Ezekiele 15:1-8
-
Jerusalema, kota ya veine yesina tuso (1-8)
15 Linzwi la Jehova hape lataha ku na, lali:
2 “Mwanaa mutu, kota ya veine ishutanela kai ni likota zeñwi kaufela kamba mitai ya likota zeñwi kaufela za mwa mushitu?
3 Kana musumo wayona wakona kuitusiswa kwa kueza musebezi omuñwi? Kamba kana batu bakona kueza fateñi mapo fakupahekela lisebeliso?
4 Hamubone! Inepelwa mwa mulilo sina kota ya kukotezisa, mi mulilo uyongisa maneku ayona amabeli ni kuicisa fahali. Kana cwale isakona kuitusiswa kwa kueza musebezi omuñwi?
5 Niha neisali mutumbi, neisa koni kuitusiswa kwa kueza musebezi ufi kamba ufi. Kono cwale haisana kuba ni tuso ni yekana hase icile ni kuyonga mwa mulilo!”
6 “Kabakaleo, Jehova Mulena Yapahami ka Kufitisisa, sabulela ki se, uli: ‘Sina kota ya veine yemwahalaa likota za mwa mushitu, zenifile sina likota za kukotezisa mulilo, nikaeza cwalo babayahile mwa Jerusalema.+
7 Nika balwanisa. Babandukile kwa mulilo, kono mulilo uka bayongisa. Mi mukaziba kuli ki na Jehova hanika balwanisa.’”+
8 “‘Mi nikafetula naha kuieza matota+ kabakala kuli habasika sepahala,’+ kubulela Jehova Mulena Yapahami ka Kufitisisa.”
