Kana Mulimu Naatahisize Lika Zepila Kaufela ka Kuipilaula?

MUBAPALE

Kalabo ya mwa Bibele

Batili. Bibele ibulela hande ka kuutwahala kuli Mulimu naabupile batu ni “mifuta” yeshutana-shutana ya lifolofolo ni limela. a (Genese 1:12, 21, 25, 27; Sinulo 4:11) Hape ibulela kuli batu kaufela basimuluha ku Adama ni Eva, bona bashemi baluna bapili. (Genese 3:20; 4:1) Bibele haiyemeli taba ya kuli Mulimu naatahisize lika zepila ka kuipilaula. Nihakulicwalo, Bibele yalumelelana ni mubonelo wa ba sayansi wa kuli lika zepila zashutana-shutana.

Kana Mulimu naatahisize lika zeliteñi kaufela, ka kuipilaula?

Batu babalumela kuli Mulimu naatahisize lika zepila kaufela ka kuipilaula, banani mihupulo yeshutana-shutana ka za taba yeo. Batu babañwi balumela kuli lika zakona kuipilaula mwa mifuta yeshutana-shutana kulikana ni mwabatela Mulimu.”

Mi batu bao hape balumela kuli:

Lika kaufela zepila lisimuluha fa lika zeswana ni zona zene pilile kwaikale.
Fa nto iliñwi kwakona kuzwa mifuta yeshutana-shutana ya lika zepila.
Mulimu ki yena yanaatahisize kuli lika liipilaule.

Kana tuto ya kuipilaula yalumelelana ni zeiluta Bibele?

Tuto ya kuipilaula ibonisa inge kuli taba yeñozwi mwa Bibele kwa Genese ya kuli lika nelibupilwe haki ya niti. Nihakulicwalo, Jesu naabonisize kuli buka ya Genese ibulela litaba za niti luli ka mone liezahalezi luli kwamulaho. (Genese 1:26, 27; 2:18-24; Mateu 19:4-6) Bibele ibulela kuli pili asika taha kale fa lifasi, Jesu naapila mwa lihalimu ni Mulimu mi naatusana ni yena kutahisa “lika kaufela.” (Joani 1:3) Kacwalo, taba ya kuli Mulimu naatahisize lika kaufela zeliteñi ka kuipilaula hailumelelani ni zeiluta Bibele.

Kana buikoneli bwa limela ni lifolofolo bwa kupila mwa sibaka sesiñwi miinelo niha icinca ibonisa kuli lika zeo nelitile ka kuipilaula?

Bibele haitalusi molikona kushutanela lika za mufuta ulimuñwi. Bibele hape hailwanisi taba ya kuli lika zeñwi za mufuta ulimuñwi zakona kushutana kulikana ni miinelo yeliipumana ku yona. Batu babañwi baanga kuli kushutana kokucwalo ki kona kuipilaula, kono muezezo wo hautahisi kuli kusimuluhe lika zeñwi zepila za mufuta omuñwi.

a Bibele iitusisa linzwi la “mufuta,” ili lelinani taluso yetuna kufita linzwi la “zepila” ka kuya ka moliitusiselizwe ki ba sayansi. Hañata ba sayansi babulelanga kuli kunani nto yeñwi yepila yeipilauzi haili fo taba yeo haki ya niti kakuli ki mufuta feela usili wa nto yene liteñi ni kale sina moliitusiselizwe linzwi leo kwa liñolo la Genese.