Mwa ku fumanela litaba ka bunolo

Mukete puo

Mu ye fa kalulo ya bubeli ya litaba ze li teñi

Mu ye kwa litaba za mwahali

Mu ye kwa litaba za mwahali

Lipaki za Jehova

Silozi

TAWALA YA MULIBELELI JULY 2014

Likalabo Kwa Lipuzo za Bibele

Likalabo Kwa Lipuzo za Bibele

Ki kabakalañi ha lu swanela ku lapelanga?

Jehova Mulimu u bata kuli lu lukuluhe ku mu talusezanga lipilaelo za luna. (Luka 18:1-7) Wa teelezanga ku luna bakeñisa kuli wa lu isa pilu. Lu swanela ku lapelanga bakeñisa kuli Ndataa luna wa kwa lihalimu u lu tokwa kuli lu ezange cwalo.—Mu bale Mafilipi 4:6.

Tapelo haki nzila feela ya ku kupa ka yona tuso. Kono hape i lu tusa ku sutelela ku Mulimu. (Samu 8:3, 4) Ku talusezanga Mulimu maikuto a luna kamita, ku tahisa kuli silikani sa luna ni yena si tiye hahulu.—Mu bale Jakobo 4:8.

Lu swanela ku lapelanga cwañi?

Mulimu ha tokwi kuli ha lu lapela ku yena lu no bulelanga litaba ze ñata hahulu ka mulelo wa ku iponahalisa, kamba ku lapela litapelo za ku peta manzwi a ñozwi. Mi ha tokwi kuli lu inange kamba ku yema ka nzila ye ipitezi ha lu lapela. Jehova u tokwa kuli lu lapelange ku zwelela kwatasaa lipilu za luna. (Mateu 6:7) Ka mutala, mwa Isilaele wa kwaikale, Anna naa lapezi ka za butata bo ne bu mu bilaeza bwa mwa lubasi. Hasamulaho, masitapilu a hae a fetuha ku ba tabo, mi naa lapezi ka pilu ya hae kaufela ku itumela ku Mulimu.—Mu bale 1 Samuele 1:10, 12, 13, 26, 27; 2:1.

Lu na ni tohonolo ye tuna luli! Lwa kona ku taluseza Mubupi wa luna ka za lika ze lu bilaeza mwa bupilo. Hape lwa kona ku mu kanyisa ni ku itumela ku yena bakeñisa lika za ezanga. Kaniti, ha lu swaneli ku keshebisa kolo ye nde hahulu ye, ya lu file Mulimu.—Mu bale Samu 145:14-16.