14 Mulilo wayamba kuzwa kwa mitai yahae* mi wacisa mitainyana yahae ni miselo yahae,Mi nekusina mutai otiile one usiyezi, nekusina mulamu wa bulena.+
“‘Yeo ki yona pina ya malilo, mi ikaba pina ya malilo cwalo.’”
