Kana Kubapala Lipapali za Kuwina Masheleñi ki Sibi?

MUBAPALE

Kalabo ya Bibele

Nihaike kuli Bibele haibuleli litaba kaufela ka za lipapali za kuwina masheleñi, likuka ze mwateñi zakona kulutusa kulemuha kuli kubapala lipapali za kuwina masheleñi ki sibi ku Mulimu.—Maefese 5:17. a

Lipapali za kuwina masheleñi litiswa ki mukwañuli, ili mukwa watoile Mulimu. (1 Makorinte 6:9, 10; Maefese 5:3, 5) Batu babaezanga lipapali za kuwina masheleñi babanga ni sepo ya kufumana masheleñi ka kuwina batu babañwi, kono Bibele yahanisa kulakaza maluwo a babañwi.—Exoda 20:17; Maroma 7:7; 13:9, 10.
Kubapala lipapali za kuwina masheleñi, nihaiba a manyinyani, kwakona kutahisa kuli mutu akalise kulata hahulu masheleñi.—1 Timotea 6:9, 10.
Batu babaezanga lipapali za kuwina masheleñi hañata baitinganga fa tumelo ya mioya kamba fa matohonolo. Nihakulicwalo, Mulimu uunga litumelo zecwalo kuli ki kulapela milimu ya maswaniso, ili nto yesalumelelani ni bulapeli bwahae.—Isaya 65:11.
Bibele ilususueza kusebeza ka taata mwa sibaka sa kubata kufumana lika za mahala. (Muekelesia 2:24; Maefese 4:28) Batu babalatelela kelezo ya mwa Bibele bakona “kuca lico zebaisebelelize.”—2 Matesalonika 3:10, 12.
Kubapala lipapali za kuwina masheleñi kukona kutahisa moya omaswe wa kangisano, ili moya ohanisizwe mwa Bibele.—Magalata 5:26.

a Kezo yene baezize masole ba Maroma ya ‘kuposa loto’ ka mulelo wa kuli baikabele liapalo za Jesu ki yona feela taba inosi yetalusizwe mwa Bibele ka za likwinano.—Mateu 27:35; Joani 19:23, 24; Bibele ya Contemporary English Version; ni ya Good News Translation.