Kalabo ya Bibele

 Nihaike kuli Bibele haisika bulela ka butungi fa taba ya kuikabisa, haihanisi kuikabisa kwa meeto, kutina likabisa kamba mifuta kaufela ya kuikabisa ka yona. Nihakulicwalo, kufita kuisa feela mamelelo kwa ponahalo yaluna ya kwande, Bibele ilususueza kuisa pilu kwa ‘kuikabisa kokusa koni kubola kwa moya wa muombela ni obunolo.’—1 Pitrosi 3:3, 4.

Kuikabisa hakusika haniswa

•   Basali babasepahala bababulezwi mwa Bibele nebaikabisanga. Rebeka, musalaa Isaka mwanaa Abrahama, naatinile lisale la gauda la fa ngo, maseka a gauda, ni likabisa zeñwi zetula zanaa amuhezi sina mpo yezwa ku mukwenyanaa hae. (Genese 24:22, 30, 53) Ka mukwa oswana, Estere naaamuhezi za “kutola, zetokwahala kuli abonahale hande” ilikuli aitukiseze situlo sanaakona kufiwa sa kuba muoli mwa Mubuso wa Peresia. (Estere 2:7, 9, 12) Lika za kutola zene tokwahala zeo mwendi neli kopanyeleza “mafula a kutola” kamba “lika zeshutana-shutana za kuikabisa ka zona.”—Bibele ya New International Version; Bibele ya Easy-to-Read Version.

•   Mitala ya mwa Bibele ibapanya lika zende kwa likabisa. Ka mutala, mutu yafanga kelezo yende ku mutu yalata kuutwa, ubapanywa kwa “lisale la gauda la kwa zebe.” (Liproverbia 25:12) Ka mukwa oswana, Mulimu naabapanyize mwanaa babalelela sicaba sa Isilaele ku muuna ya kabisa musalaa hae ka kumutinisa maseka kwa mazoho, kumubeya sifaha mwa mulala ni masale kwa mazebe. Kukabiswa ka nzila yecwalo nekutahisize kuli sicaba sa Isilaele sibonahale sina “musali yomunde kufeleleza.”—Ezekiele 16:11-13.

Mibonelo yefosahezi ka za kuikabisa

 Mubonelo ofosahezi: Bakeñisa kuli Muoli Jezabele yamaswe naaipentanga kwa meeto, kamba kuitusisa “penti ya meeto,” taba yeo ibonisa kuli kuikabisa kwa meeto kufosahalile.—2 Malena 9:30, litaluso ze kwatasi.

 Niti: Jezabele yanaali muloi ni sibulai, naatuzwi kabakala likezo zahae zemaswe isiñi kabakala ponahalo yahae.—2 Malena 9:7, 22, 36, 37.