Mutangana yabizwa Will ubulela kuli: “Mutu wakona kupalelwa kuikola kubala Bibele haiba hazibi hande mwa kuibalela.”

 Kana mwatabela kuziba zekona kumitusa kuikola kubala Bibele? Taba ye ikamitusa.

•  Mueze inge bababona zemubala

•  Mubatisise!

•  Zebabulela batu bomulikana ni bona

 Mueze inge bababona zemubala

 Hamubala mueze inge kuli nemuli teñi ka nako yene liezahala litaba zemubala. Mwakona kuitusisa muezezo wo:

1.   Mukete taba ya mwa Bibele yemubata kuituta. Mwakona kuketa taba yebulela za nto yeñwi yeneezahalile kwamulaho kamba kuketa kwa libuka za Evangeli, kamba kuketa kwa litaba za mwa Bibele zebalilwe sina papali zefa jw.org.

2.   Mubale taba yeñwi. Mwakona kuipalela yona inze muli munosi, kamba mwakona kuibala ka kutumusa inze muli ni balikani bamina kamba ba lubasi lwamina. Yomuñwi wakona kuba mukandeki, mi babañwi bona bakona kubala litaba za batu bababulezwi mwa taba yeo.

3.   Mulike kuitusisa yeñwi ya liakalezo zelatelela:

   •   Muswanisange maswaniso abonisa litaba zemubala. Kamba mueze mukoloko wa makande emubala, ili maswaniso asikai abonisa molitatamanela litaba zemubala. Muñolange manzwi kwatuko ni siswaniso kuli mutaluse zeezahala.

   •   Muezange chati yebonisa bupilo ka bukuswani bwa mutu yomubala. Ka mutala, hamunze mubala ka za mutu yomuñwi yanaasepahala, mubonise mo butu ni likezo za mutu yo nelimutahiselize limbuyoti.

   •   Mubone teñi kuli taba ya mwa Bibele yemubala iutwahala inge likande feela. Mi mueze cwalo ka linzila zeshutana-shutana, ka mutala, mueze inge kuli musweli mwabuisana ni mutu yomusweli kubala ka za hae ni batu babañwi bababulezwi mwa likande lemusweli kubala.

   •   Haiba kuli mutu yomuñwi yemubala naaezize katulo yemaswe, mueze inge bababona zemaswe zekazwa mwateñi. Ka mutala, munyakisise taba ya Pitrosi ya kulatula Jesu. (Mareka 14:66-​72) Ki lika mañi zanaaswanela kueza Pitrosi hanaaipumani mwa muinelo wo?

   •   Haiba mwakona, muñole papali yetomile fa litaba za mwa Bibele zemusweli kubala. Muñole ni lituto zebakona kuituta batu ka za likande lemuñola leo.​—Maroma 15:4.

 Mubatisise!

 Haiba munyakisisa hande litaba, mwakona kufumana litaba za butokwa mwa taba yemubala. Mane fokuñwi mwakona kuituta tuto ya butokwa kwa linzwi lililiñwi kamba amabeli mwa taba ya mwa Bibele yemubala.

 Ka mutala, mubapanye taba ye kwa Mateu 28:7 ni ye kwa Mareka 16:7.

•    Ki kabakalañi Mareka hanaañozi taba ya kuli Jesu naatuha abonahala kwa balutiwa bahae “ni Pitrosi”?

•  Tuso: Mareka naasika iponela likezahalo zeo; kubonahala kuli naafumani litaba zeo kuzwelela ku Pitrosi.

•  Taba ya butokwa: Ki kabakalañi Pitrosi hanaaikutwile kuomba-ombiwa hanaautwile kuli Jesu naabata kumubona hape? (Mareka 14:66-​72) Jesu naabonisize cwañi kuli naali mulikanaa Pitrosi yasepeha? Mukona kulikanyisa cwañi Jesu ni kuba mulikani yasepeha ku babañwi?

 Haiba mueza inge bababona zemubala ni kubatisisa litaba, mukaikola hahulu kubala Bibele!