Luikatazanga kubonisa batu kaufela lilato, sishemo ni likute. Haiba yomuñwi wa Lipaki za Jehova afokola kamba kukutela mwamulaho, luka muatumela, ilikuli lumubonise kuli lwamulata ni kumutusa kusutelela ku Mulimu hape.—Luka 15:4-7.

 Ka linako zeñwi mutu ukona kueza nto yekona kutahisa kuli azwisiwe mwa puteho. (1 Makorinte 5:13) Nihakulicwalo, bakeñisa kuli lwalata mizwale ni likaizeli baluna, lwaikatazanga kubatusa kuli basike bazwisiwa mwa puteho. Mi niha sebazwisizwe mwa puteho, luzwelangapili kubabonisa lilato ni likute sina feela Bibele moi lususueleza.—Mareka 12:31; 1 Pitrosi 2:17.

Ki lika mañi zetahisanga kuli mutu azwisiwe mwa puteho?

 Bibele ibulela ka kunonga kuli haiba Mukreste aeza sibi sesituna mi ahana kubaka, uswanela kuzwisiwa mwa puteho. (1 Makorinte 5:11-13) Bibele ibonisa libi zetuna zekona kutahisa kuli mutu azwisiwe mwa puteho. Ka mutala, bubuki, bucakolwa, bubulai, mutu kunyandisa bahabo yena ni busholi.—1 Makorinte 6:9, 10; Magalata 5:19-21; 1 Timotea 1:9, 10.

 Niteñi, haluzwisangi mutu mwa puteho hamulaho feela wa kueza sibi sesituna. Baana-bahulu a mwa puteho, pili balikanga kumutusa kueza licinceho. (Maroma 2:4) Baikatazanga kumufita kwa pilu ka kuba bababunolo ni kumubonisa sishemo. (Magalata 6:1) Kueza cwalo kwakona kutusa mutu yaezize sibi kulemuha mafosisa ahae ni kubaka. (2 Timotea 2:24-26) Haiba mutu yo azwelapili kuloba likuka za mwa Bibele za muzamao ni kusabaka, baana-bahulu niha sebaezize buikatazo bo kaufela, uswanela kuzwisiwa mwa puteho. Baana-bahulu bakafa zibiso kwa mukopano wa puteho kuli mutu yo hasali yomuñwi wa Lipaki za Jehova.

 Ki bunde bufi bobuzwanga mwa kuzwisa mutu mwa puteho? Sapili, puteho ibonisanga kuli yayemela likuka za Mulimu za muzamao ni kusileleza babañwi kuli basike bakukuezwa ki mutu yo yanani mikwa yemaswe. (1 Makorinte 5:6; 15:33; 1 Pitrosi 1:16) Mi sabubeli, mutu yaezize sibi yo, wakona kuikataza kutuhela kueza lika zemaswe ni kukalisa kueza zelukile.—Maheberu 12:11.

Lipaki za Jehova baanga cwañi batu babazwisizwe mwa puteho?

 Bibele ibulela kuli Bakreste baswanela ‘kutuhela kuswalisana’ ni mutu yazwisizwe mwa puteho, ‘mane nihaiba kuca ni mutu yacwalo basike baca ni yena.’ (1 Makorinte 5:11) Kacwalo, haluezangi siango ni batu babazwisizwe mwa puteho. Nihakulicwalo, halu baambukangi ka kutala. Lwababonisanga likute. Bakona kufumaneha kwa mikopano yaluna, mi mizwale ni likaizeli b bakona kubalumelisa. Mi hape bakona kukupa tuso kwa baana-bahulu kuli bakutele mwa puteho.

 Kono kucwañi ka za mutu yazwisizwe mwa puteho kono ili yo musalaa hae ni bana bahae basali Lipaki za Jehova? Mwanaaswalisanela ni lubasi lwahae kwa moya kukacinca, kono sihabo sikazwelapili. Bakeñisa kuli bapila mwa ndu yeswana, taba yeama linyalo lahae, lilato lebabonisananga mwa lubasi ni swalisano ya lubasi likazwelapili.

 Batu babazwisizwe mwa puteho bakona kukupa kuli baana-bahulu mwa puteho babapotelange kuli bayo bafa kelezo yetomile fa Bibele ni kubatusa kubaka kuli bakutela ku Mulimu. (Zakaria 1:3) Haiba mutu yo atuhela likezo zahae zemaswe mi abonisa kuli walata kupila ka kuya ka likuka za mwa Bibele za muzamao, wakona kukutiswa mwa puteho. Mizwale ni likaizeli baka ‘muswalela ka pilu kaufela ni kumuomba-omba,’ sina feela mone baezelize Bakreste ba mwa Korinte muta mutu yomuñwi naatuhezi linzila zahae zemaswe.—2 Makorinte 2:6-8.

Batu bane bazwisizwe mwa puteho kwamulaho, baikutwa cwañi ka nako ya cwale?

 Mulemuhe zene babulezi Lipaki za Jehova babañwi bane bazwisizwe mwa puteho mi hasamulaho baikatulela kukutela ku Mulimu.

 “Hane niikatulezi kukutela mwa puteho, neninahana kuli baana-bahulu bakabata kuziba lika kaufela zene niezize mwahalaa lilimo zeñata zene nizwisizwe mwa puteho. Kono nebabulezi feela kuli, ‘Lubata kuli muise pilu kuze mukona kueza cwale.’ Mi hamulaho wa fo, natuhela kuikalelwa.”—Bo Maria ba kwa United States.

 “Mizwale ni likaizeli nebatabile hane nikutezi mwa puteho. Neniikutwile kuba wa butokwa. Mizwale ni likaizeli baka neba nitusize kuikutwa kuswalelwa mi kueza cwalo neku nitusize kusaikutwa bumaswe kabakala lika zemaswe zene niezize. Baana-bahulu neba nitusize kutiisa silikani saka ni Jehova hape. Neba niomba-ombile ni kunitusa kulemuha kuli Jehova naasa niinga kuba wa butokwa ni kuli naasa nilata.”— Bo Malcom ba kwa Sierra Leone.

 “Nitabile kuziba kuli Jehova ulata hahulu batu bahae mi ubata kuli kopano yahae izwelepili kuba yekenile. Kuzwisa mutu mwa puteho yaezize mafosisa kwaswanela luli, nihaike kuli batu babañwi bakona kuikutwa kuli kueza cwalo kumaswe. Naitumela luli kuli Ndataa luna ya kwa lihalimu, ki Mulimu yalilato ni yalata kuswalela.”—Bo Sandi ba kwa United States.