Mwa ku fumanela litaba ka bunolo

Mukete puo

Mu ye fa kalulo ya bubeli ya litaba ze li teñi

Mu ye kwa litaba za mwahali

Mu ye kwa litaba za mwahali

Lipaki za Jehova

Silozi

TAWALA YA MULIBELELI OCTOBER 2015

 TOHO YA TABA | KANA KULAPELA KWATUSA?

Libaka Mulimu Halumema Kuli Lulapelange

Libaka Mulimu Halumema Kuli Lulapelange

Mulimu ubata kuli lube balikani bahae.

Balikani baambolisananga ilikuli babe ni silikani sesinde. Kamukwaoswana, Mulimu ulumema kuli luambolange ni yena ilikuli lube ni silikani sesinde ni yena. Ubulela kuli: “Mu ka ni biza, mu tahe mu itapelele ku na, mi na ni ka mi utwa.” (Jeremia 29:12) Hamuka ambolanga ni Mulimu, muka ‘sutelela ku [yena], mi ni yena u ka sutelela ku mina.’ (Jakobo 4:8) Bibele ilukolwisa kuli: “Muñaa Bupilo u fakaufi ni ba ba mu lapela kaufela.” (Samu 145:18) Haluka lapelanga ku Mulimu kamita, silikani saluna ni yena sika tiya hahulu.

“Muñaa Bupilo u fakaufi ni ba ba mu lapela kaufela.”—Samu 145:18

Mulimu ubata kumitusa.

Jesu nabulezi kuli: “Ki mañi ku mina ya ka fa mwanaa hae licwe haa mu kupile sinkwa? Kamba ya ka mu fa noha haiba yena a mu kupa tapi? Cwale mbali mina . . . mu ziba ku fa limpo ze nde kwa bana ba mina, ku cwañi Ndataa mina ya kwa lihalimu, yena u ka mi fita hahulu mwa ku fa lika ze nde ku ba ba mu kupa!” (Mateu 7:9- 11) Ka niti, Mulimu umimema kuli mulapelange bakeñisa kuli “wa mi tokomela” mi ubata kumitusa. (1 Pitrosi 5:7) Mane umimema kuli musutelele kuyena hamunani matata. Bibele ilubulelela kuli: “Mu si ke mwa bilaela ka se siñwi, kono mwa lika kaufela mu zibise Mulimu ze mu kupa ka tapelo ni ka kupo hamoho ni buitumelo.”—Mafilipi 4:6.

Batu nebabupilwe inze banani takazo yakubata kuziba za Mulimu.

Licaziba ba muinelo wa batu balemuhile kuli batu babañata baikutwanga kuli batokwa kulapela. Mane nihaiba batu babasalumeli kuli kunani Mulimu ni babakakanya za kuba teñi kwahae baikutwanga kuli batokwa kulapela. * Taba yeo ibonisa kuli batu nebabupilwe inze banani takazo yakubata kuziba za Mulimu. Jesu naabulezi kuli: “Tabo ki ya ba ba lemuha kuli ba tokwa za Mulimu.” (Mateu 5:3) Nzila yeñwi yelukona kukulisa ka yona takazo yeo, ki ka kuambolanga ni Mulimu kamita.

Lukatusiwa cwañi haiba luamuhela memo ya Mulimu yakuli lulapelange ku yena?

^ par. 8 Lipatisiso zeneezizwe ki kampani yeñwi (Pew Research Center) ka silimo sa 2012 libonisa kuli 11 pesenti ya batu ba mwa United States, babasa lumeli kuli kunani Mulimu ni babakakanya za kuba teñi kwahae balapelanga ku Mulimu nihaiba feela hañwi ka kweli.