Mwa ku fumanela litaba ka bunolo

Mukete puo

Mu ye fa kalulo ya bubeli ya litaba ze li teñi

Mu ye kwa litaba za mwahali

Mu ye kwa litaba za mwahali

Lipaki za Jehova

Silozi

MUZUHE! APRIL 2014

 TABA YA FA LIKEPE LA FAHALIMU | TUSO YA KU PILA KI IFI?

Bakeñisa Kuli Tuso I Teñi

Bakeñisa Kuli Tuso I Teñi

“Mu nepela lipilaelo za mina ku [Mulimu], kakuli wa mi tokomela.”—1 PITROSI 5:7.

Lifu li kona ku bonahala kuli la tusa ku fita ku pila haiba mu ikutwa kuli ha ku na ze mu kona ku eza kuli mu cince muinelo wa mina. Ha lu nyakisiseñi lika ze kona ku mi tusa.

Tapelo. Ha lu swaneli feela ku lapela ka mulelo wa ku bata ku ikutwa hande kamba ha se lu ikutwa kuli ha lu zibi za ku eza ka za butata bwa luna. Tapelo ki ku ambola luli ni Jehova Mulimu, ya lu tokomela. Jehova u bata kuli lu mu bulelele lipilaelo za luna. Mane, Bibele i lu susueza kuli: “U lwalise Muñaa Bupilo mulwalo wa hao, mi u ka ku tiisa.”—Samu 55:22.

Mu lapele ku Mulimu kacenu. Mu itusise libizo la hae, lona la Jehova, mi mu lapele ku zwelela kwatasaa pilu ya mina. (Samu 62:8) Jehova u bata kuli mu fite fa ku mu ziba hande sina mulikanaa mina. (Isaya 55:6; Jakobo 2:23) Mwa kona ku lapela ka nako kaufela ku si na taba ni ko mu kona ku ba.

Ba American Foundation for Suicide Prevention, ba bulela kuli, “lipatisiso li bonisa kuli buñata bwa batu ba ba ipulayanga—ba ba fita fa palo ye eza 90 pesenti kamba ku fitelela fo—ba banga ni butuku bwa mwa munahano ka nako ye ba ipulaya. Kono hañata ku banga kuli matuku ao na si ka lemuhiwa, ku fumanwa ki baalafi, kamba ku alafiwa hande”

Batu ba ba iyakatwa mina. Bupilo bwa mina ki bwa butokwa hahulu kwa batu ba bañwi ili ku kopanyeleza cwalo lubasi lwa mina ni balikani ba mina ba se ba bonisize kale kuli ba iyakatwa mina. Batu ba bañwi hape ba ba kona ku iyakatwa mina ba kopanyeleza cwalo batu be mu si ka kopana kale ni bona. Ka mutala ka linako ze ñwi ha ba nze ba kutaza, Lipaki za Jehova ba kopananga ni batu ba ba lembwalile hahulu, ili bao ba bañwi ku bona ba kile ba bulela kuli ne ba tokwa hahulu tuso mi ne se ba nahanile ka za ku ipulaya. Ku kutazanga fa ndu ni ndu ku file Lipaki za Jehova kolo ye ipitezi ya ku tusa batu ba ba cwalo. Ka ku latelela mutala wa Jesu, Lipaki za Jehova ba iyakatwa batu ba bañwi. Ba iyakatwa mina.Joani 13:35.

Tuso ya baalafi. Ku nahananga hahulu za ku ipulaya, hañata ki sisupo sa kuli mutu u na ni butuku bwa mwa booko, bo bu cwale ka ku lembwala ko ku tulile tikanyo ko ku tokwa likalafo za kwa sipatela. Ha mu tokwi ku ikutwa maswabi haiba mu kula butuku bwa mwa booko kakuli bu swana feela ni butuku bwa mwa mubili. Mane butuku bwa ku lembwala se bu bapanyizwe kwa libelenge. Mañi ni mañi wa kona ku bukula—mi bwa kona ku alafiwa. *

MU HUPULE TABA YE: Hañata ku taata hahulu ku tiyela maikuto a ku lembwala hahulu ka ili mina feela. Kono ha mu tusiwa ki mutu yo muñwi mwa kona ku tiyela maikuto ao.

ZE MU KONA KU EZA CWALE: Mu bate mualafi ya itingwa ili ya alafanga matuku a ama munahano a cwale ka butuku bwa ku lembwala.

^ par. 8 Haiba minahano ya ku bata ku ipulaya i zwelapili, mu bate linzila ze mu kona ku fumana ka zona tuso mwendi cwalo ka ku lizeza nombolo ya ba ba bona za batu ba ba bata ku ipulaya kamba ya kwa sipatela ya ba ba talima za matuku a ka sipundumukela. Babeleki bao ki batu ba ba lutilwe hande musebezi.