Mu ye kwa litaba za mwahali

Mu ye kwa litaba za mwahali

Lipaki za Jehova

Mukete puo Silozi

MUZUHE! No. 2 2019 | Lituto ze 6 Zebatokwa Kulutiwa Banana

Lituto ze 6 Zebatokwa Kulutiwa Banana

Nemuka tabela kuli mwanaa mina abe mutu yacwañi hakahula?

  • Yanani buiswalo

  • Yaikokobeza

  • Yakona kuitiisa

  • Yaitingwa

  • Yaeza hande lika

  • Yasepahala

Kuli banana babe ni tulemeno totucwalo, mutokwa ­kubaluta tona. Batokwa ketelelo yamina.

Mwa magazini ye, lukanyakisisa lituto za butokwa ze 6 zemutokwa kuluta bana bamina, ili lituto zekaba tusa habaka hula.

 

Bunde Bwa Kuba ni Buiswalo

Ki kabakalañi kuba ni buiswalo hakuli kwa butokwa, mi lukona kuba cwañi ni buiswalo?

Mwakubela ni Buikokobezo

Haiba mutusa bana bamina kuikokobeza, bakatusiwa mwa bupilo ka nako ye ni kwapili.

Mwakubela ni Buitiiso

Banana babaituta mwakubela ni buitiiso bakakona kuyo tiyela miinelo yetaata habaka hula.

Mwakubela Mutu Yaitingwa

Ki ifi nako yende yaswanela kuituta mutu kuba yaitingwa, inze ali mwanana kamba inze ali yomuhulu?

Bunde Bwa Kuetelelwa ki Babahulu

Banana batokwa kuetelelwa kuli bakondise mwa bupiilo, kono bakona kufumana kai ketelelo yecwalo?

Kuutwisisa Zelukile ni Zesika Luka

Kuluta bana bamina kuba ni muzamao omunde kukabatusa kwapili habaka hula.

Litaba Zeñwi Zekona Kutusa Bashemi

Bashemi ni bona batokwa ketelelo kuli baikole bupilo. Kuli muzibe litaba zeñata ka za mwakuutela bana, mukene fa jw.org.