Mwa ku fumanela litaba ka bunolo

Mukete puo

Mu ye fa kalulo ya bubeli ya litaba ze li teñi

Mu ye kwa litaba za mwahali

Mu ye kwa litaba za mwahali

Lipaki za Jehova

Silozi

MUZUHE! NO. 4 2016

 TOHO YA TABA | MOMUKONA KUBELA NI MIKWA YEMINDE

2 Mube Mwa Miinelo Yeemitusa Kuba ni Mikwa Yeminde

2 Mube Mwa Miinelo Yeemitusa Kuba ni Mikwa Yeminde
  • Haluungeni kuli muitomezi sikonkwani sa kuli mucange lico zende zetusa mubili wamina, kono cwale mubona ice cream mi mukalisa kushukelwa hahulu kuica.

  • Luungeni kuli muezize katulo ya kuli mutuhele kuzuba kwai, kono cwale mulikanaa mina, yaziba kuli mubata kutuhela kuzuba, umifa kwai kuli muzube.

  • Luungeni kuli nemulelile kuli kacenu mukaya kwa kueza lipapali zetiisa mubili, kono muikutwa kuli nihaiba feela kubata komubeile makatulo amina emutinanga hamuya kwa kumata ki musebezi omutuna!

Kana mwalemuha kuli miinelo yetalusizwe yeo yaswana ka nzila yeñwi? Sekulemuhilwe kuli hañata miinelo yeelupotolohile ni batu belueza siango ni bona, likona kutahisa kuli musebezi wa kuitwaeza mikwa yeminde ni kutuhela mikwa yemaswe ube otaata kamba ube obunolo.

SIKUKA SA MWA BIBELE: “Mutu ya na ni ngana u bona kozi i sa taha, mi wa isabisa; kanti likuba li ipitelela fela mi za ziyeleha.” Liproverbia 22:3.

Bibele ilueleza kuli lulelelange cimo zelubata kueza. Ka kueza cwalo, lwakona kuba ni butali bwa kuambuka miinelo yekona kulupalelwisa kupeta hande likonkwani zeluitomezi, ili kutahisa kuli lube mwa miinelo yeminde yeka lutusa kupeta likonkwani zaluna. (2 Timotea 2:22) Ka bukuswani, luswanela kubona teñi kuli lu mwa miinelo yeelutusa kuba ni mikwa yeminde.

Muipeye mwa muinelo otahisa kuli mufumane taata kueza nto yemaswe mi kumibele bunolo kueza nto yende

ZEMUKONA KUEZA

  • Muipeye mwa muinelo otahisa kuli mufumane taata kueza nto yemaswe. Ka mutala, haiba mubata kuli mutuhele kucanga lico zesatusi hande mubili wamina, mulike kusabulukanga lico zecwalo mwa liapehelo lamina. Ka kueza cwalo, mukafumana kuli nako yemukaba ni takazo ya kuca lico zeo, kuka mibela bunolo kusalica.

  • Muipeye mwa muinelo otahisa kuli kumibele bunolo kueza nto yende. Ka mutala, haiba mubata kuli hamuka zuha kakusasana mueze lipapali zetiisa mubili pili musika eza kale nto ifi kamba ifi, muunge litino zemutinanga hamuya kwa kueza lipapali zetiisa mubili mi mulibeye kwatuko ni mumbeta wamina pili musika lobala kale busihu. Haiba mufumana bunolo kukalisa kuitwaeza mukwa omunde, kuka mibela bunolo kuzwelapili kuba ni mukwa wo.

  • Mukete hande balikani bamina. Hañata luhozanga mikwa ya batu belueza siango ni bona. (1 Makorinte 15:33) Kacwalo, musike mwaswalisana hahulu ni batu babatabela mikwa yemubata kutuhela; muswalisane ni batu babaka misusueza kuba ni mikwa yeminde.