Mwa ku fumanela litaba ka bunolo

Mukete puo

Mu ye fa kalulo ya bubeli ya litaba ze li teñi

Mu ye kwa litaba za mwahali

Mu ye kwa litaba za mwahali

Lipaki za Jehova

Silozi

TAWALA YA MULIBELELI NO. 3 2016

 TOHO YA TABA

Mutu Yemulata Haashwa

Mutu Yemulata Haashwa

“Wahesu, Mulimu ki yena yaziba. . . . Usike . . . walila.”

Manzwi ao naashobotezwi mwa mazebe a musali yabizwa Bebe, yanaali kwa maswabi a bo ndatahe bane bashwezi mwa kozi ya fa mukwakwa.

Bo Bebe nebautwana hahulu ni bo ndataa bona. Manzwi ao naabulezwi ki mulikanaa bona yanaabata kubaomba-omba, kono bo Bebe nebatunkilwe hahulu ki manzwi ao kufita kuomba-ombiwa ki ona. Nebakuta-kutezi kuipulelisa mwa pilu kuli: “Lifu la bo ndate halisikaba lelinde.” Nekubonahezi hande kuli bo Bebe hane bañozi ka za taba yeo mwa buka lilimo zeñata kuzwa fo, nebasali mwa maswabi.

Sina mone balemuhezi bo Bebe, kuunganga nako yetelele kuli mutu yashwezwi atuhele kuikutwa butuku kwa pilu, sihulu haiba naautwana hahulu ni mutu yo yashwile. Ki lona libaka Bibele haitalusa kuli lifu ki “sila sa mafelelezo.” (1 Makorinte 15:26) Lifu litahanga ku luna ka kusalibelela, hakuna yakona kulitibela mi liinganga batu belulata hahulu. Lifu liama mañi ni mañi waluna. Kacwalo, haluswaneli kukomoka haiba kulubela taata kutwaela muinelo hamulaho wa kulatehelwa ki mwanahabo luna mwa lifu.

Mwendi semukile mwaipuza kuli: ‘Mutu ukona kuunga nako yekuma kai inze ali mwa maswabi? Mutu ukona kuitiisa cwañi haali mwa maswabi? Nikona kuomba-omba cwañi batu babashwezwi ki balatiwa babona? Kana kunani sepo yeñwi ka za balatiwa baluna babashwile?’