Lipaki za Jehova bazamaisanga tuto yekona kumitusa kuziba zeiluta Bibele. Tukiso yaluna ya kuituta Bibele yakona kumitusa:

•   Kuba ni tabo mwa bupilo

•   Kuba mulikanaa Mulimu

•   Kuziba lisepiso za mwa Bibele ka za kwapili

Zefumaneha fa likepe le

•  Ki lika mañi zeezahalanga ka nako ya tuto ya Bibele?

•  Kana nitokwa kulifa sesiñwi kuli niitute?

•  Tuto iinganga nako yekuma kai?

•  Nikona kukalisa cwañi kuituta?

•  Kana nakona kuituta feela ka mulelo wa kuli nibone haiba nikatabela kuzwelapili kuituta?

•  Haiba nilumela kuituta Bibele, kana nikahapelezwa kuba yomuñwi wa Lipaki za Jehova?

•  Kana nakona kuitusisa Bibele yaka?

•  Kana nakona kumema babañwi kuli bafumanehe kwa tuto?

•  Kucwañi haiba nikile naituta Bibele ni Lipaki za Jehova kwamulaho? Kana nakona kuituta hape?

•  Kana munani tukiso ya kuli mutu wakona kuituta Bibele kusina mutu yomuñwi yamuluta?

 Ki lika mañi zeezahalanga ka nako ya tuto ya Bibele?

 Mutu yomuñwi uka mitusa kuutwisisa Bibele ka kunyakisisa taba yeñwi ni yeñwi. Mukaitusisa hatiso ya Muikole Bupilo Kuya Kuile!, ili yeka mitusa kuziba zeiluta Bibele ni mo litaba zeo likona kumituseza. Kuli muzibe litaba zeñata, lumimema kubuha vidio ye.

 Kana nitokwa kulifa sesiñwi kuli niitute?

 Batili. Lipaki za Jehova balatelela taelo yanaafile Jesu kwa balutiwa bahae, yeli: “Mufilwe feela, ni mina mufane feela.” (Mateu 10:8) Mi hamuna kutokwa kulifa sesiñwi kuli mube ni lihatiso zeitusiswanga kwa kuituta Bibele zecwale ka Bibele ni hatiso ya Muikole Bupilo Kuya Kuile!

 Tuto iinganga nako yekuma kai?

 Tukiso kaufela ikopanyeleza kuituta lituto ze 60. Mwakona kuiketela mina bañi momuka itutelanga, kono baituti babañata batabelanga kuituta tuto iliñwi kamba kufitelela ka sunda.

 Nikona kukalisa cwañi kuituta?

1.  1. Mutaleleze fomu ya fa Intaneti. Litaba za ka butu zemuka ñola fateñi likaitusiswa feela kwa kulukisa kuli kube ni yomuñwi wa Lipaki za Jehova yakato mipotela sina momukupezi.

2.  2. Mutu yomuñwi yakaitutanga ni mina Bibele ukaambola ni mina. Mutu yakaitutanga ni mina Bibele yo uka mitaluseza litaba ka za tuto ya Bibele mi ukaalaba lipuzo zemukona kuba ni zona.

3.  3. Mina ni mutu yakaitutanga ni mina Bibele mwakona kuikambota ka za momuka itutelanga. Mwakona kukopananga hamoho ni mutu yo kuli muitute, kuituta ni yena fa foni, kuituta fa foni inze mubonana, kuituta ka kuñolelana mañolo, kamba ka email. Hañata, tuto iinganga nako yebato kwana hora, kono yakona kuunga nako yekuswani yesafiti fo kamba mane yakona kufitelela fo, kulikana ni nako yemunani yona.

 Kana nakona kuituta feela ka mulelo wa kuli nibone haiba nikatabela kuzwelapili kuituta?

 Eni. Haiba mubata kueza cwalo, mutaleleze fomu ya fa Intaneti. Haiba mutu yomuñwi aambola ni mina ka za kuituta ni mina, mumuzibise kuli mubata kukala ka kuituta feela ka mulelo wa kuli mubone haiba mukatabela kuzwelapili kuituta. Muluti yo, ili yakona kuba muuna kamba musali, ukaitusisa broshuwa ya Muikole Bupilo Kuya Kuile! yenani lituto zetaalu, zeka mitusa kuziba haiba mukatabela kuzwelapili kuituta kamba kutokwa.

 Haiba nilumela kuituta Bibele, kana nikahapelezwa kuba yomuñwi wa Lipaki za Jehova?

 Batili. Lipaki za Jehova batabela kuluta batu zeibulela Bibele, kono haluhapelezangi batu kuswalisana ni bulapeli bwaluna. Ka likute, lutalusezanga batu zeibulela Bibele, inze luziba kuli mutu ni mutu unani tukelo ya kuiketela zakalumela.—1 Pitrosi 3:15.

 Kana nakona kuitusisa Bibele yaka?

 Eni, mwakona kuitusisa toloko ya Bibele ifi kamba ifi yemutabela. Luna niha lutabela kuitusisa Bibele ya Toloko ya Lifasi Lelinca bakeñisa kuli inepahezi mi ibunolo kuiutwisisa, lwaziba kuli batu babañata batabela kuitusisa Libibele zeñwi bakeñisa kuli ki zona zebatwaezi.

 Kana nakona kumema babañwi kuli bafumanehe kwa tuto?

 Eni. Mwakona kumema lubasi lwamina kaufela kamba mulikani ufi kamba ufi yemutabela.

 Kucwañi haiba nikile naituta Bibele ni Lipaki za Jehova kwamulaho? Kana nakona kuituta hape?

 Eni. Mane mwakona kuikola hahulu kuituta cwale kufita kwamulaho bakeñisa kuli kunani licinceho zeñwi zeezizwe zeama tuto ya Bibele zelukiselizwe kuli tuto ikone kutusa hande batu kacenu. Muitutelo omunca oitusiswa mazazi a umifa kolo yetuna ya kubuha mavidio ni kuambola kufita litukiso za kuituta Bibele zene lunani zona kwamulaho.

 Kana munani tukiso ya kuli mutu wakona kuituta Bibele kusina mutu yomuñwi yamuluta?

 Eni. Nihaike kuli baituti babañata baitutanga hande habalutiwa ki mutu yomuñwi, babañwi kwa makalelo, batabelanga kuituta banosi. Fa likepe la fa webusaiti yaluna la: Liitusiso Zetusa Kwa Kuituta Bibele, mukafumana liitusiso zemukona kuitusisa kusina kulifa sesiñwi, zeka mitusa hamunze muituta Bibele. Ki ze liitusiso zekona kumitusa:

•   Lituto za Bibele Zefumaneha fa Intaneti. Lituto zefumaneha mwa Sikuwa ze, lilukiselizwe kuli mualabe lipuzo zeñwi za butokwa hahulu zecwale ka: Mulimu ki mañi? Ki kabakalañi hakunani manyando ni bumaswe? Kana Mulimu ukafelisa manyando muta omuñwi?

•   Mavidio A Litaba za Mwa Bibele. Mavidio amakuswani a, atalusa lituto za butokwa za mwa Bibele.

•   Likalabo Kwa Lipuzo za Bibele. Litaba ze, linani likalabo kwa lipuzo za Bibele zeshutana-shutana zebuziwanga.

•   Litimana za Mwa Bibele Zetalusizwe. Muitute taluso ya litimana za mwa Bibele ni manzwi aitusiswanga hahulu.