Mwa ku fumanela litaba ka bunolo

Mukete puo

Mu ye fa kalulo ya bubeli ya litaba ze li teñi

Mu ye kwa litaba za mwahali

Mu ye kwa litaba za mwahali

Lipaki za Jehova

Silozi

TAWALA YA MULIBELELI JANUARY 2015

Kana Lwa Swanela ku Lapela ku Jesu?

Kana Lwa Swanela ku Lapela ku Jesu?

MUBATISISI yo muñwi cwanoñu fa, naa kubukanyize sikwata sa ba banca ba ba fitelela 800 ku zwelela mwa likeleke ze shutana-shutana, mi sa ba buza haiba ba lumela kuli Jesu wa alabanga litapelo. Buñata bwa bona ne ba alabile kuli ba lumela kuli Jesu wa alabanga litapelo. Nihakulicwalo, yo muñwi wa ba banca bao, naa swaile libizo la Jesu ni ku ñola fateñi libizo la “Mulimu.”

Mu bona cwañi? Kana lu swanela ku lapela ku Jesu kamba ku Mulimu? * Kuli lu fumane kalabo kwa puzo yeo, pili ha lu nyakisiseñi za naa bulezi Jesu ha naa luta balutiwa ba hae mwa ku lapelela.

JESU NAA LU LUTILE KU LAPELANGA KU MAÑI?

Jesu naa lu lutile ni ku lu bonisa ye lu swanela ku lapelanga ku yena.

Ka ku lapela ku Ndatahe wa kwa lihalimu, Jesu naa lu tomezi mutala o lu swanela ku latelela

LITUTO ZA HAE: Yo muñwi wa balutiwa ba hae ha naa mu kupile kuli: “Mulena, ha ku lu lute mwa ku lapelela,” Jesu naa bulezi kuli: “Ha mu lapela, mu bulele mu li: ‘Ndate.’” (Luka 11:1, 2) Ku tuha fo, mwa Ngambolo ya hae ye zibahala ya fa Lilundu, Jesu naa susuelize bateelezi ba hae kuli ba no lapelanga. Naa bulezi kuli: “U lapele ku Ndataho.” Hape naa ba kolwisize ka ku bulela kuli: “Ndataa mina, u ziba ze mu tokwa mane mina mu si ka li kupa kale.” (Mateu 6:6, 8) Fa busihu bwa hae bwa mafelelezo bwa ku pila fa lifasi, Jesu naa bulelezi balutiwa ba hae kuli: “Haiba mu kupa Ndate nto ifi kamba ifi u ka mi fa yona ka libizo la ka.” (Joani 16:23) Kacwalo, Jesu naa lu lutile ku lapelanga ku Ndatahe ni Ndataa luna, yena Jehova Mulimu.—Joani 20:17.

MUTALA WA HAE: Ku likana ni mwa naa lutezi ba bañwi ku lapela, Jesu ni yena naa lapezi kuli: “Na ku lumbeka fapilaa nyangela Ndate, wena Mulenaa lihalimu ni lifasi.” (Luka 10:21) Ka nako ye ñwi hape, “Jesu a inulela meeto kwahalimu mi a li: ‘Ndate, na itumela ku wena kakuli u ni utwile.’”(Joani 11:41) Mi ka nako ya naa shwa, Jesu naa lapezi kuli: “Ndate, ni beya moya wa ka mwa mazoho a hao.” (Luka 23:46) Ka ku lapela ku Ndatahe wa kwa lihalimu, yena “Mulenaa lihalimu ni lifasi,” Jesu naa lu tomezi mutala o lu swanela ku latelela kaufelaa luna. (Mateu 11:25; 26:41, 42; 1 Joani 2:6) Kana balutiwa ba Jesu ba kwa makalelo, ki mona mo ne ba utwiselize litaelo za hae cwana?

BAKRESTE BA KWA MAKALELO NE BA LAPANGA KU MAÑI?

Mwa lisunda li sikai ku zwa fa kutela Jesu kwa lihalimu, balutiwa ba hae ne ba kataziwa ni ku fumbelwa ki balwanisi ba bona. (Likezo 4:18) Kacwalo, ba lapela kuli ba tusiwe, kono ne ba lapezi ku mañi? “Ba tumusa kwa manzwi kaufelaa bona ni ku lapela hamoho ku Mulimu,” ilikuli a kone ku zwelapili ku ba tusa mi ba lapela “ka libizo la mutangaa [hae] ya kenile, Jesu.” (Likezo 4:24, 30) Kacwalo, balutiwa ne ba latelezi ketelelo ya Jesu ya mwa ku lapelela. Ne ba lapezi ku Mulimu, isiñi ku Jesu.

Lilimo ze ñata ku zwa fo, muapositola Paulusi naa talusize ka mo yena ni ba naa swalisana ni bona ne ba lapelelanga. Ha naa ñolela Bakreste ka yena, naa bulezi kuli: “Kamita lu itumelanga ku Mulimu yena Ndatahe Mulenaa luna Jesu Kreste ha lu mi lapelela.” (Makolose 1:3) Paulusi hape naa ñolezi balumeli ka yena, kuli: “Kamita mu nze mu fitisa buitumelo ku Mulimu ni Ndataa luna kabakala lika kaufela za lu ezelize, ka libizo la Mulenaa luna Jesu Kreste.”  (Maefese 5:20) Ka manzwi hae ao, lwa bona kuli Paulusi naa susuelize ba bañwi ku lapela ku Mulimu ni Ndatahe, kono inze li ka libizo la Jesu.—Makolose 3:17.

Sina Bakreste ba kwa makalelo, ni luna lwa kona ku bonisa kuli lwa lata Jesu ka ku latelela kelezo ya hae ya mwa ku lapelela. (Joani 14:15) Ha lu nze lu lapela ku Ndataa luna wa kwa lihalimu, ili ku yena feela a nosi, lu ka ba hahulu ni tumelo mwa manzwi a fumaneha kwa liñolo la Lisamu 116:1, 2, a li: “Ni lata Muñaa Bupilo, kakuli u utwile linzwi la ka, . . . Ni ka mu lapela ka mazazi kaufela a bupilo bwa ka.” *

^ par. 3 Mañolo a bonisa kuli Mulimu ni Jesu ha ba likani. Kuli mu bale litaba ze ñata, mu bone kauhanyo 4 mwa buka ya Bibele I Lutañi Luli? ye hatisizwe ki Lipaki za Jehova.

^ par. 11 Kuli Mulimu a utwe litapelo za luna, lu swanela ku ikataza ku pila ka ku lumelelana ni za tokwa. Kuli mu bale litaba ze ñata, mu bone kauhanyo 17 mwa buka ya Bibele I Lutañi Luli?