•  Zemutokwa kuziba

•  Zemukona kueza

•  Zebabulela litaka zamina

 Zemutokwa kuziba

•   Hakuna balikani babasa kopanangi ni butata. Ka kuba batu babasika petahala, mulikanaa mina yomunde—nihaiba mutu yomuunga kuba mulikanaa mina yomutuna—wakona kueza kamba kubulela nto yeñwi yekona kumiutwisa butuku kwa pilu. Niti kikuli, ni mina hamusika petahala. Kana mwahupula nako yeñwi yemukile mwautwisa mutu yomuñwi butuku kwa pilu?—Jakobo 3:2.

•   Lika zeezahala fa Intaneti zakona kutahisa kuli mutu autwe butuku kwa pilu. Ka mutala, mutangana yabizwa David ubulela kuli: “Hamuli fa webusaiti ya kulumelana ka ona litaba mi mubona maswaniso a mulikanaa mina yanaaile kwa kakiti kakañwi, mwakona kukala kuipuza libaka hane musika memiwa. Mi hape mwakona kukala kuikutwa kubetekiwa kamba kuikutwa bumaswe.”

•   Mwakona kuituta mwa kutatululela butata.

 Zemukona kueza

 Muitekule. Bibele ibulela kuli: “Usike waakufa kuhalifa, kakuli kuhalifa ki sisupo sesizibahaza sikuba.”—Muekelesia 7:9, litaluso ze kwatasi.

 “Ka linako zeñwi mwakona kulemuha kuli zemihalifisize haki lika zetuna”—Alyssa.

 Za kunahanisisa: Kana mwahalifanga kapili? Kana mwakona kutuhelela mafosisa a babañwi?—Muekelesia 7:21, 22.

 Munyakisise bunde bwa kuswalela babañwi. Bibele ibulela kuli: ‘Nto yende . . . ki kutuhelela mutu yamifoselize.’—Liproverbia 19:11.

 “Nihaike kuli munani libaka la kutongoka mutu yo, ki hande kumuswalela ka pilu kaufela, mi taba yeo italusa kusazwelapili kumuhupulisanga za pilaelo yamina ni kubata kuli akupe swalelo nako kaufela. Musa muswalela feela, musike mwazwelapili kuhupulisanga mutu yo ka za mulatu wanaaezize.”—Mallory

 Za kunahanisisa: Kana taba yenibilaeza ye ki ya butokwa? Kana muka muswalela kabakala kubata kubukeleza kozo?—Makolose 3:13.

 Mubeye mutu yomuñwi mwa munahano. Bibele ibulela kuli: ‘Muise pilu, isiñi ku zamina feela, kono ni ku za babañwi.’—Mafilipi 2:4.

 “Haiba mu balikani babalatana ni kukutekana, mukatatulula butata kapili kabakala kubata kubukeleza kozo mwahalaa mina. Kakuli muezize buikatazo bwa kutiisa silikani samina mi hamulati kuli silikani seo sisinyehe.”—Nicole

 Za kunahanisisa: Kana mwakona kulemuha bunde bwa mubonelo wa mutu yomuñwi?—Mafilipi 2:3.

 Sisupo sa butokwa: Haiba muziba mwa kutiyela muinelo wa kuutwa butuku kwa pilu mukaziba mwakuezeza hamunze muhula. Mwakona kuituta mwakuezeza cwalo honafa.