Mwa ku fumanela litaba ka bunolo

Mukete puo

Mu ye fa kalulo ya bubeli ya litaba ze li teñi

Mu ye kwa litaba za mwahali

Mu ye kwa litaba za mwahali

Lipaki za Jehova

Silozi

TAWALA YA MULIBELELI OCTOBER 2015

 TOHO YA TABA | KANA KULAPELA KWATUSA?

Kana Kunani Yateelezanga Kwa Litapelo?

Kana Kunani Yateelezanga Kwa Litapelo?

Batu babañwi banahananga kuli kulapela ki kusinya feela nako, kakuli hakuna yateelezanga kwa litapelo. Babañwi baalapelanga kono baikutwanga kuli hakuna yaalabanga litapelo zabona. Mutu yomuñwi yalumela kuli hakuna Mulimu, naalikile kunahana mwainezi Mulimu ki hona a lapela kuli: “Nishobotele feela nihaiba hanyinyani.” Kono hamulaho naabulezi kuli: “Mulimu naasika nialaba.”

Kono Bibele ilukolwisa kuli kunani Mulimu mi wautwanga litapelo. Mwa Bibele kunani manzwi anaabulezi Mulimu kwa batu bahae kwa mulaho ko ali: “Luli [Mulimu] u ka ku shemuba ha ka utwa linzwi la hao ha u lila; ha ka ku utwa, u ka ku alaba.” (Isaya 30:19) Timana yeñwi ya mwa Bibele ibulela kuli: “[Mulimu] u tabela tapelo ya ya na ni niti.”—Liproverbia 15:8.

Jesu naalapezi ku Ndatahe ‘mi naa muutwile.’—Maheberu 5:7

Bibele hape ifa mitala ya batu banaaalabile Mulimu hane balapezi kuyena. Timana yeñwi ibulela kuli Jesu naafile “litapelo . . . ku Yena ya naa kona ku mu pulusa kwa lifu, mi naa utwilwe.” (Maheberu 5:7) Lukona kufumana mitala yemiñwi kwa liñolo la Daniele 9:21 ni ku la 2 Makolonika 7:1

Ki kabakalañi he batu babañwi habaikutwanga kuli litapelo zabona halialabiwangi? Kuli litapelo zaluna liutwiwe, luswanela kulapela feela ku Mulimu yabulezwi mwa Bibele, yena Jehova, * isiñi ku mulimu ufi kamba ufi kamba ku bo kukululu baluna babashwile. Hape Mulimu utokwa kuli lumukupe “nto ifi kamba ifi ka ku ya ka tato ya hae.” Mulimu ulukolwisa kuli uka “lu utwa,” haiba lulapela ka kuya ka tato yahae. (1 Joani 5:14) Kacwalo, kuli litapelo zaluna liutwiwe, luswanela kuziba Mulimu yabulezwi mwa Bibele ni kuituta tato yahae.

Batu babañata balumela kuli tapelo haki kezo feela ya bulapeli, kono Mulimu wa teelezanga kwa litapelo ni kulialaba. Bo Isaac, babapila kwa Kenya, babulela kuli: “Nenilapezi kuli nifumane tuso yakuutwisisa Bibele. Hamulahonyana wafo, mutu yomuñwi aniatumela mi akala kuitutanga Bibele nina.” Bo Hilda, babapila kwa Philippines, nebabata kutuhela kuzuba kwai. Hasamulaho wa kuikataza kuli batuhele kuzuba kwai, bo muunaa bona bababulelela kuli: “Ki kabakalañi hausa lapeli kuli Mulimu kuli akutuse?” Balatelela kelezo yeo mi bali: “Nenitabile hahulu kubona mwanaa nituselize Mulimu. Nekuswana feela inge kuli nenifelezwi ki takazo yakuzuba kwai. Kacwalo, natuhela kuzuba kwai.”

Mulimu waatabela kuteeleza kwa lipilaelo zamina zelumelelana ni tato yahae, mi waatabela kumitusa.

^ par. 6 Jehova ki lona libizo la Mulimu ka mo lipatululezwi mwa Bibele.