Kalabo ya Bibele

 Bibele iluta kuli kwa libupiwa kaufela zeliteñi fa lifasi, ki palonyana feela ya batu babakaya kwa lihalimu. (Sinulo 14:1, 3) Bakaya kwa lihalimu kuli bayo busa ni Jesu sina malena ni baprisita. (Luka 22:28-30; Sinulo 5:9, 10) Buñata bobutuna bwa batu bakazusezwa kupila mwa lifasi lelili paradaisi.—Samu 37:11, 29.

 Mwa Bibele hakusika bulelwa za lihalimu kokupila linja kamba limunanu zeñwi—mi kunani libaka leliutwahala hakusina taba yecwalo. Lifolofolo halikoni kuunga mihato yetokwahala kuli likone ‘kubizezwa kwa lihalimu.’ (Maheberu 3:1) Mihato yeo ikopanyeleza kuba ni zibo, kubonisa tumelo, ni kumamela milao ya Mulimu. (Mateu 19:17; Joani 3:16; 17:3) Bakeñisa kuli batu ki bona feela bane babupilwe ni sepo ya kupila kuya kuile, kwaiponahalela hande kuli lifolofolo halikoni kupila kuya kuile ibe kwa lihalimu kamba fa lifasi.—Genese 2:16, 17; 3:22, 23.

 Kuli likone kuya kwa lihalimu, libupiwa za fa lifasi lilukela kuzusiwa kwa bafu pili. (1 Makorinte 15:42) Mwa Bibele kubulezwi likezahalo za zuho zeñata. (1 Malena 17:17-24; 2 Malena 4:32-37; 13:20, 21; Luka 7:11-15; 8:41, 42, 49-56; Joani 11:38-44; Likezo 9:36-42; 20:7-12) Nihakulicwalo, mwa likezahalo za zuho zeo kaufela, neli batu bane bazusizwe isiñi lifolofolo.

•  Kana lifolofolo linani mioyo?

•  Kana mioyo yakona kushwa?

•  Kana lifolofolo zaezanga sibi?

•  Kana kulukile kunyandisa lifolofolo?

 Kana lifolofolo linani mioyo?

 Batili. Bibele ibulela kuli batu ni lifolofolo ki mioyo. (Numere 31:28, litaluso ze kwatasi) Mutu wapili yena Adama, hanaa bupilwe, naasika fiwa moyo kono “aba moyo opila.” (Genese 2:7, litaluso ze kwatasi) Moyo ukopanyeleza lika zepeli ze: “liluli la lifasi” ni “moya wa bupilo.”

 Kana mioyo yakona kushwa?

 Eni, Bibele iluta kuli mioyo yakona kushwa. (Livitike 21:11, litaluso ze kwatasi; Ezekiele 18:20) Ka nako ya kushwa, batu ni lifolofolo likutelanga kwa liluli la lifasi. (Muekelesia 3:19, 20) Ka mubulelelo omuñwi, zatuhelanga kubateñi.

 Kana lifolofolo zaezanga sibi?

 Batili. Kueza sibi kutalusa kunahana, kuikutwa, kamba kueza nto yeloba milao ya Mulimu. Kuli sibupiwa sieze sibi, silukela kuba sesikona kueza likatulo ka za lika zelukile kamba zesika luka, kono lifolofolo halina buikoneli bobucwalo. Lifolofolo hañata liezanga lika kulikana ni zibo yelinani yona ya ka sipepo mwa nako yekuswani yelipilanga. (2 Pitrosi 2:12) Kwa mafelelezo a bupilo bwazona, lifolofolo zashwanga niha lisika eza sibi.

 Kana kulukile kunyandisa lifolofolo?

 Batili. Mulimu naafile batu maata a kubusa fahalimwaa lifolofolo kono naasika bafa tukelo ya kulinyandisa. (Genese 1:28; Samu 8:6-8) Mulimu waisa pilu kwa buiketo bwa folofolo ni folofolo, mane nihaiba tunyunywani totunyinyani. (Jonasi 4:11; Mateu 10:29) Naalaezi balapeli bahae kuli baeza lifolofolo ka sishemo.—Exoda 23:12; Deuteronoma 25:4; Liproverbia 12:10.