Mubalanga cwañi palo ya Lipaki za Jehova?

 Bababaliwanga feela kuli ki Lipaki za Jehova ki babakutazanga taba yende ya Mubuso wa Mulimu kweli ni kweli. (Mateu 24:14) Palo yeo ikopanyeleza batu babakolobelizwe sina Lipaki za Jehova, ni batu babasika kolobezwa kale, ili babakwanisize zetokwahala kuli bakutaze.

Kana mutu utokwa kulifa masheleñi kuli abaliwe sina Paki?

 Batili. Mutu hatokwi kulifa masheleñi kuli abaliwe sina Paki kamba kuli afiwe musebezi omuñwi mwa kopano yaluna. (Likezo 8:18-20) Mane babafanga linubu hababatangi kuzibahala. Paki ni Paki uitusisanga nako yahae, maata ahae, ni maluwo ahae kuli atuse mwa musebezi waluna wa mwa lifasi kaufela kulikana ni mwaatulezi mwa pilu yahae mane ni miinelo yahae.—2 Makorinte 9:7.

Muzibanga cwañi palo ya Lipaki babakutazanga kamita?

 Kweli ni kweli, Lipaki balukisanga piho ya musebezi wa kukutaza obaezize, ni kufa piho yeo kwa puteho yebaswalisana ni yona. Balukisanga piho yeo ka kuitatela.

 Lipiho za puteho zakopanyiwanga ni kulumelwa kwa ofisi ya mutai. Ofisi ya mutai kihona ikaluma palo kaufela ya lipiho za naha kamba kalulo ya simu kwa ofisi yetuna yezamaisa musebezi waluna mwa lifasi kaufela.

 Kwa mafelelezo a silimo ni silimo sa sebelezo, a palo kaufela ya Lipaki mwa naha ni naha yazibahalanga. Lipalo zeo zakopanyiwanga hamoho kuli kuzibahale palo ya Lipaki mwa lifasi kaufela. Lipiho ka butungi za naha ni naha zaboniswanga fa webusaiti yaluna mwatasaa kalulo yeli, “Mwa Lifasi Kaufela.” Ka kuswana ni Bakreste ba mwa linako za baapositola, ni luna lwasusuezwanga ki lipiho zeo.—Likezo 2:41; 4:4; 15:3.

Kana mwabalanga batu babaswalisana ni kopano yamina, ili babasa kutazangi?

 Nihaike kuli batu babacwalo hababalelwangi kwa palo ya Lipaki, lwabaamuhelanga mwa liputeho zaluna. Buñata bwabona bafumanehanga kwa mukopano oezwanga hañwi ka silimo, ili mukiti wa Kuhupula lifu la Kreste; kacwalo, palo yabona yakona kulemuhiwa ka kuzwisa palo ya Lipaki mwa palo ya batu kaufela bane bafumanehile kwa mukiti wo. Mwa 2025, palo kaufela ya batu bane bafumanehile kwa mukiti wa Kuhupula lifu la Jesu neli 20,635,015.

 Batu babañata babasa fumanehangi kwa mikopano yaluna batusiwanga ki tukiso yaluna yesalifelwi ya kuituta Bibele. Mwa 2025, ka avareji, neluzamaisize lituto za Bibele ze 7,603,182 kweli ni kweli, mi zeñwi za lituto zeo neli za kuzamaisa kwa likwata za batu babañata babaituta ka nako yeswana.

Ki kabakalañi palo ya Lipaki ka kuya ka muuso haili yetuna hahulu kufita yamina?

 Maluko a muuso aitusiswanga kwa kubala batu, hañata afumananga palo ka kubuza feela batu bulapeli bobaswalisana ni bona. Ka mutala, ba liluko leliñwi lelibona za kubala batu kwa America batalusa kuli mulelo wa lipatisiso zene baezize “neli kuziba haiba batu bane babuziwa nebaeza lika kulikana ni bulapeli bone baswalisana ni bona,” nebaekelize kubulela kuli, zene bafumani “nelisa bonisi buniti bwa taba luli.” Kono ka kushutana, luna lubalanga feela batu kuli ki Lipaki za Jehova haiba bakutazanga ku babañwi ni kubiha misebezi yabona, isiñi batu babaipapata feela kuli ki Lipaki.