Mu ye kwa litaba za mwahali

Mu ye fa kalulo ya bubeli ya litaba ze li teñi

Mu ye kwa litaba za mwahali

Lipaki za Jehova

Silozi

TAWALA YA MULIBELELI DECEMBER 2014

 TOHO YA TABA | MWA KONA KU SUTELELA KU MULIMU

Kana Mwa Ambolanga ni Mulimu?

Kana Mwa Ambolanga ni Mulimu?

Balikani ba batuna ba ambolisananga ibe ka ku kopana hamoho kamba ka luwaile, ka ku lumelana mashango a fa Intaneti, ka lividio, ni ka mañolo, haiba miinelo ya bona i ba lumeleza ku eza cwalo. Kacwalo, kuli lu sutelele ku Mulimu, lu tokwa ku ambolanga ni yena kamita. Kono cwale lu kona ku eza cwañi cwalo?

Lwa kona ku ambola ni Jehova ka tapelo. Niteñi, ku lapela ku Mulimu, ha ku swani ni mo lu ezezanga ha lu ambola ni mutu ye lu likana ni yena. Lu swanela ku hupula kuli ha lu lapela, lu ambola ni Mubupi wa luna ya Pahami ka ku Fitisisa mwa pupo kaufela. Ku eza cwalo ku ka lu susueza ku bonisa likute le lituna ni sabo ha lu lapela. Kuli Mulimu a alabe litapelo za luna, lu swanela ku latelela lika ze ñwi ze tokwahala. Ki ze, ze taalu za lika zeo.

Sapili, litapelo li swanela ku libiswa feela ku Jehova Mulimu, isike ku Jesu, ku “muhalalehi,” kamba kwa siswaniso. (Exoda 20:4, 5) Bibele i bulela ka ku utwahala hande kuli: “Kono mwa lika kaufela mu zibise Mulimu ze mu kupa ka tapelo ni ka kupo hamoho ni buitumelo.” (Mafilipi 4:6) Sa bubeli, litapelo li swanela ku fitiswa ka libizo la Mwanaa Mulimu, yena Jesu Kreste. Jesu yena ka sibili naa talusize kuli: “Ha ku na ya taha ku Ndate haisi ka na.” (Joani 14:6) Sa bulaalu, litapelo za luna li swanela ku lumelelana ni tato ya Mulimu. Bibele i bulela kuli: “Ha lu kupa nto ifi kamba ifi ka ku ya ka tato ya hae, wa lu utwa.” *1 Joani 5:14.

Balikani ba batuna ikolanga ku ambolisana kamita ka mo ku konahalela kaufela

Silikani ha si koni ku tiya haiba kuli mutu a li muñwi ki yena feela ya ambolanga. Sina feela balikani ha ba ikolanga ku ambolisana, lu tokwa ku lumeleza Mulimu ku ambola ni luna, mi lu swanela ku mu teeleza ha ambola. Kana mwa ziba mwa ambolelanga Mulimu ni luna?

Kacenu, Jehova Mulimu u “ambolanga” ni luna ka ku itusisa Linzwi la hae le li ñozwi, yona Bibele. (2 Timotea 3:16, 17) Ki kabakalañi ha lu bulela cwalo? Ka mutala: Mu nge kuli mu amuhezi liñolo le li zwa ku mulikanaa mina yo mutuna. Hasamulaho wa ku libala, mwendi mu kana mwa taluseza ba bañwi ka tabo kuli: “Mulikanaa ka u bulezi kuli!” Nihaike kuli ne mu ambolisana ka ku itusisa liñolo, ku swanile feela inge kuli ne mu inzi ni mulikanaa mina ka nako ya naa ambola. Ka nzila ye swana, ha mu bala Bibele, ku swana feela inge kuli Jehova u sweli ku ambola ni mina. Ki lona libaka, bo Gina, ba ba bulezwi mwa taba ya kwa makalelo, ha ne ba bulezi kuli: “Ni bona kuli haiba ni bata kuli Mulimu a ni i nge sina mulikanaa hae, ni swanela ku nyakisisanga ‘liñolo’ la lu ñolezi, yona Bibele.” Ba zwelapili ku bulela kuli: “Ku balanga Bibele ka zazi ku ni tusize ku sutelela hahulu ku Mulimu.” Kana mwa lumeleza Jehova ku ambolanga ni mina zazi ni zazi ka ku bala Linzwi la hae, yona Bibele, ka zazi? Ku balanga Bibele, ku ka mi tusa ku ikutwa ku sutelela hahulu ku Mulimu.

^ par. 5 Kuli mu bale litaba ze ñata ka za mo mu kona ku sutelela ku Mulimu ka tapelo, mu bone kauhanyo 17 mwa buka ya Bibele i lutañi luli?, ye hatisizwe ki Lipaki za Jehova.