Nemuka Ezañi Mwa Miinelo Yelatelela?

1.   Bo muluti bamina bami halifela kabakala kusautwa hamuli mwa kilasi.

    Kana mwa swanela kukupa swalelo kubo muluti niha muikutwa kuli nebasika mieza hande?

2.   Mulikanaa mina uto ziba kuli nemubulezi lika ze maswe ka za hae.

    Kana mwa swanela kukupa swalelo niha muziba kuli zene mubulezi ki za niti?

3.   Munyemisani ni bo ndataa mina mi hamusika bonisa likute hane muambola ni bona.

    Kana mwaswanela kukupa swalelo niha muziba kuli ki bona bene basika eza hande?

 Kalabo kwa lipuzo ze kaufela ki eni. Kono ki kabakalañi hamuswanela kubulela kuli “muniswalele” niha muikutwa kuli nemusika fosa luli?

•  Ki Kabakalañi Haniswanela Kukupa Swalelo?

•  Mwa kukupela swalelo

•  Zebabulela litaka za mina

  Ki Kabakalañi Haniswanela Kukupa Swalelo?

•   Kukupa swalelo kubonisa kuli muhulile. Haiba muitumelela lika zemaswe zene muezize kamba zene mubulezi, mubonisa kuli munani tulemeno totunde ili twa butokwa ni hamuka hula

   “Buikokobezo ni pilu-telele zakona kulutusa kuli lu kupange swalelo ni kuteeleza mutu yomuñwi ha bulela.”—Rachel

•   Kukupanga swalelo kuka mikonisa kupila ka kozo ni babañwi. Batu baba bulelanga kuli “muniswalele” babonisanga kuli baisize hahulu pilu kwa bata kozo isiñi kubata kubonisa kuli bona habasika fosa ni kuli babañwi ki bona feela baba fosanga.

   “Niha muikutwa kuli hamusika fosa kono kubata kozo ki yona nto ye swanela kuba ya butokwa. Ha ki nto ye taata kubulela kuli muniswalele, kono kwa kona kutahisa kuli mube ni silikani sesinde hape.”—Miriam.

•   Kukupa swalelo kuka mitusa kuikutwa hande. Haiba mufoseza mutu yomuñwi ka manzwi kamba ka likezo mukaikutwa hahulu bumaswe. Kono kukupa swalelo kuka mitusa kuikutwa hande. a

   “Ka linako zeñwi neni bulelanga ni bo ma kamba bo ndate ka kusa nahanisisa. Neniikutwanga bumaswe mi ne kunibelanga taata kukupa swalelo. Kono hane niezanga cwalo kamita neniikutwanga hande kakuli nekutahisanga kozo hape mwa lubasi.”—Nia.

 Kana kukupa swalelo kutokwa buikatazo? Eni! Musizani yabizwa Dena, ili ya kupile swalelo hañata kabakala kubulelela ka kashwau ku bo mahe, ubulela kuli: Haki nto yebunolo kubulela kuli muniswalele. Ni utwanga inge kuli kunani nto ye inzi fa mumizo mi manzwi hakoni kuzwa mwa mulomo waka!”

 Mwa kukupela swalelo

•   Haiba kwa konahala, mukopane ni mutu ye mufoselize mi mukupe swalelo. Kukupa swalelo pata-ka pata kuka tusa muto yo muñwi kulemuha momuikutwela ka za bufosi bwa mina. Kukupa swalelo ka kuitusisa tushango, kukona kutahisa kuli mutu yo muñwi asike alumela ze mubulela. Ni haikaba kuli fa kashango kamina kunani kaswaniso ka sifateho sa mutu ya ikutwa bumaswe ili kubonisa momuikutwela, kono kukabonahala inge kuli ze mubulela halizwi kwa tasaa pilu yamina.

   Akalezo: Haiba hamukoni kukopana ni mutu yo kuli mukupe swalelo mu mulizeze luwaile kamba kumuñolela kadi. Kono kusina taha ni muezezo omuka itusisa kaufela, muhupule kuketa hande manzwi amina.

   Sikuka sa mwa Bibele: “Pilu ya mutu yalukile yanahanisisanga isika alaba kale—Liproverbia 15:28.

•   Mukupe swalelo kapili pili. Haiba muliyeha kukupa swalelo, butata buka bonahala kuba bobutuna mi kuka mibela taata kuba ni silikani sesinde hape ni mutu yemufoselize.

   Akalezo: Muitomele sikonkwani—ka mutala inge ka kubulela kuli, ‘Nika kupa swalelo kacenu.’ Mukete nako fomuka kupela swalelo mi mueze cwalo ka nako ona yeo.

   Sikuka sa mwa Bibele “Utatulule litaba kapili.”—Mateu 5:25.

•   Mukupe swalelo kuzwelela kwa tasaa pilu yamina. Musizani wa libizo la Janelle utalusa kuli “Kubulela feela kuli ‘kufosahalile kuli uikutwa cwalo’ haki kukupa swalelo! Kono mutu yemufoselize uka mikuteka haiba alemuha kuli mwa itumelela mafosisa amina ni kuli mubonisa kuli muikutwa kuli ne mufosize luli.”

   Akalezo: Musike mwa libelela kuli mutu yemukupa swalelo ni yena ukaikupela swalelo. Musike mwali, “Ni ka kupa swalelo kwa bufosi bwaka haiba ni wena ukupa swalelo kwa bufosi bwa hao.”

   Sikuka sa mwa Bibele: “lutundamene zetahisa kozo”—Maroma 14:19.